3
1 Yu mu Karai Kasang gaw anhte hpe gade wa tsaw ra nga a hka! Shi a tsaw ra myit gaw grai kaba la nga ai rai nna anhte hpe Karai Kasang a kashu kasha ni ngu nna shamying mi ai hte maren kaja wa mung anhte Karai Kasang a kashu kasha ni rai nga ga ai. Rai ti mung mungkan ga gaw Karai Kasang hpe n chye wu ai majaw anhte hpe mung n chye mi ai. Ref 3:1: Yhn 3:16; 16:3; Rom 8:16.*
2 Tsaw ra ai ni e, anhte ya e Karai Kasang a kashu kasha ni rai nga ga ai, rai tim hpang de anhte hpa mi tai na dan leng hkra garai n chye lu ga ai: rai ti mung Hkristu dan pru ai shaloi anhte shi hte bung na ga ai, hpa majaw nga yang shi nan teng teng rai nga ai hpe anhte mu lu na gaw ai.
3 Hkristu hta dai myit mada shara lu ai masha shagu gaw, Hkristu nan chyoi pra nga ai hte maren tinang hkum hpe mung shachyoi shapra da nga ai.
4 Yubak galaw ai wa kadai rai ti mung, Karai Kasang a tara tawt lai ai amu mung galaw nga ai, hpa majaw nga yang, yubak gaw tara tawt lai ai amu rai nga ai.
5 Hkristu gaw shinggyim masha ni a yubak mara ni hpe la kau na matu dan pru nga ai hpe nanhte chye myit dai: shi hta e yubak n rawng nga ai.Ref 3:5: Esa 53:5-6,11; 2Ko 5:21; 1Tm 1:15; 1Pe 2:22,29.*
6 Dai rai nna Hkristu hta e nga ai wa kadai rai ti mung, matut nna yubak n galaw nga ai, yubak naw galaw shanang ai wa kadai rai ti mung, shi hpe n mu n chye wu ai.
7 Shu sha ni e, kadai mung nanhte hpe lam n shadam myit ga; Hkristu gaw ding hpring nga ai hte maren, ding hpring ai amu galaw ai wa kadai rai ti mung ding hpring nga ai.
8 Yubak sha naw agalaw shanang nga ai wa kadai rai ti mung, Nat hte seng ai wa rai nga ai, hpa majaw nga yang, Nat gaw shawng npawt kaw nna yubak galaw nu ai. Dai rai nna Nat a amu bungli hpe sharun jahten kau na matu, Karai Kasang a Kasha gaw paw pru wa sai.
9 Karai Kasang a kashu kasha tai sai wa gaw matut nna yubak n galaw ai, hpa majaw nga yang, dai wa hta Karai Kasang a nli ngu ai asak jaw lu ai atsam rawng nga ai. Shi gaw Karai Kasang a kashu kasha rai nga ai majaw, yubak n galaw shanang lu ai.
10 Dai gaw Karai Kasang a kashu kasha ni hte, Nat a kashu kasha ni a adan aleng shai hkat ai lam rai nga ai. Kadai rai ti mung, ding hpring ai amu n galaw ai hte shing n rai, shi a kahpu kanau hpe n tsaw n ra ai wa gaw Karai Kasang a kashu kasha n rai nga ai.
11 Shawng npawt kaw nna nanhte na yu ai ga matsun gaw, ?Nanhte shada da tsaw ra nga mu,? nga ai mungga nan rai nga ai. Ref 3:11: 1Yh 1:5; 4:7,21; Yhn 13:34; 15:12.*
12 Anhte gaw Ka-in zawn n mai rai ga ai. Shi gaw Nat a maga na masha tai nna shi a kanau Abela hpe sat kau nu ai. Ka-in gaw Abela hpe hpa majaw sat kau a ta?. Shi nan galaw ai amu bungli ni shut nga ai. Shi a kanau galaw ai lam ni mahtang jaw nga ai majaw rai nga ai.Ref 3:12: Nin 4:4-8; Heb 11:4; Yud 11.*
13 Dai rai nna, hpu nau ni e, mungkan masha ni nanhte hpe n dawng n yawt myit yang, hkum mau nga myit.
14 Anhte hpu nau ni hpe tsaw ra nga ga ai majaw, anhte si ai kaw nna hkrung ai de kawt lu sagaw ai hpe anhte chye ga ai. Kahpu kanau ni hpe n tsaw ra ai wa gaw dai si ai a n-gun atsam kata e sha anga nga ai wa rai nga ai.
15 Shi a kahpu kanau wa hpe n dawng n yawt ai wa kadai rai ti mung, masha hpe sat kau ai wa rai nga ai.Masha hpe sat kau ai wa gaw shi hta htani htana asak n lu la ai hpe nanhte chye nga myit dai.
16 Hkristu gaw nanhte a matu mara shi a asak nawng kau wu ai majaw, tsaw ra ai myit majing ngu ai gaw hpa re ai lam anhte chye nga ga ai. Dai re ai majaw, anhte mung hpu nau ni a matu mara anhte a asak nawng kau na sut nga ai.
17 Sut gan lu su ai wa rai nga da nhtawm, shi a hpu nau wa matsan mayan ra kadawn nga ai hpe mu ninglen, shi a matsan dum ai myit masin hpe pat kau wu yang gaw, shi gaw Karai Kasang hpe tsaw ra ai ngu nna kaning rai tsun lu na a ta?
18 Nye a shu sha ni e, anhte hpe tsaw ra ai lam gaw ga hte, n-gup shinglet hte sha n rai, amu bungli hta madun dan ai teng man tsaw ra myit rai ra nga ai.
19 Shing rai ndai hku nna anhte gaw dai teng man ai lam hpe hkan sa ai ni rai nga ga ai hpe chye lu na rai nga ai. Karai Kasang a man e mung myit mu myit hkut ai hku nna nga lu ai ahkang lu la na raga ai.
20 Anhte a htauli htaula myit gaw anhte hpe jahpoi asawng kau ai hkrum ga yang gaw, Karai Kasang gaw anhte a htauli htaula myit hta grau kaba nga ai lam anhte chye ga ai hta n ga, shi gaw nga manga hpe chye chyang ai wa rai nga ai hpe mung anhte chye ga ai.
21 Dai rai nna tsaw ra ai ni e, anhte a htauli htaula myit anhte hpe jahpoi asawng mara shagun ai lam n galaw ai rai yang gaw anhte Karai Kasang a man e nden marai hte shang lu na ga ai.
22 Anhte gaw Karai Kasang a hkang da ai ga ni hpe madat mara nna, shi a sharawng awng ai amu hpe galaw ga ai majaw, anhte hpyi ai lam shagu hpe anhte lu la ga ai.
23 Shi anhte hpe hkang da ai lam gaw, anhte shi a kasha Yesu Hkristu hpe kam sham nna Hkristu anhte hpe hkang da mi ai hte maren shada da tsaw ra nga na lam rai nga ai.Ref 3:23: 1Yh 2:8-10; Yhn 15:12; 17:3; 1Ht 4:9; 1Pe 4:8.*
24 Karai Kasang a hkang da ai ga hpe hkan shatup ai wa kadai rai ti mung, Karai Kasang hte langai sha rai nga ai rai nna, Karai Kasang mung dai wa hte langai sha rai nna nga nga ai. Shing rai byin ai lam hpe Karai Kasang jaw ya ai dai Wenyi a jaw e anhte chye nga ga ai.