1 Dai Madu gaw ginding aga hpe agrawp mani kau na ra ai. Dai hpe katsi katsang di kabai tawn da na ra ai. Shi gaw ga man hpe galau ka-up kau nna dai hta nga ai masha ni hpe shabra kau na ra ai. 2 Hkinjawng ni hte amyu masha ni, mayam ni hte mayam madu ni, mari ai ni hte dut ya ai ni, hkoi ya ai ni hte hkoi la ai ni, sut su ai hte matsan mayan re ai ngu na masha shagu hte gaw hpang jahtum na lam hpe maren hkrum na rai ma ai. 3 Ginding aga gaw ga gamang mat nna hten run mat na ra ai. Dai Madu tsun nu ai hte maren dai gaw byin wa na ra ai.

4 Ginding aga gaw hkun hkraw ai hte nyui nga ai; mungkan ga ting n-gun yawm nga ai; ginding aga hte sumsing lamu gaw tsam mat na ra ai. 5 Mung masha ni gaw Karai Kasang a hkang da ai tara ni hpe jahten kau ai hku nna mung, prat dingsa agrin nga na matu shi jaw da ai ga shaka ni hpe shut hpyit kau ai hku nna mung, ginding aga hpe awu asin di kau manu ai. 6 Dai rai nna, Karai Kasang gaw ginding aga hpe dagam ga tsun nu ai. Dai hta shanu nga ai amyu masha ni gaw shanhte galaw kau sai amu a matu shabrai jaw ya nga ma ai. Naw hkrung ngam nga ai ni gaw n law hta n law mat wa na mara ai. 7 Sabyi ru ni nyui mat ai hte sabyi ntsin n pru mat nga ai. Lang mi kabu gara yu sai masha shagu hte gaw ya aten myit n pyaw n ngawn rai nga ai, 8 shanhte a kabu pyaw ai tingse hte chying bau a mahku nsen sim mat nga masai. 9 Sabyi ntsin lu nna kabu gara mahkawn mangoi ai gaw dai shara hta n nga nga ai, de a namchyim namta loi mi hpe kabu sharawng ai masha kadai n nga nga ai. 10 Dai mare na arai yawng mayawng mung marawng marang rai nga ai, amyu masha ni gaw shanhte a dum nta ni shim lum na matu chyinghka la da nga ai. 11 Sabyi ntsin loi mi mung n nga sai majaw, amyu masha ni lam nmaw hkan jahtau garu nga ma ai. Kabu gara ai lam gaw htani htana htum mat sai; dai gaw ndai lamu ga kaw na shapraw kau hkrum nga sai. 12 Dai mare gaw hten run nga sai; de a chyinghka ni agrawp daw kau hkrum nga sai. 13 Ndai gaw mungkan ga ting hta nga ai amyu baw shagu ni hta byin wa na lam rai nga ai. Dai gaw tsanlun hpun shagu na asi ni hpe kayat jahkrat kau ai hte sabyi di ai hpang nlim gut la ai zawn mung mangai a ahpang jahtum aten na zawn mung tai na ra ai.

14 Naw ngam nga ai ni chyawm gaw kabu gara ai hte mahkawn mangoi lu na mara ai. Sinna maga de nga ai ni gaw dai Madu kade wa galu kaba nga ai lam tsun na mara ai, 15 Sinpraw maga de nga ai ni gaw shi hpe kungdawn na mara ai. Panglai mayan hku nga ai ni chyawm gaw dai Madu Israela a Karai Kasang hpe shakawn kungdawn wa na mara ai. 16 Anhte gaw mungkan ga a jahtum htum ai shara kaw nna ding hpring amyu baw rai nga ai Israela a shakawn kungdawn ai mahkawn mangoi ni hpe na wa na ga ai.

Rai ti mung nye a matu myit mada shara hpa n nga nga ai! Ngai gaw n-gun lagaw angwi ngwi sha yawm mat wa nga nngai! Gumle gumlau ai ni gaw matut gumlau ai hte myit magaw ai ni gaw grau grau nna sawng wa nga ai. 17 Masha yawng hte e, nye a ga madat mu! Hkrit kajawng lam ni, nhkun ni hte mahkam ni gaw nang hpe ala nga ai. 18 Hkrit kajawng ai kaw na hprawng lawt na matu shakut ai wa kadai mung nhkun kata de di hkrat bang na ra ai, nhkun kaw na hprawng lawt lu ai wa kadai mung mahkam hta lu na ra ai. Lamu na hka hpungtun ni ru hkrat wa ai shaloi ginding aga a npawt nhpang ni gari ashun wa na mara ai. 19 Ginding aga gaw kaprang ga wa nna ga gamang ai hte ga mahka mat wa na ra ai. 20 Ginding aga shi nan gaw chyaru nang ai wa zawn ndi nda rai nna, nbung laru kata na yihkyap kanga ai zawn, rai mat na ra ai. Mungkan ga gaw shi a shut hpyit ai yubak ni hta li nga ai; dai gaw kazut taw mat nna galoi mung bai rawt lu na ra ai n rai.

21 Dai Madu gaw matsaw ntsa na daru magam n-gun rawng ai ni hte ga ntsa na up hkang du salang ni hpe ari jaw ai shaloi, dai aten gaw du wa nga ai. 22 Karai Kasang gaw nhkun kata hta sharen da ai bawng dung masha ni hpe zawn hkawhkam ni hpe shinggyin mahkawng da na ra ai. Shi gaw shanhte hpe ari jaw ai aten du hkra, htawng kata hta la bang da na ra ai. 23 Shata gaw sin mat wa na ra ai, ajan mung htoi na ra ai n rai, hpa majaw nga yang, Chyahtum Chyalai N-gun rawng ai dai Madu gaw hkawhkam tai na ra ai. Shi gaw Ziun Bum ntsa na Yerusalem hta up nga na ra ai, amyu masha ni a ningbaw ni gaw shi a hpung shingkang hpe mu lu na mara ai.