18
Ehtiopi mung na hka nu ni a wora hkran maga mi de, singkaw ni kahprup ai nsen na lu ai mungdan langai nga nga ai. Ref 18:1-7: Zep 2:12. Dai mungdan kaw na dat kasa ni gaw mai-aw hte galaw ai li ni hta jawn nna Nila hka nu de yawng yu wa ma ai. Lawan ladan re ai shiga gun kasa ni e, dum nta de nhtang wa masu! Hka nu ni hte jahka da ai na a mungdan de, n-gun ja nna daru magam n-gun rawng ai na a amyu baw hpang de, hkum shingyan tsaw nna hkum shan manen ai na a masha ni ngu ai mungkan ting jawm hkrit ai ni hpang de mungga la nhtang wa masu.
Ginding aga ntsa ting hta nga ai masha shagu hte e, madat mu! Bum pungding ntsa e sharawt da na kumla dawnghkawn hpe yu yu mu! Pahtau dum ai nsen hpe madat mu! Dai Madu gaw ngai hpe, ?Mangai aten lum ai shana ni hta atsin sha hkrat ai numri zawn, kahtet kang ai shani hta asim sha jan katen ai zawn sumsing lamu kaw nna ngai gum yu na nngai. Pu ni yawng run hkrat mat nna sabyi si ni myin wa nga ai aten, sabyi si ni hpe garai n di mahkawng yang, sabyi ru ni kaw na kungdam ai lakung lakying ni hpe nhkyi hte aloi loi sha kran kau ai zawn, gumlau hpyen ni gaw Ehtiopi masha ni hpe jahten shaza kau na ra ai. Shanhte a hpyenla ni a moi mang ni ntsa malen u ni hte matse labye du sat ni a man e asan sha taw nga na mara ai. Ntsa malen u ni gaw dai hpe ginhtawng ta hta sha nna, matse labye dusat ni gaw nshung ta hta amya sha na mara ai.
Chyahtum Chyalai N-gun rawng ai dai Madu gaw mungkan ting jawm hkrit ai hte hkum shingyan galu nna hkum shan pri tsawm ai amyu masha ni, n-gun ja nhtawm daru magam n-gun hte hpring nga ai amyu hte hka nu hku hkan nna garan da ya sai dai mungdan kaw nna sak jaw ai shagu hkungga hpe hkap la na aten gaw du wa nga sai. Shanhte gaw Chyahtum Chyalai N-gun rawng ai dai Madu hpe nawku ai shara ngu ai Ziun Bum de sa wa na mara ai.