39
1 Bum e nga ai aya ni galoi aten hta kasha hkai ai gaw nang chye n ni?
Shan nga ni kasha hkai ai hpe nang mu yu nit ni?
2 Dai ni shanhte a kasha ni hpe kade na hkra gun da nga ai hpe nang chye n ni?
Shanhte shangai na aten hpe nang chye n ni?
3 Dai ni galoi aten hta makan jahkrat dat nna shanhte a hkalung ni
mungkan ga de prang mat wa ai hpe nang chye n ni?
4 Dai hkalung ni gaw prang yang ga hkan e kaba wa ai hte n-gun ja wa ma ai rai nna
hkawm mat wa nhtawm bai n wa ma ai.
5 Lawze nhprang ni hpe kadai wa ndut ndang dat dat a ta?
Dai ni brak hkawm mu ga, kadai wa shanhte hpe raw dat lu a ni?
6 Ngai gaw dai ni hpe shanhte a shingbyi shara tai na nam mali jaw ni ai,
dai ni gaw jum nga ai prang yang hkan shanu nga mu ga.
7 Dai ni gaw garu kachyi nsen ngoi ai mare ni hte tsan ai shara e nga ma ai,
kadai mung dai ni hpe amu galaw shangun na matu bik la lu ai n rai.
8 Bum ni gaw dai ni a lusha udat shara ni rai nna,
tsit lali ai hpa hpe mung tam sha nga ma ai.
9 Hpawlam gaw na a matu hpa galaw ya na rai ta?
Shi gaw na a wulawng hta lana mi sa rawng nga na sharawng nga a ni?
10 Nang gaw shi hpe sumri hte gyit nna nahtai htai shangun ai hte,
na a yi sun hkauna ni hpe masit shangun lu na a ni?
11 Shi a n-gun hpe nang kam nna na a li la ai amu
galaw shangun na myit mada lu na n ni?
12 Na a chyarang pa kaw na nsi naisi shinggyin la nna
shu la sai hpe dum hta wa bang da na matu shi hpe myit mada nga n ni?
13 U gawla-uk a singkaw ni kade sha lawan kahprap nga a hka!
Rai ti mung u kawp ni zawn pyen lu ai n rai.
14 U gawla-uk gaw shi a di ni hpe ga hta di nna;
ga nhpu gaw dai ni hpe shalum ya nga ai.
15 Lagaw hte dai ni hpe kabye agrawp kau na hte
matse labye dusat dai ni hpe kabye ga kau na hpe shi n tsang nga ai.
16 Dai udi ni gaw shi a n rai nga ai zawn shi galaw
nga ai, kaman be be hpa n seng ai zawn shi nawn da wu ai.
17 Dai gaw ngai shi hpe angawk shangun ai hte
shi hpe hpaji byeng-ya n jaw ai majaw rai nga ai.
18 Rai ti mung, shi kagat hpang wa yang,
gumra hte gumra jawn ai wa hpe mani asawng lu nga ai.
19 Dai zawn, Yoba e, gumra ni hpe n-gun grai ja shangun nna;
dai ni a singgung mun ni hpe nang shatut ya lu n ni?
20 Dinggam-yaw ni zawn shi a sharat ai nsen gaw masha ni hpe jahkrit kajawng shangun ai hte
shanhte hpe gumtawng shangun lu nit ni?
21 Shanhte gaw kadit hkan na ga hpe lahkut sharawng nga ai rai nna;
shanhte a n-gun mahkra hte majan de kanawng shang ma ai.
22 Shanhte gaw hkrit ai lachyum hpe n chye ma ai;
kaning re ai nhtu hte mung shanhte hpe nhtang kau dat lu ai n rai.
23 Shanhte a jawn masha ni laknak ni hpai hkrawk hkrak ma ai rai nna;
jan hta tu kabrim nga ma ai.
24 Myit kahtet ai hte gari ashun nga ai gumra ni shawng gat shingjawng ma ai rai nna,
pahtau dum dat ai shaloi, shanhte naw tsap nga lu ma ai n rai.
25 Pahtau dum dat shagu shanhte a nsen sharat nga ma ai;
shanhte garai n kahtep sa wa yang, hpyen majan sama rai nga ai hpe chye lu ma ai;
shing rai du salang ni jahtau garu hkang dat ai ga ni hpe shanhte na ma ai.
26 Langji gaw shi a singkaw ni hpe kahpyan nna dingda maga de
kaning rai pyen sa wa na lam nang kaw na sharin la nga a ni?
27 Langda gaw bum tsaw shara ni hkan
tsip tsip na matu na a hkang da ai ga hpe ala chye nga ma ni?
28 Shi gaw tsaw htum ai lunghtawn ntsa hta shi a nga shara shatai nna;
bum pungding masen ni hpe shi a shanu shara shatai nga ai.
29 Dai yang kaw nna, lama ma hpe htim sat sha na matu ni ai, tsan ai
shara hkan e mada yu nga ai.
30 Si mang grup grup hkan e langda ni hpawng nga ma ai;
langda hkalung ni mung asai lu ma ai. Ref 39:30: Mat 24:28; Luk 17:37.