13
Ndai gaw Amot a kasha Esaia, Karai Kasang kaw na lu la ai Babelon hte seng ai mungga rai nga ai. Ref 13:1-14:23: Esa 47:1-15; Yer 50:1-51:64.
Kawng krin pungding ntsa e majan dawnghkawn sharawt da mu! Hpyenla ni hpe jahtau mu, gumrawng gumtawng ai mare chyinghka ni hpe gasat na, shanhte a matu kumla tai u ga, nanhte a lata lahpum sharawt da mu. Dai Madu gaw chyoi pra ai majan gasat na matu mung, shi masin yu pawt nga ai ni hpe ari jaw na matu mung, arawng sadang ninglaw ai ni hte kam ging sai hpyenla ni hpe shaga shapraw la nu ai.
Bum ni a ntsa e garu kachyi nga ai-masha wunawng wuwa kaba a nsen, masha amyu baw ni a nsen hte mungdan ni zup hpawng nga ai nsen ni hpe madat mu. Hpyen luksuk ni a dai Madu gaw majan a matu shi a hpyen hpung ni hpe hkyen da nga ai. Shanhte gaw ginding aga a jahtum e nga ai, tsan htum ai mungdan ni kaw nna du sa wa nga ma ai. Dai Madu gaw shi a masin kahtet ai a majaw, mungdan ting hpe jahten kau na du sa wa nga ai.
Nchyi nmu jahtau hkrap mu! Dai Madu a nhtoi ni wa nga sai, Chyahtum Chyalai N-gun rawng ai wa jahten sharun kau na nhtoi du wa ra ai. Ref 13:6: Yoe 1:15. Masha shagu a lata ni kya gumba mat na mara ai, masha shagu a nden marai n rawng mat na ra ai. Shanhte gaw shinggyim machyi ai numsha zawn yawng hte gaw hkrit kajawng ai hte nchyi nmu hkrum sha na mara ai. Shanhte gaw hkrit ai myit hte shada da yu hkat na mara ai; shanhte a myi man ni gaw kaya kahpa hte hkyeng mat na mara ai. Dai Madu a nhtoi du wa nga sai, dai nhtoi gaw pawt sindawng ai hte masin kahtet ai shi a gumshem ai nhtoi rai na rai nga ai. Ginding aga gaw nam mali tai mat nna yubak lu ai masha shagu jahten sharun kau hkrum na mara ai. 10 Shagan shagu hte shagan majaw shagu hte gaw nhtoi htoi na n rai, ajan pru wa tim sin mat na ra ai, shata gaw nhtoi jaw na ra ai n rai. Ref 13:10: Eze 32:7; Mat 24:29; Mrk 13:24-25; Luk 21:25; Shr 6:12-13; 8:12.
11 Dai Madu gaw, ?Ngai gaw ginding aga ntsa de ru yak tsin-yam tsindam jahkrat dat nhtawm n hkru ai masha ni yawng galaw ai shanhte a yubak ni a matu ari jaw na we ai. Ngai gaw gumrawng gumtawng ai masha shagu hte hpe shagrit kau nna, myit tsaw myit dap ai hte mazut ai masha shagu hte hpe ari jaw na nngai. 12 Naw ngam nga ai ni gaw aja hta grau taw mat na ra ai. 13 Ngai gaw sumsing lamu ni hpe gari ashun shangun na nngai, Chyahtum Chyalai N-gun rawng ai Ngai Madu nan nye a sindawng kahtet ai hpe madun ai shani hta ginding aga gaw gari ashun ai hte shi a shara htawt mat na ra ai.
14 ?Babelon mung hta nga nga ai maigan masha ni gaw jaugawng ni a lata na hprawng lawt wa ai shannga hte sagu rem n nga ai sagu ni zawn tinang a buga ni de hprawng bra mat wa na mara ai. 15 Rim hkrum ai ni kadai mung nhtu masen hte galung sat hkrum na mara ai. 16 Shanhte garen gari rai yu nga ma yang, shanhte a ma chyangai ni adit sat kau hkrum na mara ai, shanhte a dum nta ni hpya kau hkrum na mara ai, shanhte a madu jan ni roi rip hkrum na mara ai,? nga nna tsun ai.
17 Dai Madu gaw, ?Babelon mung hpe gasat na matu Medi masha ni hpe sharawt nga nngai. Shanhte gaw gumhpraw hpe hpa n nawn, aja mung n marin rai ma ai. 18 Shanhte gaw shanhte a ndan pala ni hte shabrang ni hpe sat kau na mara ai. Shanhte gaw ma chyangai ni hpe matsan dum ma ai n rai, ma kaji ni a ntsa e mung n-gaw nwai ai myit rawng ai n rai. 19 Babelon mung gaw yawng hta tsawm htap htum ai mungdan rai nga ai; dai mungdan gaw de a mung masha ni a matu arawng lu nga ai. Rai ti mung dai Madu ngai gaw Sodom hte Gomora hpe galaw ai zawn Babelon hpe jahten kau na nngai! Ref 13:19: Nin 19:24. 20 Kadai mung dai shara e galoi mung bai nga lu na n rai. Bu hkawm nga ai Arab masha ni mung dai shara hkan shanhte a sum gap sana ma ai n rai, sagu rem ai ni mung dai yang e sagu rem sana ma ai n rai. 21 Dai mung gaw zaibru jang dusat ni shanu ai shara, u hku ni shanhte a tsip galaw ai shara tai mat na ra ai. U gawla-uk ni dai yang e nga nna, ya ni gaw dai hten run ai shara hkan gumtawng hkawm na mara ai. Ref 13:21: Esa 34:14; Zeh 2:14; Shr 18:2. 22 Langchyi ni hte hkawhkam htingnu ni hta nam gwi ni hte gwi ma-a ni a jahtau ai hpungtang kashaw nsen na na ra ai. Babelon a aten du nu hka! Shi a nhtoi ni ganoi lai wa magang nga sai,? ngu nna tsun ai.