2
1 Ya sumsing sha ni dai Madu a man de sa shadan dan na nhtoi bai du jang, Satan mung shanhte a lapran e hkan lawm nang nga ai.
2 Dai Madu gaw shi hpe, ?Nang kade nna du pru n ta?,? ngu nna san wu ai.
Satan gaw, ?Wo de, le de kahkrang hkawm let ga ntsa e wam hkawm nngai,? ngu nna htan wu ai.
3 Dai Madu gaw, ?Nang gaw nye a shangun ma Yoba hpe matsing da wu ni? Shi gaw kam sham nna mai kaja ai wa rai nhtawm shi zawn re ai mi, ginding aga ntsa e kadai n nga nga ai. Shi gaw ngai hpe nawku nna sadi sahka hte n hkru n hkra ai amu hpa hpe mung n galaw nga ai. Nang gaw mara hpa mung n nga ai shi hpe jahten kau shangun na matu ngai hpe hkalem nga ndai, rai ti mung Yoba chyawm gaw dinggrin naw kam sham nga ai wa rai nga ai,? ngu nna tsun wu ai.
4 Satan gaw, ?Masha gaw asak hkrung nga lu na matu lam shagu hpe asum hkam shagawm kau na rai nga ai.
5 Rai ti mung, ya chyawm gaw shi a hkum shan hpe nang machyi shangun ai ngu ga-shi gaw nang hpe na a man e nan dagam kau na ra ai!,? ngu nna htang tsun wu ai.
6 Dai rai nna, dai Madu gaw Satan hpe, ?Rai sa, shi gaw na a lata hta rai nga ai; rai ti mung nang shi hpe sat kau lu na ndai n rai,? ngu nna tsun wu ai.
7 Dai hpang Satan gaw dai Madu a man kaw nna pru mat wa nhtawm Yoba a hkum ting hta krwi jap tu ahpra shangun wu ai.
8 Yoba gaw Shi a krwi jap ni hpe ahkut kau na nga, di chyen langai mi la nna shanut sumpum makau e sa dung nga ai.
9 Shi a madu jan gaw shi hpe, ?Nang gaw dinggrin naw kam sham nga ai n rai ni? Karai Kasang hpe nang hpa majaw n matsa kau ai hte n si mat n ni?,? ngu nna tsun wu ai.
10 Yoba gaw, ?Nang gaw ga laban shaga nga n hka! Karai Kasang anhte hpe arai kaja lama ma jaw ai shaloi dai hpe anhte hkam la chye ga ai; shi anhte hpe ru tsang jahkrum ai shaloi anhte kaning rai aput angun lu na rai ga ta?,? ngu nna htan wu ai. Dai rai nna ndai nni nkri yawng mayawng hkrum sha tim pyi, Yoba gaw Karai Kasang hpe ninghkap na ga hpa mung n tsun nga ai.
11 Yoba a manang masum hte gaw Teman mare kaw nna Elihpaza, Shua mung na Bildad, Nama mung na Zohpa ni rai ma ai. Yoba gaw kade wa nni nkri hkrum sha nga sanu ai lam shanhte na ma yang, shanhte shi kaw sa nna shalan shabran na lam daw dan da ma ai.
12 Shanhte gaw tsan tsan kaw nna Yoba hpe mu mada ti mung shi hpe n chye yu matsing nga ma ai. Shanhte mu ai shaloi, hkrap ngu hkrap ngoi hpang wa nhtawm yawn hkyen ai hte shanhte a hpun palawng ni hpe gang je kau nna, lamu de ga nhpu kabai shalun ai hte tinang a baw ntsa e hkrat bun shangun ma ai.
13 Dai hpang shi hkrum sha nga ai nni nkri kade kaba nga ai hpe shanhte mu ma ai majaw, shanhte gaw dai yang na ga ntsa e shi hte rau sanit ya sanit na tup ga hkaw mi mung n shaga ai sha rau dung nga ma ai.