55
1 Dai Madu gaw,
?Hpang gara ai ni e, sa marit-
ndai yang e hka nga nga ai!
Gumhpraw n lu ai ni e, sa marit-
nsi naisi mari nna sha mu!
Sa marit, sabyi ntsin hte nga chyu mari lu mu-
dai gaw manu jahpu hpa mung n hkrat ra nga ai! Ref 55:1: Shr 21:6; 22:17.
2 Lusha majing n re ai hta na a gumhpraw hpe lahpawt lama rai hpa majaw jai shama n ta?
Hpa majaw na a shabrai ni hpe jai kau nna naw kawsi kyet nga n ni?
Nye a ga madat mara nna, ngai tsun ai hku galaw u,
shaloi, nang gaw yawng hta kaja htum ai lusha hta kabu gara wa lu na rai ndai.
3 Nye a amyu masha ni e, ya madat mu, ngai hpang de sa wa mi;
ngai hpang de sa wa mi, nanhte asak hkrung nga lu na rai myit dai!
Ngai gaw nang hte htani htana ga shaka tawn da na nngai.
Ngai Dawi hpe jaw sai ga sadi hte maren, nang hpe shaman chyeju ni jaw na nngai. Ref 55:3: Kas 13:34.
4 Ngai gaw shi hpe ningbaw hte masha amyu baw ni a hpyen du tai shangun ni ai,
shi hku nna, ngai shanhte hpe nye a daru magam n-gun madun dan ni ai.
5 Ya chyawm gaw, nang gaw nang hpe lang mi mung n chye ai maigan
masha amyu baw ni hpe nang shaga ai hte
shanhte nang hte matut na matu kagat shang wa na mara ai!
Ngai gaw dai Madu na a Karai Kasang, Israela a chyoi pra ai Karai Kasang rai nga nngai,
ndai yawng mayawng hpe ngai shabyin dat na nngai;
ngai gaw nang hpe arawng sadang hte hpung shingkang ap ya na nngai,? ngu nna tsun ai.
6 Dai Madu hpang de kayin wa nna shi kaw akyu hpyi u,
ya aten, shi ani sha nga nga ai.
7 N hkru ai ni gaw shanhte a asak hkrun lam hpe kau da nna
shanhte a myit mang ai lam galai shai kau nga mu ga.
Shanhte gaw dai Madu anhte a Karai Kasang hpang de kayin wa mu ga;
shi gaw matsan dum chye ai wa rai nna mara raw dat ya na matu lawan nga ai.
8 Dai Madu gaw, ?Nye a myit mang ai lam ni gaw nanhte zawn n rai nga ai,
nye a lam ni gaw nanhte a lam ni hte kaga ga rai nga ai.
9 Sumsing lamu ni gaw ginding aga hta grau tsaw nga ai zawn,
nye a lam ni hte nye a myit mang ai lam ni gaw nanhte hta grau tsaw nga ai.
10 Nye a mungga gaw ginding aga hpe hka jaw na matu
lamu kaw na htu hkrat ai ahkyen hte marang zawn rai nga ai.
Dai ni gaw nsi naisi ni hpe tu shangun nna
gat hkai na matu nli hte sha na lusha shapraw ya nga ai. Ref 55:10: 2Ko 9:10.
11 Dai hte maren, ngai tsun ai mungga mung dai hte maren tai na ra ai-
de a matu ngai shatawng shada ai amu galaw na lam hprai mat na n rai;
dai gaw ngai shangun ai amu magup shagu hpe shadik ya na ra ai.
12 ?Nang gaw kabu gara ai hte Babelon kaw na pru wa na rai ndai;
nang gaw mare kata kaw na ngwi pyaw sim sa ai hte woi wa ai hkrum na rai ndai.
Bum ni hte kawng ni aja awa mahkawn mangoi na mara ai,
hpun ni mung kabu gara jahtau garu na mara ai.
13 Ya ju hpun ni tu nga ai shara hta marau hpun ni tu wa na mara ai;
ju sumwum shara ni hta maihting hpun ni tu lung wa na mara ai.
Ndai gaw dai Madu ngai nan galaw sai amu hpe shadum ai kumla tai nna,
htani htana agrin nga na ra ai.?