5
Yoba e, shaga yu u. Nang hpe htan ya ai wa nga yang, madat u.
Nang myit kayin wa lu hkra kadai lamu kasa nga ai kun?
Nang hkrai si hkra myit ru myit tsang nga ai gaw angawk shangun ai hte
htauli htaula myit n rawng ai sha amu galaw ai lam rai nga ai.
Angawk ai ni shim lum nga ai hpe ngai mu se ai,
rai ti mung ngai gaw shanhte a dum nta ni hpe alawan dagam kau nngai.
Shanhte a shadang sha ni shim lum lam hpe galoi mung mu tam ai n rai;
shanhte hpe tara rung hta kadai mung rawt tsap let makawp maga la ma ai n rai.
Kawsi kyet ai ni gaw angawk ai wa a nsi naisi ngu ai ju nhpan hta tu ai
nai mam nsi hpe du hkra pyi sha na mara ai.
Hpang gara ai ni chyawm gaw shi a sut gan hpe manawn na mara ai.
N hkru ai amu gaw ga nhpu hta tu ai n rai,
ru yak tsin-yam tsindam mung ga hta na tu pru ai n rai.
Teng teng n rai a hka! wan num-ya ni ntsa de kaja wa poi lung wa ai zawn,
anhte gaw tinang a matu ru yak tsin-yam tsindam jahkrum la nga ga ai.
 
Ngai lama nang rai taw gaw, Karai Kasang hpang de ngai kayin wa ai hte
nye a amu shi hpe ap ya na nngai.
Shi galaw ai galu kaba ai amu ni hte htum ngu n nga ai
shi a mauhpa amu ni hpe anhte n chye lu nga ga ai.
10 Shi gaw ga ntsa e marang jahtu ya nna
yi hkauna ni hpe hka madit ya nga ai.
11 Rai sa, Karai Kasang gaw grit nem ai wa hpe shagrau shatsaw nna,
madai sharung ai ni yawng hpe kabu gara ai lam jaw ya nga ai.
12-13 Hkalem hkalau chye ai masha ni a maw mawn lam ni hpe shi shanut kau ya nna
shanhte galaw na shatawng shada ai amu hta hpaji rawng ai masha ni hpe mahkam hkam nga ai,
shanhte galaw ai amu hpa mung awng dang na n rai,
14 shanhte gaw shani chyingtung e pyi nsin kata hta lamawm hkawm ma ai.
15 Rai ti mung Karai Kasang gaw matsan mayan ni hpe si du a lata kaw na hkye la nga ai;
Shi gaw ra kadawn ai ni hpe dip gamyet da hkrum nga ai kaw na hkye la nga ai.
16 Shi gaw matsan mayan ni hpe myit mada shara jaw nna, n hkru ai wa hpe shazim kau nga ai.
 
17 Karai Kasang e shading sharai hkrum ai wa gaw a nga ai!
Shi nang hpe daru sharin yang, masin hkum pawt et. Ref 5:17: Gsh 3:11-12; Heb 12:5-6.
18 Karai Kasang gaw nang hpe machyi hkra shangun tim ningma ni hpe ahkyen kayawp ya nga ai;
shi a lata hte nang hpe machyi hkra ti mung, shi a lata hte shamai shatsai ya nga ai. Ref 5:18: Hos 6:1.
19 Shi gaw nang hpe aten mi hte aten mi machyi hkrum ai kaw na hkye mawai la na ra ai;
20 hku hku wa yang, shi nang hpe jahkrung da na ra ai,
hpyen majan hta si du a lata kaw na mung, nang hpe makawp maga la na ra ai.
21 Karai Kasang gaw nang hpe shatan nhkan kaw na hkye mawai la na ra ai;
hten bya lam du wa ti mung, shi nang hpe hkye hkrang la na ra ai.
22 Nang gaw kashun kashe du daw sai hkaw amu hte kawsi hpang gara ai hpe mani kau nna;
matse labye dusat ni hpe n hkrit ra nga ndai.
23 Nang shawt ai yi hkauna ni hta lunghkrung lungbra ni nga na n rai;
matse labye dusat ni mung nang hpe galoi mung htim na n rai.
24 Dai hpang nang gaw na a sum kata hta ngwi pyaw sim sa ai hte nga lu na ndai;
na a sagu ni hpe nang mada yu yang, shanhte shim lum nga ma ai hpe nang mu lu na ndai.
25 Nang gaw kashu kasha law law lu wa nna;
dai gaw udat shara hta tu ai tsingdu tsingman ni zawn rai nga ai.
26 Shu la ai aten du hkra myin nga ai hkaulan mam zawn;
nang gaw asak ugut gu hkra nga lu na rai ndai.
27 Yoba e, ndai lam hpe aten galu sagawn hka ja la let anhte sharin la saga ai.
Dai gaw teng man nga ai rai nna, dai hpe ya jang hkap la u.