20
Asuri Hkawseng Sargon a aming hte maren, Asuri hpyen luksuk a du kaba wa gaw Hpilisti mung na Ashdod mare hpe htim gasat wu ai. Dai Madu gaw masum ning jau kaw nna Amot a kasha Esaia hpe shi a kyepdin ni hte shi hpun nga ai lachyit hpun nba raw kau na matu tsun nu ai. Shi madat mara ai hte singgu krin, kyepdin n din ai sha hkawm kayin nga ai. Ashdod mare zing la hkrum ai shaloi, dai Madu gaw, ?Nye a shangun ma Esaia gaw masum ning ting singgu krin, kyepdin n din ai sha kayin hkawm nu ai. Dai gaw Egutu mung hte Ehtiopi mung hta byin wa na a kumla langai rai nga ai. Asuri hkawseng wa gaw ndai mungdan lahkawng kaw na shi lu rim la ai bawng masha ni hpe singgu krin woi mat wa na ra ai. Kaji kaba n nga, shanhte gaw lagaw kaman hte singgu krin hkawm nna shanhte a dangbau ni hpaw da let, Egutu mung hpe kaya jahkrum na mara ai. Ehtiopi mung hpe kam hpa ai ni hte Egutu mung hte seng nna shakawng gumrawng ai ni gaw mak mat na mara ai, shanhte a myit mada ai lam ni mung gamang mat na mara ai. Dai aten du ai shaloi, Hpilisti mung panglai hkin-gau mayan hku shanu nga ai masha ni gaw, ?Asuri hkawseng kaw nna anhte hpe makawp maga la na matu anhte kam hpa nga ai amyu masha ni hta hpa baw byin nga sai hpe, yu yu mu! Anhte kaning rai hkrung nga lu na rai nga ga ta?,?? nga nna tsun na mara ai.