14
1 Dai Madu gaw shi a amyu masha Israela hpe kalang mi bai matsan dum la nna shanhte hpe shi a amyu zawn lata la na ra ai. Shi gaw shanhte hpe shanhte a mung ga de bai nga shangun na ra ai. Maigan masha ni mung du sa nna shanhte hte rau dai mung e nga na mara ai.
2 Masha amyu baw ni law law gaw Israela amyu masha ni hpe dai Madu shanhte hpe jaw da ai mungdan de nhtang wa na matu karum la na mara ai, dai yang na masha amyu baw ni gaw mayam ni zawn Israela hpe daw jau na mara ai. Lang mi Israela hpe rim la yu sai ni gaw Israela a majaw rim la ai bai hkrum na mara ai. Israela amyu masha ni hpe lang mi dip sha lai wa sai ni hpe Israela amyu masha ni bai up hkang na mara ai.
3 Dai Madu gaw Israela amyu masha ni hpe shanhte a nchyi nmu re ai tsin-yam tsindam, nni nkri shoihpa shoirang hte laja lana re ai amu hta shadut galaw hkrum ai kaw na hkyamsa lam jaw ya na ra ai.
4 Shi dai amu galaw ai shaloi, shanhte gaw Babelon hkawhkam wa hpe ashu let ning ngu tsun ma ai:
?Gumshem ai hkawhkam gaw di hkrat mat nu hka! Shi gaw kadai hpe mung galoi mung bai dip gamyet sana ra ai n rai!
5-6 Dai Madu gaw shanhte gasat dang la ai masha amyu baw ni hpe nhtum nni zingri ai hte sin pawt lahtet hte amyu masha ni hpe dip gamyet sha lai wa sai n hkru ai up hkang du ni a daru magam n-gun hpe jahtum kau ya nu ai.
7 Ya chyawm gaw, hpang jahtum e, mungkan ga ting gaw bansa ai hte ngwi pyaw sim sa lam hta kabu gara nga ai, masha shagu gaw kabu gara ai hte mahkawn mangoi nga ma ai.
8 Marau hpun ni hte Lebanon arit hpun ni mung hkrat sum mat sai hkawhkam wa a matu kabu ma ai, hpa majaw nga yang, shanhte hpe kran kadang na kadai n nga nga sai, ya chyawm gaw shi n nga mat sahka!
9 ?Katsan ga gaw Babelon hkawhkam wa hpe tau hkalum la na matu jin jin rai nga ai. Ginding aga ntsa na daru magam n-gun rawng lai wa sai ni a tsu minla ni kabring kabrawng rai nga ai. Hkawhkam ni a tsu minla ni gaw shanhte a tingnyang ni kaw na rawt wa nga ma ai.
10 Shanhte yawng gaw shi hpe ning ngu shaga shapraw dat ma ai: ?Ya chyawm gaw nang gaw anhte zawn n-gun kya mat sahka! Nang gaw anhte hta na marai langai rai mat nit hka!
11 Nang gaw tingse sumpyi ni hte shagrau sha-a hkrum ga yu nit dai, rai ti mung ya chyawm gaw nang ndai katsan ga e rai nga nit dai. Nang gaw byet panep ntsa e kaleng taw nga ai hte latung nba hte htinggrum da hkrum nga ndai.??
12 O, htoi tu ai nhtoi gintawng, Jahpawt manap a kasha e, nang gaw sumsing lamu kaw nna di hkrat wa nit hka! Lai sai aten hta nang gaw masha amyu baw ni hpe gasat dang nga ndai, rai ti mung ya chyawm gaw ga de kabai jahkrat kau ai nang hkrum nga nit dai. Ref 14:12: Shr 8:10; 9:1.
13 Nang gaw sumsing lamu de lung nna tsaw htum ai shagan ni a ntsa e na a tingnyang tawn da na matu, myit daw dan da nit dai. Nang gaw karai ni zup hpawng ai dingdung maga na dai bum ntsa hta e hkawhkam langai zawn dung lu na hpe myit yu nit dai. Ref 14:13-15: Mat 11:23; Luk 10:15.
14 Nang gaw Chyahtum Chyalai N-gun rawng ai wa zawn sumwi ni a ntsa de lung na tsun nit dai.
15 Rai ti mung shing rai galaw lu na malai, nang gaw katsan ga a sung htum ai shara hta jahkrat bang kau ai hkrum nga nit dai.
16 Si hkrung si htan gaw azi yu nna mau mahka na ra ai. Shanhte gaw, ?Ginding aga hpe ashun awam di nna de a mungdan ni hpe gari shangun ai gaw ndai masha wa rai nga a ni?
17 Mare ni hpe jahten sharun kau nna mungkan ga hpe nam mali shatai kau ai gaw ndai masha wa rai nga a ni? Bawng dung masha ni hpe galoi mung n dat hkraw ai hte shanhte hpe nta de n wa shangun ai wa gaw ndai masha wa rai nga a ni?,? ngu nna san ma ai.
18 Ginding aga a hkawhkam ni yawng hte gaw hkik hkam ai shanhte a lup ni hta yup nga ma ai,
19 rai ti mung nang mahtang lup shara n lu nga ndai, na a moi mang gaw kabai shayat kau hkrum nga ai. Dai gaw majan hta sat kau hkrum ai hpyenla ni a moi mang ni hte ka-up da nna shanhte hte rau lunghkrung nhkun de kabai bang nna kabye anut kau hkrum nga ai.
20 Nang gaw na a mungdan hpe jahten sharun kau nna na a amyu masha ni hpe nan sat kau nit dai majaw, nang gaw kaga hkawhkam ni zawn lup makoi hkrum na ndai n rai. Na a n hkru ai dinghku masha ni kadai mung hkrung nga na mara ai n rai.
21 Sat hpang sanu! Shanhte a kaji kawa ni a yubak mara ni a majaw shi a shadang sha ni si na mara ai. Shanhte hta na kadai mung ginding aga hpe galoi mung up lu sana n rai, ginding aga hpe mare ni hte jahpring lu sana n rai.
22 Chyahtum Chyalai N-gun rawng ai dai Madu gaw, ?Ngai gaw Babelon hpe gasat nna dai mung hpe jahten sharun kau na we ai. Ngai gaw arai hpa hpe mung, kashu kasha ni hpe mung, asak hkrung nga ai masha langai mi hpe mung tawn da na nngai n rai. Dai Madu Ngai nan tsun ni ai.
23 Ngai gaw Babelon hpe hka ing ai shara shatai kau na nngai, u hku ni gaw dai yang hkan nga na mara ai. Ngai gaw Babelon hpe maza mala mahkra ye kau ai dun-ye hte ye kau na nngai. Chyahtum Chyalai N-gun rawng ai dai Madu Ngai nan tsun ni ai,? nga nna tsun wu ai.
24 Chyahtum Chyalai N-gun rawng ai dai Madu gaw ning ngu dagam shaka wu ai: ?Ngai maw mawn ai amu byin wa na ra ai. Ngai galaw na ngu daw dan da ai amu tai wa na ra ai. Ref 14:24-27: Esa 10:5-34; Zeh 2:13-15.
25 Ngai gaw Asuri masha ni hpe nye a lamu ga ngu ai Israela mung hta shamyit kau nhtawm shanhte hpe nye a bum ni a ntsa hta kabye anut kau na we ai. Ngai gaw nye a amyu masha ni hpe Asuri ni a kandang kaw nna mung, shanhte gun hpai nga ai lit ni kaw nna mung shalawt dat na we ai.
26 Ndai gaw mungkan ga a matu nye a yaw shada ai lam rai nga ai, nye a lahpum gaw masha amyu baw ni hpe ari jaw na matu ladawn da nga ai.?
27 Chyahtum Chyalai N-gun rawng ai dai Madu gaw ndai amu galaw na matu daw dan da nga ai. Shi gaw ari jaw na matu shi a lahpum hpe ladawn da nu ai, kadai mung shi hpe jahkring da lu ai n rai.
28 Ndai gaw Hkawhkam Ahaza si ai shaning hta pru wa ai mungga rai nga ai. Ref 14:28: 2Hk 16:20; 2Hl 28:27.
29 Hpilisti masha ni e, nang hpe kayat ai hkawn daw mat sai, rai ti mung nanhte kabu lu na lam hpa mung n nga nga ai. Lapu mi si yang, de a shara hta grau sawng ai langai du nga ai. Lapu a di gaw pyen chye ai baren hpe hpum shakraw nga ai. Ref 14:29-31: Yer 47:1-7; Eze 25:15-17; Yoe 3:4-8; Amo 1:6-8; Zeh 2:4-7; Zep 9:5-7.
30 Dai Madu gaw matsan mayan re ai shi a amyu masha ni a sagu rem wa langai tai na ra ai, shi gaw shanhte hpe shim lum ai hte nga shangun na ra ai. Rai ti mung shi gaw Hpilisti masha ni a ntsa e hkrit hpa hkuwa dat dat na ra ai, dai gaw kadai hpe mung asak hkrung nga shangun na ra ai n rai.
31 Hpilisti mare ni yawng hte e, karum la lam a matu hkrap shabam nga mu! Nanhte yawng hte e, hkrit gari nga mu! Sumwi nhpu gaw dingdung maga hku nna du sa wa ra ai-dai gaw magrau grang ai hpyen luksuk langai rai nga ai.
32 Anhte gaw Hpilisti mung kaw nna anhte hpang de du sa wa ai kasa ni hpe kaning ngu htan na rai ga ta? Anhte gaw shanhte hpe dai Madu gaw Ziun hpe gaw da nu ai; nni nkri hkam sha nga ai shi a amyu masha ni gaw dai yang e shim lum lam mu tam la na mara ai, ngu tsun dan na ga ai.