17
Nye asak a jahtum aten gaw ni wa magang nga sai. Ngai gaw nsa sa yak nga nngai;
lup sung hku hta jan nna nye a matu hpa mung ngam nga ai n rai.
Masha shagu ngai hpe kade daram ahkup ahka nga hkra asawng asang di mi ai hpe ngai azi yu nngai.
Karai Kasang e, ngai gaw ding man nga nngai majaw, nye a ga hpe hkap la ya e.
Ngai tsun ai ga hpe madi shadaw ya na masha langai mi mung n nga nga ai.
Nang gaw sumru dinglik yu na shanhte a myit nyan hpe pat kau ya nga ndai;
ya chyawm gaw nye a ntsa e shanhte a awng padang hte hkum ka-up shangun nga u law.
Moi moi na ga shagawp hta masha langai mi gumhpraw a majaw shi a manang wa hpe gumle gumlau di nga ai,
de a majaw shi a kashu kasha ni nni nkri hkam sha ma ai.
Ya chyawm gaw, ngai hpe ninghkap na nga, masha ni gaw dai ga shagawp hpe lang ma ai;
shanhte gaw nye a myi man hpe mayen sa mahtaw bun ma ai.
Nye a yawn hkyen ai gaw ngai hpe ganoi noi myi n mu shangun kau nga ai;
nye a lata lahpum hte lagaw ni shingnip shingna zawn hpa nga li ai.
Myit malang wa na matu tsun hkrum ai ni mau kajawng mat ma ai;
shanhte yawng gaw karai kata ai hku ngai hpe daw dan ma ai.
Hkungga lara wa na matu tsun hkrum ai ni gaw
shanhte ding man nga ma ai hpe grau grau nna chye na wa ma ai.
10 Rai ti mung shanhte yawng nye a man e sa tsap ai rai yang,
shanhte hta na langai mi pyi hpaji rawng nga ai hpe ngai n mu nngai.
 
11 Nye a nhtoi ni lai mat wa sai; nye a yaw shada ai lam ni mung hkrat sum mat sai;
nye a myit mada shara htum mat sai.
12 Rai ti mung, shana gaw shani nhtoi rai nga ai nga nna nye a manang ni tsun ma ai;
nhtoi gaw ni nga ai nga nna tsun ma ai,
rai ti mung, ngai chyawm gaw chyip mak re ai nsin hta ngai naw rawng nga nngai hpe chye nngai.
13 Nye a myit mada shara gaw katsan ga sha rai nga ai,
dai nsin shara hta ngai yup kaleng taw nga na nngai.
14 Ngai gaw lup sung hku hpe nye kawa ngu nna shaga na nngai;
ngai hpe sha ai byet ni hpe
nye kanu, nye kajan ni ngu nna shaga na nngai.
15 Nye a myit mada shara kanang nga nga a ta?
Dai hpe kadai mu lu a ni?
16 Katsan ga de ngai yu wa ai shaloi,
myit mada shara gaw ngai hte rau hkan yu wa ai n rai.