2
Karai Kasang a chyoi pra ai kawng, Ziun hta e,
pahtau dum mu; shadum ai nsen shapraw mu.
Yuda amyu masha ni e, hkrit gari nga mu!
Dai Madu a nhtoi gaw kade n na yang du wa na ra ai.
Dai nhtoi gaw nsin sin nna, sin mak nhtawm
chyang htat ai hte sumwi mung ai shani rai na ra ai.
Bum ni a ntsa e nsin ka-up nga ai zawn
n-gun ja ai dinggam-yaw hpyen hpung ni rawt lung wa nga ai.
Dai zawn re ai gaw shawng de galoi mung n byin yu, htawm hpang de mung,
galoi mung bai byin sana ra ai n rai.
 
Wan zawn shanhte hkai nmai ni sha ma ai.
Shanhte a shawng na lamu ga gaw Eden Sun hte bung nga ai,
rai ti mung shanhte a hpang e, dai gaw akrin ayang rai nga ai.
Shanhte a lata kaw na hpa mung lawt lu ai n rai.
Shanhte gaw gumra ni zawn rai nga ma ai;
shanhte gaw hpyen gumra ni zawn kagat ma ai. Ref 2:4-5: Shr 9:7-9.
Shanhte gaw bum pungding ntsa hkan gumtawng hkawm nga yang,
hpyen leng ni zawn nsen sharat nga ma ai;
shanhte gaw tsingdu jahkraw wan hkru ai nsen zawn ngoi ma ai.
Shanhte gaw hpyen gasat na matu shajin da ai hpyen hpung kaba zawn tsap dingren nga ma ai.
Shanhte shani sa wa yang, masha shagu hkrit gari ma ai;
masha shagu a myi man chyang mat ma ai.
Shanhte gaw share ninghkrin ni zawn gasat ma ai;
shanhte gaw hpyenla ni zawn mare bunghku ni de lung ma ai.
Shanhte yawng gaw lam n shai ai sha,
dingyang ganawng lung wa ma ai
kadai mung manang wa hpe n hkra ai sha tinang lam hkan ma ai.
Shanhte gaw hpyen dap hku dumbrat gamawng hkawm ma ai rai nna,
hpa mung shanhte hpe jahkring da lu ai n rai.
Shanhte gaw mare de kanawng matsut lung wa nna,
bunghku ni a ntsa hkan kagat hkawm ma ai;
dum nta ni a ntsa de lung nhtawm
lagu lagut ni zawn hkuwawt hku shang bang ma ai.
 
10 Shanhte rawt lung wa yang, ginding aga ashun awam nga ai;
sumsing lamu gari ashun nga ai.
Ajan hte shata sin mak mat nna,
shagan ni loi mi pyi n htoi mat ma ai. Ref 2:10: Shr 8:12.
11 Dai Madu gaw shi a hpyen hpung hpe nsen sharawt dat wu ai.
shi a ga madat ai hpyen hpung ni
law ai hte n-gun rawng nga ma ai.
Dai Madu a nhtoi gaw kade sha hkrit hpa rai nga a hka!
Kadai wa hkrung nga lu na rai ta?
12 Dai Madu gaw, ?Ya rai ti mung, myit kraw asan sha hte myit malai
wa nna, lusha gam, hkrap shabam nna
sharung shayawt ai hte ngai hpang de nhtang wa marit.
13 Nanhte a yawn hkyen ai hpe madun dan lu hkra
nanhte a myit masin agrawp shadaw kau mu; hpun palawng gang je kau ai hte sha ram ai n rai,? ngu nna tsun wu ai.
 
Dai Madu nanhte a Karai Kasang hpang de nhtang wa marit.
Shi gaw matsan chye dum ai hte n-gaw n wai ai myit hpring hkra rawng nga ai;
shi gaw myit galu kaba ai hte shi a ga sadi ni hpe shatup nga ai;
shi gaw ari jaw na matu n rai, mara dat ya na matu, tut nawng jin jin rai nga ai wa rai nga ai.
14 Dai Madu nanhte a Karai Kasang gaw shi a myit chye galai ai hte
nanhte hpe ndaw nhta re ai nsi naisi ni shaman ya na ra a dawng.
Dai hpang, nanhte shi hpe nsi naisi hte sabyi ntsin nawng ya lu na myit dai.
 
15 Ziun Bum hta pahtau dum mu;
lusha gam na nhtoi hkang dat ai hte shawa hpawng shaga da mu!
16 Amyu masha ni hpe shinggyin jahpawng tawn mu;
shanhte a matu chyoi pra ai zup hpawng hkyen ya mu;
dingla ni hpe jahpawng mu;
ma kaji ni hpe shinggyin mu;
chyu chyu ai ma chyangai ni hpe hpawng shangun mu.
Hkungran num, hkungran la nnan ni pyi
shanhte a nta gawk kata kaw na pru sa wa lu na mara ai.
17 Tawn hkungri hte Nawku Htingnu chyinghka lam lapran
dai Madu hpe daw jau nga ai hkinjawng ni mung
hkrap ai hte ning ngu akyu hpyi ma ai:
?Madu e, na a amyu masha ni hpe matsan dum la mi law.
Kaga masha amyu ni, ?Nanhte a Karai Kasang kanang nga nga a ta?,? nga nna tsun let
anhte hpe asawng asang di nna n ashu kau shangun u ga law.??
18 Dai hpang, dai Madu gaw shi a mungdan a matu myit ru tsang ai lam madun dan nu ai;
shi gaw shi a amyu masha ni hpe matsan yu dum nga ai.
19 Shi gaw shanhte hpe ning ngu htan wu ai:
?Ya chyawm gaw, ngai nanhte hpe nsi naisi, sabyi ntsin, hte tsanlun sau jaw na made ai,
nanhte myit dik hkra hkru kat na madai.
Kaga masha amyu baw ni nanhte hpe galoi mung asawng asang di na mara ai n rai.
20 Ngai gaw dingdung maga de na du sa ai dinggam-yaw hpyen hpung hpe jahtaw kau nna
shanhte hta na nkau mi hpe nam mali de gawt kau na nngai.
Shanhte a shawng man na arawng aya lu ai ni hpe Jum Nawng de,
shanhte a shingdu arawng aya lu ai ni hpe Ka-ang Panglai de gawt kau na we ai.
Shanhte a moi mang ni manam hkying na mara ai.
Shanhte yawng nanhte hpe galaw manu ai majaw, shanhte hpe ngai jahten shaza kau na we ai.
 
21 ?Yi hkauna ni e, hkum hkrit myit,
rai ti mung dai Madu gaw nanhte yawng a matu amu galaw nu ai majaw,
kabu gara ai hte pyaw pyaw rai nga mu.
22 Dusat yam nga ni e, hkum hkrit nga myit;
udat shara ni tsit lali nga sai;
namsi hpun ni si si nga sai,
lagum si ni hte sabyi si ni n taw n tsang ja kat nga ma ai.
23 Ziun a amyu masha ni e, kabu gara nga mu,
dai Madu nanhte a Karai Kasang nanhte a matu galaw ya sai amu hta kabu sharawng nga mu.
Shi gaw nanhte hpe aten ram ai marang nhpaw jaw manit dai;
shi gaw nshung marang hpe mung, marang shadoi hpe mung, shawng de na hte maren,
nanhte a matu jahtu ya nga sai.
24 Chyarang pa ni hta nsi naisi ni hte hpring na ra ai;
htumbyen ni a makau na nhkun ni hta sabyi ntsin hte tsanlun sau ni hte hpring kabrat na ra ai.
25 Nanhte a nsi naisi ni sha kau ya ai dinggam-yaw unawng ni a majaw
nanhte sum mat ai shaning ni a matu, ngai bai nhtang jaw na made ai.
Dai gaw nanhte hpe ninghkap na matu ngai shangun dat ai hpyen hpung rai nga ai.
26 Ya chyawm gaw, nanhte sha na lusha law law lu nna, hkru hkru kat kat sha lu na rai manit dai.
Nanhte a matu mauhpa amu galaw ya sai dai Madu
nanhte a Karai Kasang hpe shakawn kungdawn mu.
Nye a amyu masha ni gaw galoi mung n kaw n law bai di hkrum na masai n rai.
27 Dai hpang, Israela e, ngai nanhte a lapran e nga nga nngai mung,
Ngai gaw dai Madu nanhte a Karai Kasang rai nga nngai hte
ngai hta lai karai shaje n nga sai hpe nanhte chye wa na rai myit dai.
Nye a amyu masha ni gaw galoi mung n kaw n law bai di hkrum na masai n rai.
28 ?Dai hpang, ngai gaw masha shagu a ntsa e nye a wenyi ru bun na nngai;
na a shayi shadang sha ni nye a mungga hkaw tsun na mara ai;
nanhte a dingla ni yup mang mu na mara ai;
nanhte a shabrang ni shingran mu na mara ai.
29 Dai aten hta, ngai gaw numsha, lasha lahkawng yan hte shangun ma ni a ntsa e pyi
nye a Wenyi ru bun na nngai.
 
30 ?Dai nhtoi hta sumsing lamu hta mung,
ginding aga ntsa e mung sadi jaw ai sai hka,
wan hte wan hkut sumwi ni hpe ngai madun na nngai.
31 Galu kaba re ai hte hkrit mai ai dai Madu a Nhtoi
garai n du yang, ajan gaw nsin sin mat wa nna
shata gaw sai zawn hkyeng mat na ra ai. Ref 2:31: Mat 24:29; Mrk 13:24-25; Luk 21:25; Shr 6:12-13.
32 Rai ti mung, karum la na matu dai Madu hpe hpyi jahtau ai ni yawng hkye hkrang la hkrum na mara ai.
Dai Madu tsun da sai hte maren,
?Yerusalem mare na nkau mi lawt lu na mara ai;
dai ni gaw ngai lata san da hkrum ai ni rai nna hkrung nga lu na mara ai,?? Ref 2:28-32: Kas 2:17-21. Ref 2:32: Rom 10:13.