6
Israela amyu masha ni gaw dai Madu hpe lang mi bai yubak mara galaw shut kau ma ai rai nna shi gaw Midian masha ni hpe sanit ning up hkang shangun wu ai. Dai Midian masha ni gaw Israela masha ni hta grau n-gun ja nga ma ai rai nna, Israela amyu masha ni mahtang lungpu hku ni hte bum lang kawng jinghkang hkan na shim ai shara ni hkan makoi gyem nga ma ai. Israela amyu masha ni nli naili gat hkai da ai shaloi, Midian masha ni mahtang Amalek masha ni hte nam mali hkan nga ai amyu baw ni hte rau sa htim gasat ma ai. Shanhte gaw dai mung hta dap jung nna dingda maga Gaza mare grup yin du hkra tu ai nsi naisi ni hpe jahten sharun kau ma ai. Shanhte gaw sagu, dumsu hte lawze ni yawng hpe la mat wa nhtawm Israela masha ni lu sha na malu masha hpe mung ngam da ya nga ma ai n rai. Shanhte gaw dinggam-yaw zawn kanawng hkawm ai yam nga hpung ni hte sum ni hte rau du sa ma ai. Shanhte hte shanhte a gawla-uk ni gaw hti n dang hkra law nga ai. Shanhte gaw dai mung de sa nna jahten shaza kau ma ai, Israela gaw shanhte a majaw matsan hkrum nga sai.
Dai hpang Israela amyu masha ni gaw Midian masha ni a majaw karum la na matu dai Madu kaw hpyi jahtau ma ai; Dai Madu Israela a Karai Kasang gaw shanhte hpang de ndai mungga ning ngu tsun na matu myihtoi langai shangun dat wu ai: ?Ngai gaw nanhte hpe Egutu mung e mayam tai nga myit dai kaw nna woi wa ma sade ai. Ngai gaw nanhte hpe Egutu masha ni a lata kaw na mung, ndai mung e nanhte hpe gasat ninghkap ai masha amyu ni a lata kaw na mung, hkye mawai la ni ai. Ngai gaw nanhte rawt lung wa myit dai shaloi shanhte hpe gawt shapraw kau nhtawm shanhte a lamu ga hpe nanhte a lata hta ap ya ni ai. 10 Ngai gaw dai Madu nanhte a Karai Kasang rai nga nngai; ya nanhte nga nga ai mungdan hta Amori masha ni a hpara ni hpe nanhte nawku lu na myit dai n rai; rai ti mung nanhte gaw nye a ga n madat nga myit dai ngu ngai nanhte hpe tsun ni ai.?
11 Dai hpang dai Madu a lamu kasa mahtang Ohpra kahtawng de sa nna, Abieza lakung lama hta na Yoasha ngu ai wa madu da ai wamyi hpun nhpang e dung nga ai. Shi a kasha Gidon chyawm gaw Midian masha ni shi hpe n mu lu u ga, sabyi shup ai htumbyen hta hkaulan mam lagyim adup wu ai. 12 Dai Madu a lamu kasa gaw dai yang e shi kaw dan pru nna, ?N-gun ja nna share ai wa e, dai Madu gaw nang hte rau rai nga ai!,? ngu nna tsun wu ai.
13 Gidon gaw shi hpe, ?Madu e, dai Madu anhte hte rau rai yang, hpa majaw ndai lam ni yawng anhte hta byin hkrum a ta? Dai Madu gaw anhte hpe Egutu mung na woi wa sai n rai ni?, nga nna anhte a kawa ni anhte hpe tsun dan ai mauhpa amu yawng mayawng gaw hpa baw rai mat nga a ni? Dai Madu gaw anhte hpe kau da nhtawm Midian masha ni a lata hta kabai kau da mani ai,? ngu nna ngai san mai nga nngai ngu tsun wu ai.
14 Dai hpang dai Madu gaw shi hpe, ?Nang hta rawng ai n-gun mahkra hte Israela amyu masha ni hpe dai Midian masha ni a lata kaw na hkye mawai la su; ngai nan nang hpe shangun dat nga nngai,? ngu nna hkang dat wu ai.
15 Gidon gaw, ?Rai ti mung Madu e, ngai gaw Israela masha ni hpe kaning rai hkye mawai la lu na rai nga a ta? Nye a amyu lakung lama gaw Manashe amyu bawsang ni hta n-gun kya htum ai she rai nga ai, nye a dinghku hta mung ngai gaw hpa n tai htum ai wa rai nga nngai,? ngu nna htan wu ai.
16 Dai Madu mung, ?Ngai nang hpe karum la na rai nga nngai majaw nang gaw dai amu hpe galaw lu na rai ndai. Nang gaw shanhte hpe marai mi hpe zawn loi loi hte dai Midian masha ni hpe agrawp kau lu na rai ndai,? ngu nna htan wu ai.
17 Gidon gaw, ?Nang ngai hpe awng sharawng nga ndai rai yang, nang teng teng dai Madu rai nga ai sakse ngai hpe madun dan e law. 18 Ngai nang kaw lusha hkungga la sa lu ai aten du hkra, chyeju hte hkum wa mat et,? ngu nna htan wu ai.
Shi mung, ?Nang bai nhtang sa wa ai aten du hkra nga nga na nngai,? ngu nna tsun wu ai.
19 Dai rai nna Gidon gaw shi a nta de wa nna bainam kasha langai shadu nna shadung pawng 20 lang nhtawm matsi n rawng ai muk shadu wu ai. Shi gaw ashan hpe ka hta, shan jahku hpe di hta bang nna wamyi hpun npu e nga ai dai Madu a lamu kasa hpang de la sa nhtawm shi hpe sa jaw wu ai. 20 Lamu kasa gaw shi hpe, ?Ashan hte muk hpe ndai lunghtawn e mara tawn u; shan ntsin hpe mung de a ntsa hta ru bun u,? ngu nna hkang da wu yang, Gidon mung matsun ai hte maren galaw wu ai. 21 Dai hpang dai Madu a lamu kasa mung shi lang nga ai dawhkrawng ladawn nna de a matu hte ashan hte amuk hpe chyan ahtawk dat wu yang, nlung kaw na wan pru wa nhtawm dai ashan hte muk hpe hkru kau nga ai. Dai hpang lamu kasa mung shi kaw na wa mat wa wu ai.
22 Dai Madu a lamu kasa hpe shi mu kau sai hpe Gidon dum chye wu yang shi gaw, ?Tsaw Htum ai Madu e, na a lamu kasa hpe ngai myi man chyaw mu kau sahka!,? ngu nna hkrit kahpra let tsun wu ai.
23 Rai ti mung dai Madu gaw shi hpe, ?Ngwi pyaw sim sa nga lit ga, hkum hkrit et; nang si na ndai n rai,? ngu nna tsun wu ai. 24 Gidon gaw dai yang e dai Madu a matu tawn hkungri galaw nhtawm dai hpe ?Dai Madu gaw ngwi pyaw sim sa nga ai.? ngu nna shamying wu ai. (Dai gaw dai ni du hkra Abieza a lakung lama ni a sali ga Ohpra shara e naw nga nga ai.)
25 Dai shana e dai Madu gaw Gidon hpe, ?Na nwa a usu hte kaga sanit ning du ai usu hpe la nhtawm na nwa a Bala tawn hkungri hpe run kau nna, de a makau na Ashera hpara num a masat kumla kran daw kau u. 26 Dai Madu na a Karai Kasang a matu grak re ai tawn hkungri hpe ndai kawng pungding e galaw tawn u. Dai hpang nang kran daw kau nit dai Ashera a masat kumla hpe ju hpun shatai let lahkawng ngu na usu hpe la nhtawm hkum ting nat nawng u,? ngu nna tsun wu ai. 27 Dai rai nna Gidon mung shi a shangun ma marai shi woi nhtawm dai Madu shi hpe tsun ai hte maren galaw wu ai. Shi a dinghku masha ni hte mare masha ni hpe nau hkrit wu ai rai nna shani e n galaw wam wu ai; shana e mahtang shi sa galaw wu ai.
28 Hpang jahpawt jau jau mare masha ni rawt ma yang, Bala tawn hkungri hte Ashera a masat dingsat kran daw kau hkrum nna dai yang e gaw da ai tawn hkungri ntsa hta lahkawng ngu na usu nat nawng da nga mala ai hpe shanhte mu ma ai. 29 Shanhte gaw shada da, ?Ndai amu hpe kadai galaw sata?, ngu nna san hkat ma ai. Shanhte san jep sagawn yu ma yang, Yoasha a kasha Gidon dai hpe galaw da ai lam shanhte sawk sagawn da ma ai. 30 Dai hpang shanhte gaw Yoasha hpe, ?Nang e, na a kasha hpe shapraw ya mi; shaloi shi hpe anhte sat kau lu na ga ai! Bala tawn hkungri hpe shi run kau nhtawm de a makau na Ashera a masat dingsat hpe kran daw kau nu ai,? ngu nna tsun mu ai.
31 Rai ti mung Yoasha chyawm gaw shi hte hkrum kapa ai ni yawng hpe, ?Nanhte gaw Bala a matu rawt tsap nga myit ni? Shi a maga de ninghkap ya na rai nga myit ni? Bala hpang maga de rawt tsap nang ai ni kadai mung jahpawt manap garai n du yang sat kau ai hkrum myit ga. Bala wa karai re ai teng yang gaw hten run mat ai shi a tawn hkungri hpe shi hkum nan makawp la u ga,? ngu nna tsun mu ai. 32 Yoasha gaw, ?Hten run mat sai shi a tawn hkungri hpe Bala shi nan makawp la u ga,? ngu wu ai majaw dai aten kaw nna Gidon hpe Yerubala ngu nna shamying wu ai.
33 Dai hpang Midian masha ni, Amalek masha ni hte nam mali hkan nga ai amyu bawsang ni yawng jawm hpawng nna Yawdan hka rap nhtawm Yezrela Kadit e dap jung ma ai. 34 Madu a wenyi chyawm gaw Gidon hpe hkang nga ai rai nna Abieza a lakung lama ni hta na masha ni shi a hpang hkan na matu shi pahtau dum let shaga dat wu ai. 35 Manashe mungdaw lahkawng hta na masha ni gaw shi kaw hkan nang na matu shaga la na nga, shi gaw kasa ni hpe shangun dat wu ai. Ashe, Zebulun hte Naphtali amyu bawsang ni hpang de mung kasa ni hpe shangun dat wu ai rai nna shanhte mung shi kaw sa zup ma ai.
36 Dai hpang Gidon gaw Karai Kasang hpe, ?Nang gaw ngai hpe lang nna Israela hpe hkye mawai la na matu daw dan da nit dai lam tsun ndai. 37 Rai sa, ngai gaw anhte hkaulan mam kabye la ai chyarang pa e sagu mun nkau mi tawn da na nngai. Jahpawt e ga ntsa n re ai sha dai sagu mun hta sha numri hkrat bun ai rai yang chyawm gaw Israela hpe hkye mawai la na matu ngai hpe lang na rai nga ndai hpe ngai chye na lu na rai nngai,? ngu nna tsun wu ai. 38 Gidon gaw hpang jahpawt manap jau jau aten hta rawt nna sagu mun shup yu wu yang numri ntsin jarung mi hpring hkra rawng nga ai majaw dai gaw tup hkrak byin nga sai. 39 Dai hpang Gidon gaw Karai Kasang hpe, ?Ngai hpe hkum pawt et, ya kalang mi sha gaw ngai naw tsun we ga. Chyeju hte sagu mun hte lang mi gaw galaw shangun e. Ndai lang mahtang sagu mun hpe hkun hkraw shangun nna aga hpe madi nga u ga,? ngu nna tsun wu ai. 40 Karai Kasang gaw dai hte maren dai shana mung shabyin wu ai rai nna hpang jahpawt e sagu mun gaw hkun hkraw nga ti mung aga gaw numri hte madi nga ai.