38
Dai hpang dai Madu gaw Yoba hpe nbung laru kaw nna ga shaga wu ai.
Dai Madu
Nye a hpaji byeng-ya hpe na a myit n su ai lam hte
ga laban ni hte san ai nang gaw kadai wa rai nga n ni?
Ya chyawm gaw, ading jan rawt tsap ai hte
ngai nang hpe san ai ga san ni hpe htai u.
Mungkan ga hpe ngai hpan da ai shaloi, dai yang e nang nga nga a ni?
Nang grai chye ai rai yang, dai hte seng ai lam ngai hpe tsun dan e.
Dai gaw kade daram dam lada ang ai hpe kadai daw dan a ta?
De a ntsa e shadawn sumri hpe kadai gran da a ta?
Dai mahtai ni yawng hpe nang chye n ni?
Ginding aga hpe madi da ai shadaw ni hpe kaning di sharawt da a ta?
Mungkan ga a njut nlung hpe kadai jahkrat a ta?
Dai shani a jahpawt nhtoi htoi wa ai aten hta shagan ni rau sha mahkawn shakawn nna,
sumsing sha ni kabu gara jahtau garu ma ai.
 
Panglai gaw ginding aga a kan kata kaw nna kahpawk pru wa yang,
kadai wa dai chyinghka ni hpe la shingdang da nga a ta? Ref 38:8-11: Yer 5:22.
Ngai gaw panglai hpe sumwi hte ka-up da nna;
dai hpe nsin hta kayawp bang da nngai.
10 Ngai gaw panglai jarit ni hpe masat tawn da nna
dai hpe chyinghka htinggrang ni hte shingdu kaw nna makawp da nngai.
11 Ngai gaw dai hpe, ?Ndai kaw sha du, htawra kaw nna n lai lu! Ndai yang e na a n-gun kaba rawng ai hka leng ni sim mat lu na,? ngu nna tsun nngai.
12 Yoba e, nang gaw na a prat tup jahpawt manap hpe tut e
hkang da na ngu wu ni?
13 N hkru ai ni hpe shanhte a makoi gyem shara ni kaw nna jahtaw kau lu hkra,
ginding aga a jut shingnaw du hkra jahpawt nhtoi htoi leng shangun na nang hkang da nit ni?
14 Shani nhtoi gaw kawng ni hte kadit ni hpe
hpun palawng kahtap da ai zawn dan dawng shangun nga ai,
kagam ga ntsa e dazik dawk da ai hkang zawn asan sha rai nga ai.
15 Shani nhtoi gaw n hkru ai ni a matu nau wa htoi kabrim nga ai
shanhte galaw ai kashun kashe du daw sai hkaw amu hpe shingdang da lu nga ai.
 
16 Nang gaw sung ai panglai kata na hka hpawk de shang yu sani?
Nang gaw nammukdara htumpa a ntsa e hkawm yu sani?
17 Nang hpe kadai wa sin mak ai katsan ga hpe sin ai
chyinghka ni hpe madun yu sani?
18 Mungkan ga kade kaba nga ai hpe nang myit yu n ni?
Nang chye ai rai yang, ngai hpe tsun dan e.
 
19 Nhtoi gaw gara kaw na sa wa ai
shing n rai nsin a npawt kanang na rai nga ai hpe nang chye n ni?
20 Dai ni kade daram tsan ai de du nna
kaning rai bai nhtang du ai lam, nang madun dan lu n ni?
21 Mungkan ga hpe hpan da yang, nang asak grai kaba nga nit dai majaw
nang lu galaw na re, ngu ngai teng teng kam nngai.
 
22 Nang gaw ahkyen hte sin tawn da ai sut gawk
ni de sa chyai yu nit ni?
23 Ngai gaw dai ni hpe ru tsang hkrum ai aten ni a matu hte
majan gasat ai nhtoi ni a matu jin jin kyem da nngai.
24 Nang gaw jan pru lung wa ai shara de mung,
sinpraw nbung bung wa ai shara de mung du yu sani?
 
25 Marang hka lwi na matu hka hkawng hpe kadai htu nna,
mu ngoi ai nbung laru lam hpe kadai hpaw jasan a ni?
26 Kadai mung n nga ai shara hta kadai wa marang htu shangun a ta?
27 Tsingdu tsingman prut wa u ga, hkun hkraw nna
hpang gara ai lamu ga hpe kadai hka madit ya a ta?
28 Marang mung, numri mung kawa lu a ni?
29 Hka ge hte hkyen tawng a kanu gaw kadai rai nga a ni?
30 Hka gaw nlung tai mat nna
panglai hka man gaw hpa majaw ge mat a ni?
 
31 Nang gaw kru majan ni hpe shabawn da ai hte
Nhtoi Gintawng a shingkyit ni hpe kaw raw ya lu nga n ni? Ref 38:31: Yob 9:9; Amo 5:8.
32 Nang gaw shagan ni hpe ladaw hte ladaw woi shapraw lu ai hte
dingdung maga na shagan majaw kaba hte dingda maga na shagan majaw kaji ni hpe woi awn lu n ni?
33 Sumsing lamu ni hpe up hkang ai tara ni a lam hpe nang chye ai hte
dai ni hpe ga ntsa e akyu jashawn lu n ni?
 
34 Nang gaw sumwi ni hpe aming jaw jahtau tsun lu nna,
dai ni hpe marang hte nang hpe madi shangun lu nga n ni?
35 Myihprap gala na matu nang hkang dat ai rai yang,
dai gaw nang kaw sa nna, ?Shi hpe hpa karum la na rai ta?,? ngu nna tsun na ra ai.
36 Nila hka nu tung wa na rai yang, ibis c 38:36: Ibis: Shawng de Egutu mung hta nga ai u amyu mi rai nga ai; Nila hka tung wa ai hpe tsun ndau ai u re ngu, kam ma ai. ntsa malen u hpe kadai tsun a ta?
Marang htu hkrat na rai yang ula hpe kadai tsun a ta?
37 Sumwi ni hpe hti lu hkra mung,
ga nhpu ni gumdin nna
38 ga tawng ni ja ahkak mat yang dai ni a ntsa e marang ru shapraw dat lu hkra kadai wa hpaji rawng nga a ta?
 
39-40 Hkanghkyi ni shanhte a lungpu hku ni hta gyem makoi nna,
hkanghkyi lawng ni hta hpum nga ma ai shaloi,
nang gaw dai ni sha na lusha mu tam ai hte
kawsi kyet ai hkanghkyi hkalung ni hpe jahkru shakat lu n ni?
41 U hka ni kawsi nna nwan pyen nga yang mung,
u hka hkalung ni lusha a matu ngai kaw hpyi jahtau yang mung,
shanhte hpe kadai jaw sha a ta?