13
1-2 Nang tsun ai lam magup hpe shawng de ngai na yu se ai.
Dai lam yawng mayawng hpe ngai chye na nngai; nang dang lu ai made galaw ai amu hpe ngai chye nngai.
Ngai gaw nanhte hta lawu grit nga nngai n rai.
3 Rai ti mung, nye a ndang kalang ai gaw nanhte hte n rai, Karai Kasang hte she rai nga ai;
shi hte sha nye a amu dangrang mayu nngai.
4 Nanhte gaw masu ga ni hte nanhte a angawk angak lam hpe htinggrum da nga myit dai;
nanhte gaw kadai hpe mung n chye tsi shamai ya lu ai sara wun ni zawn rai nga myit dai.
5 Hpa mung n shaga myit yang gaw, nanhte hpaji rawng nga myit dai ngu nna marai langai ngai myit nawn la mai ang nga ai!
6 Nye a amu hpe tsun nga yang, madat ya mi.
7 Nanhte hpa majaw masu hkalem nga myit ni?
Nanhte tsun ai masu hkalem ga ni gaw Karai Kasang a matu akyu nga ai ngu myit nawn da mu ni?
8 Nanhte gaw shi hpe ninghkap mayu myit ni?
Shi a amu hpe tara rung e nanhte dangrang na myit ni?
9 Karai Kasang gaw nanhte hpe ni dik ai hku mada yu myit yang, kaja ai arai hpe shi mu tam na rai wu ni?
Masha hpe nanhte angawk angak di lu myit dai zawn Karai Kasang hpe mung galaw lu na zawn nawn da myit ni?
10 Nanhte a myi man lata ai amu mayun makoi da tim pyi,
shi nanhte hpe daru na ra ai,
11 shi a daru magam n-gun gaw hkrit hpa amu hte nanhte hpe jahpring ya na ra ai.
12 Nanhte a ga shagawp ni gaw wan dap zawn akyu n rawng nga ai;
nanhte dangrang hkat ai ga gaw ga kagam zawn kya nga ai.
13 Asim sha nga mu, ga shaga na ahkang ngai hpe jaw mi,
ngai hta hpa byin yang mung byin wa nu ga.
14 Nye a asak dan na ngai jin jin rai nga nngai.
15 Karai kasang ngai hpe sat ai rai yang, myit mada shara mahkra n nga mat na n rai ni?
ngai gaw nye a amu hpe shi a man e tsun dan na nngai.
16 N hkru ai wa gaw Karai Kasang a man de n shang gwi nga ai,
dai hku galaw ai rai yang, nye a nden ja ai gaw ngai hpe hkye hkrang la na ra ai.
17 Ya chyawm gaw ngai tsun shaleng ai ga hpe madat mu.
18 Ngai ding hpring nga nngai hpe ngai chye ai majaw
nye a amu hpe tsun shaleng na shajin da nga nngai.
19 Karai Kasang e, ngai hpe mara shagun na, nang du sa n ni?
Dai hku galaw ai rai yang, ngai atsin sha nga nna si hkam na nngai.
20 Lam lahkawng a matu ngai hpyi nngai, dai hpe myit hkrum ya e law,
shaloi, nang kaw nna makoi shakut nga na nngai n rai;
21 ngai hpe ari jaw ai mung dawm kau u; ngai hpe hkrit hpa amu hte hkum jahkrit e.
22 O Karai Kasang e, ga shawng shaga u, ngai htan ya na nngai.
Shing n rai yang ngai tsun n-ga, nang ngai hpe htan ya e.
23 Nye a yubak ni gaw hpa wa rai ta? Ngai galaw shut kau sai amu ni hpa wa rai ta?
Ngai hkrum ai ru hka amu ni gaw hpa rai ta?
24 Nang gaw ngai hpe hpa majaw koi yen nga n ta?
Nang gaw ngai hpe gumlau hpyen langai zawn hpa majaw di n ta?
25 Ngai hpe hkan jahkrit shama na matu nang shakut nga n ni? ngai gaw hpa mung n rai, namlap langai sha rai nga nngai;
nang gaw hkraw mat ai yihku daw hpe gasat nga ndai.
26 Brang ram prat e ngai galaw shut kau sai amu a majaw,
nang ngai hpe ahkup ahka nga ai nni nkri mara hkam sha shangun nga ndai.
27 Nang gaw nye a lagaw hpe hpri sumri hte gyit hkang ya nna;
ngai shamu shamawt ai lam shagu hpe sin yu nga ndai,
nye a lagaw hkang ni hpe pyi nang jep yu nga ndai. Ref 13:27: Yob 33:11.
28 Dai lam a majaw, ngai gaw yat tsam mat ai hpun zawn,
manut e sha jahten kau ai ntsa palawng zawn ngai mahtang hten mat nngai.