29
Karai Kasang a tawn hkungri ngu ai Yerusalem nan dingnye hkrum nga sai! Dawi dabang but ai mare gaw dingnye hkrum nga sai! Lusha poi hte poi shingra ladaw ni hpe laning mi hta laning mi kahtap nna galaw nga mu. Dai hpang Karai Kasang gaw, ?Karai Kasang a tawn hkungri,? ngu shamying ai mare a ntsa e tsin-yam tsindam shapraw na ra ai. Dai shara hta hkrap ngu hkrap ngoi hte hkrap agru ai nsen hpring nna, mare ting gaw asai hte gat lapri da ai tawn hkungri zawn tai mat na ra ai. Karai Kasang gaw dai mare hpe gasat na ra ai, dai mare grup yin e dap jung na ra ai, dai mare hpe wang tawn na ra ai. Yerusalem gaw ga kata kaw na ga shaga na matu malan da ting ai hte ga nhpu kaw na gasa ai nsen hte tsun ai tsu minla zawn tai mat na ra ai.
Yerusalem e, nang hpe gasat ai maigan masha ni yawng ga nhpu zawn gawut shapoi kau ai hkrum na mara ai, hkrit kajawng na zawn re ai shanhte a hpyen luksuk ni gaw yihku zawn poi mat wa na mara ai. Akajawng sha hte n myit mada ai aten hta Chyahtum Chyalai N-gun rawng ai dai Madu gaw mu ngoi kadu ai laru kaba hte nnang nawn ai hte rau nanhte hpe hkye mawai la na ra ai. Shi gaw nbung laru hte wan mawru ni hpe dat dat na ra ai; dai hpang masha amyu baw ni a hpyen luksuk ni gaw Karai Kasang a tawn hkungri a mare hpe gasat nga na mara ai, shanhte a hpyen laknak arung arai yawng hte hpyen hking arai magup hte gaw yup mang zawn hkoi mat na mara ai, dai gaw shana e myit mang ai arai lama mi zawn tai na ra ai. Yerusalem hpe htim gasat na matu hpawng nga ai masha amyu baw ni yawng gaw kawsi kyet ai masha wa yup mang e shat lu sha nga ti mung, hprang wa yang kawsi ai wa hte ntsin hpang gara ai wa yup mang e ntsin lu lu ti mung hkun hkraw ai mayu hte bai hprang wa ai wa zawn tai mat na ra ai.
Matut nna myit n su nga mu! Matut nna myi di nga mu! Sabyi n lu ti mung nang nga mu! Chyaru kahte mi n lu tim ndi nda rai nga mu! 10 Dai Madu gaw nanhte hpe yup shamwi ai hte grai yup pyaw mat wa hkra galaw da nu ai. Myihtoi ni gaw amyu masha ni a myi ni tai ang ma ai, rai ti mung Karai Kasang gaw shanhte hpe amam kau ya nu ai. Ref 29:10: Rom 11:8. 11 Myihtoi shagu hte seng ai shingran a lachyum gaw nanhte kaw na makoi da hkrum na ra ai; dai gaw dazik shakap da ai laika shabawn zawn tai na ra ai. Dai hpe nanhte la nna chye hti ai wa hpe san na matu hti shangun ai rai yang, shi gaw dai gaw dazik kap nga ai majaw shi n lu hti ai nga nna tsun na ra ai. 12 Nang gaw dai hpe n chye hti ai wa hpe jaw nna nang hpe hti dan na matu shi hpe san ai rai yang, shi gara hku hti dan na n chye ai hpe shi htan na ra ai.
13 Dai Madu gaw, ?Ndai amyu masha ni gaw ngai hpe nawku daw jau na matu tsun ma ai, rai ti mung shanhte a n-gup aga ni gaw lachyum n pru nga ma ai, shanhte a myit masin mung shara langai ngai hta myit jung ma ai. Shanhte nawku htung gaw shanhte majoi mi matsing chyai ai masha a tara ni hte htung lai masa ni hta jan nna kaman lila sha rai nga mu ai. Ref 29:13 Mat 15:8-9; Mrk 7:6-7. 14 Dai rai nna ngai gaw shanhte langai hte langai hpe n myit mada ai mauhpa amu hte kajawng dat na nngai. Hpaji rawng ai ni angawk mat wa nna shanhte yawng a myit let ai lam gaw kaman lila tai mat na mara ai,? ngu nna tsun wu ai.
15 Dai Madu n mu lu hkra nga, shanhte a maw mawn ai lam ni hpe makoi shakut ai ni gaw dingnye hkrum nga ma ai! Shanhte gaw shanhte a da da ai amu ni hpe mayun galaw ai hte dai amu hpe kadai mung n mu, shanhte hpa galaw nga ma ai hpe n chye ma ai ngu, myit nawn ma ai. 16 Shanhte gaw lam shagu hpe nhti nhtang gale galau di ma ai. Di bu sama wa hte kagam ga gaw gara mahtang grau nna ahkyak ai kun? Arai lama mi gaw galaw da ai wa hpe, ?Nang gaw ngai hpe n galaw ndai, shing n rai, Nang hpa galaw nga ai lam nang n chye ndai,? ngu nna tsun lu nga a ni?
17 Ga malai hte maren, kade n na yang htat ai maling htinggram gaw yi sun lamu ga tai mat wa na ra ai, yi sun lamu ga gaw maling bai tai mat na ra ai.
18 Dai nhtoi du ai shaloi, na lahpang ai ni gaw laika ja ja hti ai nsen na lu na ra ai, nsin kata nga nga ai myi n mu ai ni mung shanhte a myi ni hpaw wa nna mu lu na mara ai. 19 Matsan mayan ni hte shagrit shanem ai amyu masha ni gaw dai Madu Israela a chyoi pra ai Karai Kasang jaw ai kabu gara lam hpe kalang mi bai mu na mara ai. 20 Dai gaw kaga masha ni hpe dip gamyet sha ai ni hte Karai Kasang hpe n gawn n sawn rai madun dan ai ni a jahtum na lam rai na ra ai. Yubak kap ai masha shagu hte gaw jahten kau hkrum na mara ai. 21 Kaga masha ni hpe shatan nhkan ga tsun ai ni, masha sat amu a ari hpe hkum shingdang ai ni hte ding man ai masha ni hpe teng man rap ra ai tara kaw na gang kau let masu magaw ga tsun ai ni hpe Karai Kasang jahten kau na ra ai.
22 Dai rai nna, Abraham hkrum sha ai tsin-yam tsindam kaw na hkye mawai la ai dai Madu Israela a Karai Kasang gaw, ?Nye a amyu masha ni e, nanhte gaw kaya kahpa galoi mung hkrum sha sana myit dai n rai, nanhte a myi man ni galoi mung kaya kahpa hte sum sana myit dai n rai. 23 Ngai nanhte hpe jaw ya na dai kashu kasha ni hpe nanhte mu myit dai shaloi, ngai gaw Israela a chyoi pra ai Karai Kasang rai nga nngai hpe nanhte yin la na rai myit dai. Nanhte ngai hpe shagrau sha-a na myit dai, ngai hpe hkrit kamyin na myit dai. 24 Angawk ai amyu masha ni chye la na matu sharin la na mara ai, tut nawng aput angun nga ai ni sharin achyin hkam la lu na matu kabu gara na mara ai.? ngu nna tsun wu ai.