8
Bildad
1-2 Nang gaw na a nbung ga hpe galoi du hkra tsun na n ni?
Karai Kasang gaw teng man rap ra tara hpe galoi mung n manai kau nga ai;
shi gaw jaw ai amu galaw na matu galoi mung n hprai nga ai.
Na a nshu nsha ni mahtang Karai Kasang hpe shut hpyit ma ai;
dai rai nna shanhte hkam la ging ai hte maren, shi shanhte hpe ari jaw wu ai.
Rai ti mung, ya chyawm gaw Chyahtum Chyalai N-gun Rawng Ai Karai Kasang hpang de kayin wa nna shi hpe hpyi nem let;
nang rai nna grai ding man ai hte san seng nga ndai rai yang,
Karai Kasang nang hpe sa karum la nna,
nang hpe dai dinghku hte seng ai ngamu ngamai lam bai jaw ya na ra ai.
Karai Kasang nang hpe jaw ya na ra ai sut gan gaw nang shamat kau sai
sut gan ni yawng ngu na hpa hte mung shadawn lu na n rai.
 
Moi moi na hpaji byeng-ya hpe hkring mi tam sawk yu u,
anhte a kaji kawa ni sharin da sai teng man lam ni hpe myit yu u.
Anhte a asak sumri sumdam kadun nga ai, anhte hpa mung n chye ga ai;
anhte gaw ginding aga ntsa e shingnip zawn lai mat wa ga ai.
10 Rai ti mung, moi na hpaji chye ai masha ni mahtang nang hpe sharin mu ga;
shanhte kaning nga tsun ai ga hpe madat u:
 
11 ?Hka n nga ai shara hta mai-aw tu lu ai n rai;
dai ni hpe hpung-ya n nga ai shara hta galoi mung n mu lu ai.
12 Hka n rawng mat jang, dan lang na nau naw kaji ai rai nna,
dai ni gaw shawng nyip mat nga ai.
13 Karai Kasang hpe n kam ai masha ni gaw dai mai-aw ni zawn rai nga ai,
shanhte a myit mada shara htum mat nga ai, Karai Kasang hpe kalang mi bai malap kau na ma ai.
14 Shanhte gaw gindi gram tsip zawn di loi ai ari hpe kam ma ai.
15 Gindigram tsip hpe nang shamyet ai rai yang, dai gaw shanhte hpe shadaw shangang ya lu na a ni?
Shanhte dai ari hpe magra jum da ai rai yang, dai gaw shanhte hpe shangang shagrin ya lu nga a ni?
 
16 N hkru ai masha ni gaw jan a npu na tsingdu ni zawn prut wa ai;
sun ting hta tu hpra nga ai tsingdu ni hte bung nga ma ai.
17 De a aru ni lungrawk grup grup hkram nga ai rai nna,
lungrawk shagu hpe magra jum da nga ai.
18 Rai ti mung, dai ni hpe baw kau jang,
dai yang e tu nga ai hpe kadai mung chye lu na mara ai n rai.
19 Rai sa, n hkru ai masha ni lu la ai kabu gara lam gaw dai hte rai nga ai;
kaga ni ya jang sa nna shanhte a shara ni hpe la kau ya na mara ai.
 
20 Rai ti mung Karai Kasang chyawm gaw kam sham ai wa hpe galoi mung kau da na ra ai n rai;
n hkru ai masha ni hpe galoi mung karum ai n rai.
21 Shi gaw nang hpe bai mani shangun ai hte jahtau garu shangun na ra ai;
22 rai ti mung nang hpe n ju n dawng ai ni hpe kaya kahpa jahkrum nna,
tara n lang ai ni a dum nta ni htum mat na mara ai.