16
Yoba
1-2 Shawng de dai zawn nga ai ga ni hpe ngai na yu se ai;
nang shalan shabran ai gaw nni nkri hkrai rai nga ai.
Nang gaw galoi mung ashaga nga na ngu nga n ni?
Nang gaw ningdim dat na ga tut nawng lu n ni?
Nang gaw nye a shara hta nga nna ngai mung na a shara hta nga ai rai yang,
nang shaga lu ai lam shagu hpe ngai shaga lu nngai.
Ngai gaw hpaji hku nna nye a baw hpe ngai kanga lu nngai;
ga mawru hte nang hpe marit si shangun nga lu ai.
Ngai mahtang hpaji ga hte nang hpe n-gun atsam jaw lu nngai;
nang hpe shalan shabran na matu ashaga nga na nngai.
 
Rai ti mung, ngai hpa n tsun ai sha karum na nngai;
atsin zim rai nga ai gaw nye a nchyi nmu hpe shazim ya lu nga ai n rai.
Karai Kasang e, nang ngai hpe hki ba shangun nit dai;
nang gaw nye a dinghku na ni hpe sat kau nit dai.
Nang gaw ngai hpe rim la nit dai, nang gaw nye a gumlau wa rai nga ndai.
Ngai gaw hpyi hte nra ni sha rai nga nngai.
masha ni gaw ngai hpe mara a sakse hku mu nga ma ai.
 
Masin kahtet ai a majaw, Karai Kasang gaw ngai hpe ashep ashin di nga ai;
shi gaw ngai hpe n ju n dawng ai myit hte azi yu nga ai.
10 Masha ni ngai hpe yu ashu ma ai;
shanhte ngai hpe wang shinggrup da let, nye a myi man bye ya ma ai.
11 Karai Kasang gaw ngai hpe n hkru ai masha ni a lata de ap kau ni ai.
12 Ngai gaw ngwi pyaw sim sa ai hte nga nga nngai,
rai ti mung Karai Kasang gaw nye du magra jum da let
ngai hpe adup ai hte agrawp mani kau nga sai.
Karai Kasang gaw ngai hpe shingte shaman shara shatai na matu lang ai rai nna,
13 grup grup de nga ai ni ngai hpe pala gap bun ma ai;
nye hkum hta pala ni jung nna nma shakap ya nga ai;
shing rai tim, shi gaw matsan yu dum ai myit madun dan ai n rai.
14 Shi gaw ngai hpe nma bai jahpye ya ya rai nga ai;
shi gaw ngai hpe n ju n dawng ai hte mana bu ai hpyenla langai zawn gasat nga ai.
15 Lachyit sumpan hte galaw ai hpun nba ni bu hpun let ngai yawn madai nngai;
ndai yang e, sum kadawng ai myi man hte ga nhpu hta dung nga nngai.
16 Nye a myi man hkyeng nga nna, myi ni akawng let de a ntsa e
shingnip zawn wang rai mat hkra byin ai majaw, ngai jahtau hkrap nngai,
17 rai ti mung, ngai gaw kashun kashe du daw sai hkaw ai amu a mara lu nngai n rai;
Karai Kasang kaw hpyi ai nye a akyu hpyi ga gaw san seng nga li ai.
 
18 O ginding aga e, ngai galaw ai shut hpyit amu hpe hkum makoi da et!
Teng man rap ra ai tara a matu nye a jahtau tsun ai nsen hpe hkum jasim kau nga u law!
19 Nye a matu tsap ya na hte nye a maga de nga ya na
marai langai ngai sumsing lamu e nga nga ai. Ref 16:19: Yob 19:25.
20 Nye a manang ni ngai hpe asawng asang di ma ai;
Karai Kasang a man e nye a myi prwi pru nga ai.
21 Manang wa a matu marai mi hpyi nem ya ai zawn nye a matu mung Karai Kasang a man e,
hpyi nem ya na marai langai ngai hpe ngai ra nngai.
22 Ya chyawm gaw, nye a shaning ni lai wa magang nga sai;
ngai gaw bai n mai nhtang wa ai lam de hkawm nga nngai.