11
Dawi a hkawhkam amyu matu gaw kran kadawng kau hkrum ai hpun hte bung nga ai; rai ti mung ndu kaw nna nnaw nnan prut lung wa ai zawn hkawhkam nnan langai mi gaw Dawi a matu mara ni kaw na paw pru wa na ra ai. Ref 11:1: Shr 5:5; 22:16.
 
Dai Madu a wenyi gaw shi hpe hpaji byeng-ya,
chye chyang ai nyan hte kung kyang ai hpaji jaw ya na ra ai. Shi gaw shi a amyu masha ni hpe up hkang na ra ai.
Shi gaw dai Madu a myit ra ai hpe chye nna, shi hpe shagrau sha-a na ra ai,
shi gaw dai Madu a ga madat mara ai hta awng sharawng na ra ai.
Shi gaw ahpraw asam hku nna mung, na ai ga hku nna mung jeyang na ra ai n rai;
shi gaw matsan mayan ni hpe rap ra ai hku tara jeyang nna
matsan mayan hkrum ai ni a ahkaw ahkang hpe makawp maga ya na ra ai.
Shi a hkang da ai ga hte maren amyu masha ni ari jaw ai hkrum nna,
n hkru ai masha ni si mat na mara ai. Ref 11:4: 2Ht 2:8.
Shi gaw shi a amyu masha ni hpe teng man rap ra ai tara hte ding hpring ai myit hte up na ra ai. Ref 11:5: Ehp 6:14.
 
Chyahkyawn ni hte sagu ni ngwi pyaw sim sa ai hte rau shanu nga na mara ai,
rawng teng ni gaw bainam kasha ni hte rau hpum nga na mara ai.
Dumsu kasha ni hte hkanghkyi hkalung ni rau shat sha nna
ma kaji ni dai ni hpe lanu lahku na mara ai. Ref 11:6-9: Esa 65:25.
Dumsu ni hte tsap ni rau ushat sha nna,
de a dumsu kasha ni hte tsap kasha ni ngwi pyaw sim sa ai hte rau hpum nga na mara ai.
Hkanghkyi ni gaw dumsu ni zawn yihku sha na mara ai.
Ma chyangai langai mi atuk rawng ai lapu makau e ginsup tim pyi
shi machyi hkrum na wu ai n rai.
Karai Kasang a chyoi pra ai kawng ngu ai Ziun ntsa e
machyi tsin-yam hte n hkru ai amu hpa mung nga na ra ai n rai.
Panglai ni gaw hka hte hpring nga ai zawn dai Madu a
machye machyang hpaji gaw mungkan ting hta pri rai na ra ai. Ref 11:9: Hab 2:14.
10 Dawi a hkawhkam aru asai kaw nna hkawhkam nnan gaw masha amyu baw ni a matu masat kumla tai na ra ai nhtoi gaw du wa nga ai. Shanhte gaw shi a hkawhkam htingnu mare hta zup hpawng nna shi hpe shagrau sha-a na mara ai. Ref 11:10: Rom 15:12. 11 Dai nhtoi du ai shaloi, dai Madu gaw shi a daru magam n-gun hpe kalang mi bai lang nna, Asuri, Egutu, Pahtro, Ehtiopi, Elam, Babelon hte Hamat mung, panglai hkin-gau mayan hte panglai zunlawng ni hkan naw ngam nga ai shi a amyu masha ni hpe buga de woi wa na ra ai. 12 Dai Madu gaw bra ayai hkawm nga sai Israela hte Yuda amyu masha ni hpe lamu ga jut mali kaw nna bai woi la ai hte shinggyin da nga ai lam masha amyu baw hpe madun dan na nga, kumla dawnghkawn langai sharawt da na ra ai. 13 Israela mungdan gaw Yuda hpe galoi mung yu manawn sana n rai; Yuda gaw Israela a gumlau hpyen tai sana n rai. 14 Shanhte gaw sinna maga de nga ai Hpilisti masha ni hpe jawm gasat na mara ai, sinpraw maga de nga ai masha ni a sut gan hpe kashun la na mara ai. Shan gaw Edom hte Moba mung masha ni hpe gasat dang kau na mara ai, Amon masha ni gaw shan a ga hpe madat mara na mara ai. 15 Dai Madu gaw Nawng Hkyeng hpunggaw hpe jahkyet kau na ra ai, shi gaw Uhprat hka nu hpe hkun hkraw shangun na matu kahtet ai nbung shaga dat na ra ai, grai kaji ai hka shi sanit hpe sha tawn da na ra ai, shaloi kadai mung lai hkawm lu na ma ai. Ref 11:15: Shr 16:12. 16 Israela amyu masha ni Egutu mung na pru wa yang shanhte a kaji kawa ni a matu masat dingsat tai ya ai zawn, Asuri mung hta naw ngam nga ai Israela amyu masha ni a masat dingsat a matu nmaw lam kaba dai shara hta nga nga na ra ai.