27
Yoba
1-2 Ngai hpe teng man rap ra ai tara n jaw hkraw ai hte nye a asak hpe ahkup ahka nga hkra byin shangun dat ai
dai ahkrung nga ai Chyahtum Chyalai N-gun Rawng Ai Karai Kasang hta ngai dagam let,
Karai Kasang ngai hpe nsoi nsa jaw ya nga dingsa,
nye a nten kaw na n hkru ai ga galoi mung tsun na nngai n rai,
nye a shinglet masu magaw ga galoi mung tsun na n rai.
Ngai gaw nanhte ding man nga myit dai ngu nna galoi mung tsun na nngai n rai;
Ngai si mat wa hkyen ai shani du hkra ngai hta mara n kap nga ai hpe myit jung nga na nngai.
Ding hpring nga na ngu ai nye a dakan ai lam hpe ngai galoi mung shayaw kau na n rai;
nye a myit asan sha rai nga li ai.
 
Ngai hpe ninghkap ai hte ngai hte nhtan shai hkat ai ni yawng hte gaw
n hkru ai ni hte n ding n man ai masha ni hpe zawn ari jaw hkrum na mara ai.
Karai Kasang gaw karai kata masha ni a asak hpe
hpyi la ai ahkying hta shanhte a matu hpa baw myit mada shara naw nga nga a ta?
Tsin-yam tsindam du ai shaloi, shanhte a hpyi jahtau ai nsen hpe Karai Kasang na ya na wu ni?
10 Shanhte jaw ya ai kabu pyaw lam hpe shanhte hkam la ang ma ai;
shanhte gaw shi hta dinggrin akyu hpyi ang ma ai.
 
11 Karai Kasang a daru magam n-gun kade galu kaba nga ai lam ngai nanhte hpe sharin ya na made ai;
Chyahtum Chyalai N-gun Rawng Ai Karai Kasang hpa baw shatawng shada maw mawn ai lam tsun shaleng dam made ga.
12 Rai ti mung, n rai law, hpang jahtum hta, nanhte nan dai lam mu manit dai;
dai rai nna hpa majaw dai zawn kaman lila ga shaga nga myit ni?
[Zohpa]
13 Ndai gaw tara n lang ai ni, kashun kashe du daw sai hkaw amu galaw ai masha ni hpe
Chyahtum Chyalai N-gun Rawng Ai Karai Kasang gara hku ari jaw ai lam rai nga ai.
14 Shanhte gaw shadang sha law law lu ma ti mung
shanhte yawng gaw majan e sat kau hkrum na mara ai;
shanhte a kashu kasha ni gaw galoi mung hkru sha na ma ai n rai.
15 Asak naw hkrung nga ai ni mung ana ahkya hte si htum mat na mara ai;
shanhte a gaida gaina ni pyi dai ni a si hkrung si htan lam a majaw hkrap ngu hkrap ngoi lu na ma ai n rai.
16 N hkru ai masha ni gaw n dang hti hkra law ai gumhpraw lu mai nga ma ai;
kadai mung ra ai hta jan hkra hpun palawng ni lu mai ma ai.
17 rai ti mung mai kaja ai masha nkau mi hpun palawng lu nna;
myit ding ai masha nkau mi gumhpraw lu na mara ai.
18 N hkru ai ni gaw gindigram tsip hte bung ai nta ni hpe gap nna;
dai gaw sun sin ai mayam wa a sun zawn rai na ra ai.
19 Sut su ai ni gaw hpang jahtum na aten hta shanhte hprang wa yang,
shanhte a sut gan n nga mat ai hpe mu jang, shanhte si mat na mara ai.
20 Hkrit kajawng ai gaw hka hpungtun zawn rawt hta wa na ra ai;
shana na nbung gaw shanhte hpe bung ahpawt kau na ra ai;
21 sinpraw nbung gaw shanhte hpe shanhte a dum nta ni kaw nna ye magawn mat wa nhtawm,
22 shanhte gaw kaja htum ai hku hprawng gale mayu ti mung
dai gaw matsan dum ai lam n nga ai sha, shanhte hpe shapoi kau na mara ai.
23 Dai nbung gaw shanhte hprawng kagat mat wa ai de hkan ngoi nang nna,
jahten shaza kau lu ai n-gun hte shanhte hpe jahkrit shama nga ai.