24
1 Karai Kasang gaw tara jeyang na matu mung,
shi hpe daw jau ai ni a matu teng man rap ra ai nhtoi hpe mung hpa majaw n masat da ya a ni?
2 Masha ni gaw lamu ga grau jat la lu hkra nga, ga jarit nlung ni hpe htawt sit ma ai;
shanhte gaw sagu ni hpe lagu la nhtawm shanhte a yam nga uhpung ni hte rau rem tawn da ma ai.
3 Shanhte gaw chyahkrai ma ni madu tawn ai lawze ni hpe la kau ya ma ai;
gaida jan a utang hpe hka bai wa lu ai aten du hkra la kau ya nga ma ai.
4 Shanhte gaw matsan mayan masha ni lu la na ahkaw ahkang hpe pat shingdang ya nhtawm,
ra kadawn ai ni hpe hprawng makoi na matu shadut ma ai.
5 Dai rai nna, matsan mayan ni gaw zai ai lawze ni zawn hkun hkraw ai nam mali kata lusha tam ma ai;
shanhte a kashu kasha ni a matu lusha hpe mu tam la lu ma ai.
6 Shanhte n madu ai yi hkauna na nsi naisi ni hpe shu la ma ai;
tara n lang ai masha ni a sabyi sun ni hta sabyi si gut la ma ai.
7 Shanhte gaw shana e hpun nba hpa mung n hpun ai sha yup ma ai;
shanhte gaw nshung ta e hkum singgu krin rai ma ai.
8 Shanhte gaw bum ga e htu ai marang hte nyaw nna;
shingbyi shara lunghkrung makau hkan e shanhte anin machyu nga ma ai.
9 N hkru ai masha ni gaw kawa n lu ai ma kaji ni hpe mayam shatai nhtawm,
matsan mayan wa a ma ni hpe hka wa shangun nga ma ai.
10 Rai ti mung matsan mayan masha wa gaw ma ni hpe makawp maga la na matu singgu krin pru sa wa nga ai;
shanhte gaw hkaulan mam shu la ai aten hta kawsi nga ma ai.
11 Shanhte gaw sau a matu tsanlun, sabyi ntsin a matu sabyi si ni hpe shup ti mung,
shanhte nan hpang gara nga ma ai.
12 Mare ni hta hkala nba hkrum ai ni hte si wa magang ai ni jahtau nga ma ti mung;
Karai Kasang gaw shanhte a hpyi jahtau ai ga hpe hpa n nawn ya wu ai.
13 Dai masha ni gaw nhtoi hpe ningdang ai ni rai nna;
de a lam shanhte n chye ma ai, de a lam woi ai hku shanhte n hkan ma ai.
14 Masha sat ai wa gaw nhtoi htoi jang rawt nna,
matsan mayan ni hpe sat na nga,
pru sa wa ai, shi gaw shana e hkan lagu hkawm nga ai.
15 Numshaw ai wa gaw ningrim rim wa na hpe ala nga ai;
kadai mung shi hpe n mu lu mu ga nga, shi a myi man hpe magap da wu ai.
16 Lagu lagut ni gaw shana e nta kata de hpya shang ma ai;
shanhte gaw shana e mahtang dai nhtoi hpe yen nga ma ai.
17 Shanhte gaw shani nhtoi hpe hkrit ma ai;
rai ti mung nsin chyawm gaw shanhte a matu hkrit hpa lam hpa mung n nga nga malu ai.
[Zohpa] b 24:17:\xq Zohpa: Ndai Zohpa mying gaw chyum ga hta n rawng ai, rai ti mung ndai ga mahtang shi hpe sha-ang nna tsun ai ga rai nga ai.\x*
18 Ndai n hkru ai masha wa gaw mawru hka e agre shayawng ai zawn hkrum nga ai;
shi madu da ai lamu ga mung Karai Kasang a dagam dala hkrum nga ai;
shi gaw shi a sabyi sun ni de galoi mung amu sa galaw lu sana n rai.
19 Hkyen gaw kahtet kang ai hte jan gri ai aten hta hkoi mat ai zawn;
yubak kap ai wa mung asak hkrung nga ai mungkan ga kaw nna mat mat nga ai.
20 Ya pyi, shi a kanu shi hpe dum ai n rai;
shanhte gaw byet e sha kau hkrum nna agrawp daw mat ai hpun zawn hten za mat nga ma ai.
21 Shanhte gaw gaida jan ni hpe n karum ai majaw mung,
maudung num ni hpe matsan n chye dum ai majaw mung dai zawn byin nga ai.
22 Karai Kasang gaw shi a n-gun atsam hte chyalai n-gun rawng ai gumshem magam wa hpe shamyit kau nga ai;
Karai Kasang galaw ai amu a majaw n hkru ai masha ni si mat nga ai.
23 Karai Kasang gaw shanhte hpe shim lum hkra nga shangun nga ai;
rai ti mung shanhte hpe aten shagu hkan yu nga ai.
24 N hkru ai wa gaw hkring mi sha ngamu ngamai nga ai;
rai ti mung, loi hkring mi rai jang, shanhte gaw tsingdu zawn nyip mat nga ai;
dan kau ai hkainu hpun zawn tai mat na mara ai.
25 Ndai hku she re law, nga nna kadai ningdang lu na rai ta?
Nye a ga ni gaw n teng n man nga ai nga nna kadai sakse madun lu na rai ta?