YOELA LAIKA
(JOEL)
Ga Nhpaw
Myihtoi Yoela hte seng ai lam loi mi sha chye lu nga ai, shi naw nga ai shaloi nan dai lam atsawm sha n san nga ai. Rai ti mung, ndai laika gaw jaw 5 shing n rai jaw 4 B.C. aten, Persi hkawseng up hkang ai aten laman pru wa ai laika rai nga ai ngu, sawn la mai nga ai. Yoela gaw dinggam-yaw ni a hkrit tsang na zawn re ai htim gasat lam hte Palestina mung hta jan gri nna hten run mat ai lam ni hpe ka da nga ai. Ndai mabyin lam ni hta, shi gaw dai Madu a du sa wa nga ai nhtoi a kumla langai hte shi a ding man ai myit ninghkap ai ni hpe Madu ari jaw na aten ni hpe shi mu wu ai. Dai myihtoi gaw myit malai na matu amyu masha ni hpe dai Madu shaga ai lam hte bai ngamu ngamai shangun na ga sadi hte shi a amyu masha ni hpe shaman ya ai lam tsun ginlen ya nga ai. Karai Kasang gaw shi a amyu masha ni ngu na numsha, lasha kaji kaba n nga yawng a ntsa de shi a wenyi shangun dat ya na ngu ai ga sadi gaw matsing da mai ai ga rai nga ai.
1
1 Ndai gaw Pehtuela a kasha Yoela kaw du ai dai Madu a mungga rai nga ai.
2 Asak kaba sai amyu masha ni e, madat mu;
Yuda mung na masha shagu hte e, na la mu.
Ndai zawn re ai amu nanhte a prat e mung,
nanhte a kawa ni a prat hta mung byin yu sani?
3 Dai hte seng ai lam nanhte a kashu kasha ni hpe tsun dan mu;
shanhte mung shanhte a kashu kasha ni hpe tsun dan na mara ai,
hpang prat ban mi hte ban mi hkai shachyaw mat wa na mara ai.
4 Nsi naisi ni hta dinggam-yaw wunawng mi a hpang wunawng mi kap nga ma ai;
wunawng mi sha kamawng mat wa ai hpang wunawng mi sha kau nga ai.
5 Tsa chyaru ya ni e, yup hprang ai hte hkrap nga mu;
sabyi lu nang ai ni e, jahtau hkrap nga mu;
sabyi ntsin nnan galaw na sabyi si ni hten mat sai.
6 Dinggam-yaw hpyen hpung mi anhte a mungdan hpe gasat masai;
shanhte gaw n-gun ja nna n dang hti hkra law nga ma ai;
shanhte a awa gaw hkanghkyi a awa zawn masen nga ai. Ref 1:6: Shr 9:8.
7 Shanhte gaw anhte a sabyi ru ni jahten kau nna
anhte a lagum hpun ni hpe maya sha kau manu ai.
Shanhte gaw hpun lakung lakying ni hpraw mat hkra,
hpunhpyi gawng kau manu ai.
8 Amyu masha ni e, hkawn ram prat e si mat wa ai lasha a matu
yawn hkyen hkrum ai numsha langai zawn, jahtau hkrap nga mu.
9 Nawku Htingnu kata nawng ya na nsi naisi hte sabyi ntsin n nga sai;
dai Madu a matu hkungga n lu manu ai majaw, hkinjawng ni sharung shayawt nga ma ai.
10 Yi, sun hkauna ni hkam ma sai;
nsi naisi ni hten za mat ai hte,
sabyi si ni hkraw mat nna,
tsanlun hpun ni nyip mat wa ai majaw,
lamu ga sharung shayawt nga ai.
11 Yi, hkauna galaw ai ni e, yawn nga mu;
hkaulan mam, muk-yaw mam,
rai sa, nsi naisi nga manga yawng hten za mat ai majaw,
sabyi sun lajang ai ni jahtau hkrap nga mu.
12 sabyi ru ni hte lagum hpun ni nyui nyip mat sai;
namsi namsaw hpun ni yawng nyui mat nna si mat sai.
Amyu masha ni a kabu gara lam gaw htum mat sai.
13 Tawn hkungri hta daw jau amu galaw ai hkinjawng ni e,
lachyit nba hpun let hkrap nga mu!
Nawku Htingnu kata shang nna shana tup sharung shayawt mu!
Nanhte a Karai Kasang a matu nawng ya na nsi naisi hte sabyi ntsin n nga sai.
14 Lusha gam na matu hkang dat mu;
shawa zup hpawng shaga mu!
Ningbaw ni hte Yuda amyu masha ni yawng
shinggyin jahpawng nna
dai Madu nanhte a Karai Kasang a Nawku Htingnu de
shang nna, shi hpe hpyi jahtau mu!
15 Dai Madu a nhtoi gaw ni magang wa ra ai,
dai nhtoi hta Chyahtum Chyalai N-gun rawng ai wa jahten shaza na ra ai.
Dai shani e hkrit kajawng hpa pru wa na ra ai! Ref 1:15: Esa 13:6.
16 Anhte a nsi naisi ni hten za mat sai majaw, karum la lam n nga sai ngu anhte mada yu ga ai.
Anhte a Karai Kasang a Nawku Htingnu hta kabu gara ai lam n nga sai.
17 Nli tum ni hkun hkraw ai aga kata hta krau si mat sai.
Dum hta bang da na mam n nga sai;
kaman re ai mam dum ni hten run mat sai.
18 Shanhte a matu yam nga udat shara n nga sai majaw,
dumsu hpung ni myit htum let nbaw nga ma ai;
sagu hpung ni mung nni nkri hkrum sha nga ma ai.
19 Madu e, udat shara ni hte hpun ni hkraw mat nna,
dai ni wan hkru mat ai majaw
ngai nang hpe hpyi jahtau nngai.
20 Matse labye dusat ni pyi hka shi, hka gai hkyet mat ai majaw,
nang kaw hpyi jahtau nga ma ai.