11
Zohpa
1-2 Ndai lachyum n pru ai ga yawng hpe kadai htai na rai ta?
Ga grai shaga ai gaw nang hpe jaw nga ai ngu, madun lu a ni?
Yoba e, nang hpe anhte n htan lu ai ngu nna nang myit nawn da wu ni?
Nang ashu tsun ai ga ni gaw anhte hpe tsun shangap kau lu na rai ni?
Nang tsun ai ga gaw teng man nga ai nga nna nang tsun ndai;
nang gaw Karai Kasang a man e san seng nga ndai nga nna nang tsun ndai.
Karai Kasang nang hpe htan ya na ngai kade sha ra sharawng nga a hka!
Hpaji byeng-ya chye lu na matu lam maga law law nga ai mung,
shinggyim masha a machye machyang a matu nau sung ai amu ni nga nga ai lam mung, shi nang hpe tsun dan na wu ai.
Nang hkam la ging ai mara hta shayawm nna, Karai Kasang nang hpe ari jaw nga ai.
 
Karai Kasang a galu kaba ai hte daru magam n-gun a
masat jarit ni hpe nang mu sawk lu n ni?
Sumsing lamu gaw Karai Kasang a matu masat tawn da ai lam n nga ai;
dai kade wa dam ai gaw anhte dang dep lu ai n rai.
Karai Kasang gaw katsan ga hpe chye ai,
rai ti mung dai hpe nang chye ai n rai.
Karai Kasang a galu kaba ai lam gaw ginding aga hta grau dam nna
panglai hta grau dam lada nga ai.
10 Karai Kasang nang hpe rim la nna tara rung de woi shadu ai rai yang,
shi hpe kadai hkum da lu a ta?
11 Karai Kasang gaw kaning re ai masha ni manu n dan nga ai hpe chye nga ai;
shi gaw shanhte galaw ai n hkru ai amu yawng mayawng hpe mu nga ai.
12 Lawze nhprang ni hpe hku shani la lu ai shaloi,
myit n su ai masha ni hpaji rawng wa na mara ai.
 
13 Yoba e, na a myit masin hpe shading sharai u; Karai Kasang hpang de na a lata ladawn u.
14 N hkru ai amu hte shut hpyit ai amu ni hpe na a nta kaw nna yeng seng kau u.
15 dai hpang, mungkan de myi man bai yawng let, ngang ngang tsap nna nden marai rawng nga u.
16 Lwi mat wa ai mawru hka zawn, na a ru yak tsin-yam tsindam mahkra hpe nang malap kau nna,
dai hpe galoi mung bai dum lu na ndai n rai.
17 Na a asak gaw jan pungding hta grau htoi na ra ai;
asak a nsin sin htum ai ahkying aten ni pyi jahpawt manap zawn htoi wa na ra ai.
18 Nang gaw myit mada shara hpring hkra lu la nna shim lum ai hte nga lu na ndai;
Karai Kasang gaw nang hpe makawp maga nna nang hpe ban sa lam jaw ya na ra ai.
19 Na a gumlau hpyen ni hpe nang hkrit ra na ndai n rai;
masha law law ni mung nang kaw karum sa hpyi na mara ai.
20 Rai ti mung n hkru ai ni gaw myit htum ai hte hkan gawan yu na mara ai,
shanhte a hprawng lawt shara mu tam na n rai.
Shanhte a myit mada shara langai gaw si hkrung si htan du sa wa na lam rai nga ai.