61
1 Tsaw Htum ai dai Madu gaw ngai hpe shi a Wenyi hte jahpring ya ni ai.
Matsan mayan ni hpang de kabu gara shiga gun sa na matu mung,
Myit daw mat sai ni hpe shamai shatsai ya na matu mung,
Bawng dung ai ni hpe raw dat na matu mung,
Htawng hta shareng da hkrum ai ni hpe shalawt dat na matu mung,
Shi ngai hpe lata la nna shangun dat nu ai. Ref 61:1: Mat 11:5; Luk 7:22. Ref 61:1-2: Luk 4:18-19.
2 Dai Madu gaw shi a amyu masha ni hpe
Hkye hkrang la nna shanhte a gumlau hpyen ni hpe dang kau na aten du sai lam
Tsun shana na matu,
Shi ngai hpe shangun dat ni ai.
Shi gaw sharung shayawt ai ni yawng hpe shalan shabran na matu
3 Ziun hta sharung shayawt nga ai ni hpe yawn madai na malai
Kabu gara ai hte kabu pyaw ai lam,
Yawn hkyen ai a malai mahkawn shakawn na lam jaw ya na matu shangun dat ni ai.
Shanhte gaw dai Madu shi nan hkai da sai
Hpun ni zawn tai na mara ai.
Shanhte gaw ding man ai amu yawng mayawng hpe galaw na mara ai,
Karai Kasang gaw shi galaw sai amu ni a majaw shakawn kungdawn ai hkrum na ra ai.
4 Shanhte gaw moi chyaloi nhkoi kaw nna hten run nga sai mare ni hpe bai gaw gap da na mara ai.
5 Nye a amyu masha ni e, maigan amyu masha ni nang hpe daw jau na mara ai.
Shanhte gaw na a sagu hpung ni hpe bau rem nna
Na a mung hta hkauna galaw ai hte sabyi sun ni hpe yu lajang na mara ai.
6 Nang gaw dai Madu a hkinjawng ni hte
Anhte a Karai Kasang a shangun ma ni hku gumhkawng na rai ndai.
Nang gaw masha amyu baw ni a sut gan hta kabu gara wa nna
Dai gaw na a sut gan tai wa ai hte gumrawng wa na ndai.
7 Na a kaya kahpa hte arawng hpoi hkrum ai gaw htum mat nga sai.
Nang gaw na a mungdan hta nan nga lu na rai ndai,
Na a sut gan gaw htam lahkawng law jat wa nna;
Na a kabu gara ai gaw htani htana agrin nga na ra ai.
8 Dai Madu gaw,
?Ngai gaw teng man rap ra ai tara hpe tsaw ra nngai, ngai gaw dip gamyet sha ai amu hte ru hka amu hpe n dawng nngai.
Ngai gaw nye a amyu masha ni hpe kangka ai hte kumhpa shagrau na nngai.
Shanhte hte htani htana ga shaka tawn da na nngai.
9 Shanhte gaw masha amyu baw ni a lapran e gumhkawng na mara ai;
Shanhte hpe mu ai masha shagu hte gaw shaman chyeju hkam la nga sai amyu masha ni rai nga masai hpe chye wa na mara ai,? ngu nna tsun ai.
10 Dai Madu galaw sai amu a majaw Yerusalem gaw kabu gara nga ai.
Yerusalem gaw hkungran poi a matu mawn sumli da ai num nnan hte bung nga ai.
Karai Kasang gaw hkye hkrang la ai hte awng dang ai lam hte hpun da nga nu ai.
11 Nli tum ni kaw na maku rawt wa ai hte tu kaba wa ai hte maren,
dai Tsaw Htum ai dai Madu gaw shi a amyu masha ni hpe hkye hkrang la na ra ai,
Masha amyu baw ni yawng shi hpe shakawn kungdawn na mara ai.