11
1 Makam masham ngu ai gaw anhte myit mada nga ai arai ni kaja wa byin na re ngu ai lam hpe myit mu myit hkut nga ai hte, garai n mu lu ai arai ni gaw kaja wa nga nga ai ngu nna chye na hkap la ai hpe ngu ai rai nga ai.
2 Moi shawng de na masha ni gaw, shanhte a makam masham a majaw Karai Kasang a sharawng awng ai lam hpe lu la ma ai.
3 N mu lu ai arai ni kaw nna mu lu ai arai ni byin tai wa na matu Karai Kasang a mungga hte ndai nga yawng nga pra hpe hpan da sai lam anhte chye lu ai gaw dai makam masham a majaw rai nga ai. Ref 11:3: Nin 1:1; Shk 33:6; Yhn 1:3; 2Pe 3:5.
4 Kam sham ai hte Abela gaw Ka-in a hkungga hta grau kaja ai hkungga hpe nawng ya sai. Shi a makam masham hpe tau yu nna shi hpe ding hpring ai masha wa ngu nna Karai Kasang e hkap la ya ai hpe hkam la lu nu ai, hpa majaw nga yang, shi nawng ya ai kumhpa ni hpe Karai Kasang shi nan sharawng awng ya wu ai majaw rai nga ai. Abela si mat sai rai ti mung, shi a makam masham a majaw ya du hkra shi ga naw ashaga nga ai.Ref 11:4: Heb 12:24; Nin 4:4,10; Mat 23:35; 1Yh 3:12.
5 Kam sham ai majaw Enuk n si ai sha Karai Kasang e htawt la ai hkrum wu ai. Karai Kasang shi hpe htawt la kau ai majaw, shi hpe kadai mung tam n mu mu ai. Karai Kasang e htawt la ai garai n hkrum yang, ?Enuk gaw Karai Kasang a sharawng awng ai wa rai nga ai,? nga nna dai Chyum Laika hta tsun da nga ai.
6 Makam masham n rawng yang kadai mung Karai Kasang hpe sharawng awng shangun lu ai n rai, hpa majaw nga yang, Karai Kasang kaw sit shang ai wa kadai mung, Karai Kasang nga nga ai hte shi hpe hkan tam ai ni hpe chyeju htang jaw nga ai, ngu ai hpe kam sham ai wa rai lu na rai nga ai.
7 Du na ra ai aten hta byin na ra ai garai n mu lu ai arai ni hte seng nna Karai Kasang sadi jaw ai hpe Noa na lu ai gaw shi a makam masham a majaw rai nga ai. Shi gaw Karai Kasang a ga hpe madat mara let sanghpaw li langai mi shachyaw nna shi hte shi a nta dinghku gaw hkye hkrang la ai hkrum manu ai. Shing re ai majaw, mungkan ga hpe shi jeyang nna Noa gaw makam masham hte seng ai ding hpring ai sali wunli hkam la nu ai.Ref 11:7: Nin 6:13,22; Rom 3:22; Hpl 3:9; 1Pe 3:20.
8 Abraham gaw, Karai Kasang shi hpe jaw na ngu nna ga sadi jaw da ai mung de pru sa wa na matu makam masham gaw shi hpe madat mara shangun wu ai. Dai rai nna shi gaw gade sa wa nga ai hpe shi n chye ti mung, shi a mungdan kaw na pru hkawm mat wa ai.
9 Karai Kasang ga sadi jaw da ai mung hta e, shi gaw chyasam manam zawn makam masham hte nga hkawm nga ai. Shi gaw Karai Kasang kaw na shi zawn ga sadi a sali wunli jawm hkam la lu ai Isak hte Yaku zawn jang hpang nta ni hta rawng nga ai.Ref 11:9: Heb 6:17; Nin 12:8; 13:3,18; 18:1,9.
10 Hpa majaw nga yang, Abraham gaw Karai Kasang e hkrang kasi shapraw nna ngang grin ai npawt nhpang hte gaw gap da ngut sai mare hpe, shi myit mada ala nga ai.
11 Abraham gaw grai dingla ugut gu mat sai, Sara shi nan mung aprat lai sai majaw kasha n mai lu mat sai. Rai ti mung Abraham gaw kam sham ai hte kawa tai wa lu sai. Karai Kasang gaw shi ga sadi tawn da ai hte maren kangka ai Madu rai nga ai hpe Abraham kam hpa nga ai.Ref 11:11: Heb 10:23; Nin 17:19; 18:11-14, 21:2; Rom 4:21.
12 Abraham gaw kaja wa la chyasi zawn re ai wa rai nga ti mung, shi langai mi kaw nna mayat wa ai kashu kasha ni gaw lamu ningtsa na shagan ni hte nammukdara makau na hti n dang ai zaibru hkyep ni zawn law htam ai kashu kasha ni nga pra wa masai.Ref 11:12: Nin 22:17; Rom 4:18-19.
13 Ndai masha ni yawng gaw dai makam masham hta si wa masai. Shanhte gaw Karai Kasang jaw da ai ga sadi hte seng ai sali wunli hpe n hkam la lu ma ai, rai ti mung shanhte hpe tsan tsan kaw nna mu mada ai hte hkap tau hkalum la ma ai. Shanhte gaw ndai ga ntsa e chyasam hte malet nhprang shingbyi manam sha tai nga ma ai hpe asan sha yin la ma ai.Ref 11:13: Nin 23:4; 47:9; Shk 39:12; 1Pe 1:17; 2:11.
14 Dai lam ni hpe shing nga nna tsun ai ni gaw, shanhte nan nga na matu mungdan langai mi tam nga ma ai gaw dan leng nga ai.
15 Shanhte gaw shanhte pru kau da ai buga mungdan a lam hpe myit sumru nna marit taw nga ma ai n rai. Dai mung de wa mayu yang wa lu na ahkang lu tawn da na ma ai.
16 Ya chyawm gaw, dai hta grau ai sumsing lamu na buga mungdan hpe marit nga ma ai. Dai re ai majaw, Karai Kasang gaw shanhte a Karai Kasang re ai ngu na hpe kaya ma ai n rai, hpa majaw nga yang, Karai Kasang gaw shanhte a matu nga na shara langai mi lajang da ya manu ai.
17 Abraham gaw Karai Kasang e chyam yu hkrum ai shaloi, kam sham ai hte kasha Isak hpe shagu hkungga di nna nawng ya kau wu ai. Abraham gaw Karai Kasang kaw na ga sadi hkam la ai wa rai nga ai, rai ti mung shi gaw shi a kasha shingtai hpe hkungga di nna nawng ya kau na jin nga chyalu rai nga ai.Ref 11:17: Nin 22:1,9; Yak 2:21.
18 Karai Kasang gaw Abraham hpe, ?Ngai nang hpe ga sadi jaw da ai amyu matu ni Isak kaw nna mayat maya hkrat wa na mara ai,? ngu nna tsun wu ai.Ref 11:18: Nin 21:12; Rom 9:7.
19 Isak hpe si ai kaw na Karai Kasang hkrung sharawt la lu na re ai ngu nna Abraham myit sawn wu ai hte maren, kaja wa Abraham gaw Isak hpe si ai kaw na bai lu la wu ai.
20 Kam sham ai hte Isak gaw du na ra ai ten hta hkam la na rai nga ai shaman chyeju ni hte seng nna Yaku yan Esaw hpe ga sadi jaw ai.Ref 11:20: Nin 27:27,39.
21 Kam sham ai hte Yaku gaw, shi si wa magang yang, Yosep a kasha yan hpe shaman ya nna shi a dawhkrawng matu hta madi shamyet let Karai Kasang hpe nawku wu ai.Ref 11:21: Nin 47:21; 48:5,16,20.
22 Kam sham ai hte Yosep gaw shi si na aten ni wa ai shaloi Israela amyu masha ni Egutu mung kaw na lawt pru wa na lam hpe tsun jahprang dan nhtawm, shi a hkum tsawp ni hpe gara hku di na lam matsun ga ni jaw da mu ai. Ref 11:22: Nin 50:24-25; Bhk 13:19.
23 Kam sham ai hte Mawshe a kanu yan kawa gaw shi shangai ngut ai hpang shata masum tup shi hpe makoi da mu ai. Mawshe gaw grai tsawm ai ma rai nga ai hpe shan mu ma ai rai nna hkawhkam wa shapraw ai hkang da ai ga hpe lale na matu n hkrit ma ai.Ref 11:23: Pru 1:16,22; 2:2; Kas 7:20.
24 Dai Mawshe gaw kaba wa jang, makam masham hte Hpara-u a shayi sha a kasha ngu na hpe ningdang kau wu ai. Ref 11:24: Pru 2:10-11.
25 Shi gaw tawng marang mi sha, yubak a pyaw daw kadaw na hta Karai Kasang a amyu masha ni hte rau tsin-yam tsindam hkrum na hpe mahtang shi grau ra sharawng nga ai.
26 Shi gaw Meshia a matu jahpoi asawng hkrum ai gaw Egutu mungdan a sutgan yawng mayawng hta grau kaja reng nga ai ngu nna myit nawn wu ai, hpa majaw nga yang, shi gaw du na ra ai aten hta bai lu la na shagrau kumhpa hpe myit nga ai.
27 Kam sham ai hte Mawshe gaw Hkawhkam wa a masin pawt ai hpe n hkrit ai sha Egutu mung kaw na pru mat wa wu ai. Shi gaw myi hte n mu lu ai Karai Kasang hpe mu lu ai zawn Egutu mung de bai nhtang wa na hpe ningdang kau wu ai.
28 Shi gaw kam sham ai hte kasha alat ni hpe sat kau ai lamu kasa gaw Israela amyu masha ni a kasha alat ni hpe n sat u ga, Shalai Wa ai Poi woi galaw hpang nna sagu sai hpe chyinghka ni hta asai lapri bun na hkang da wu ai.Ref 11:28: Pru 12:21-23.
29 Kam sham ai hte Israela amyu masha ni gaw hkarang ntsa zawn Nawng Hkyeng hpe rap di lai lu ma ai; Egutu masha ni mung, dai zawn rap chyam yu mu yang lup si ai hkrum ma ai.Ref 11:29: Pru 14:22-29.
30 Kam sham ai hte Israela amyu masha ni gaw, sanit ya tup Yerihko mare hpe yan shinggrup ngut jang, dai mare bunghku ni hpe daw ru kau mat shangun lu ma ai. Ref 11:30: Ysh 6:20.
31 Kam sham ai hte shawa num Rahab gaw Israela kin-yu ni hpe hku hkau ai hku hkap hkalum la wu ai majaw Karai Kasang hpe n madat n mara ai ni hte rau sat kau ai n hkrum wu ai.Ref 11:31: Ysh 2:1; 6:23; Yak 2:25.
32 Ngai naw matut tsun ra na rai ni? Hpa majaw nga yang, Gidon, Barak, Samson, Yephta, Dawi, Samuela hte myihtoi ni a lam hkai dan na nga yang, nye a aten n dang law nga li ai.Ref 11:32: Trg 4:6; 6:11; 11:1; 12:7; 1Sa 1:20; 6:1,13.
33 Dai ni gaw kam sham ai hte masha mungdan ni hpe gasat nna dang kau lu ma ai, Shanhte gaw ding hpring ai lam hpe hkan sa galaw nna Karai Kasang ga sadi jaw da ai lam hpe hkam la ma ai. Hkanghkyi ni a n-gup ni hpe pat kau lu ma ai.Ref 11:33: Trj 14:5-6; 1Sa 17:34-35; 2Sa 7:11; Dan 6:22.
34 Ja la ai wan nsa ni hpe sat kau lu ma ai. Masha ni a nhtu nshan kaw na mung hprawng lawt lu ma ai. Shanhte n-gun kya ai rai ti mung, n-gun shaja ya ai lu la ma ai majaw majan pa e magrau grang lu ma ai hte masha tsasam ni a hpyen hpung ni hpe dang kau lu ma ai. Ref 11:34: Trg 15:8,15; 1Hk 19:3; 2Hk 20:7; Dan 3:25.
35 Numsha ni mung kam sham ai hte si mat sai shanhte a jinghku ni hpe hkrung sharawt ai hpe hkap lu la ma ai.
Nkau mi gaw shanhte hpe shalawt dat na ngu ai ahkaw ahkang hpe n hkap la ma ai sha, grau reng htum ai asak hkrung lam de hkrung rawt shang sha lu na matu zingri zingrat hkam let si wa ma ai. Ref 11:35: 1Hk 17:22; 2Hk 4:35; Kas 22:25.
36 Nkau mi gaw asawng asang anu kayat di nna gyit hkang sharen ai hte htawng hta bang da ai hkrum ma ai.Ref 11:36: Yer 20:2; 37:15.
37 Shanhte gaw nlung hte kabai sat ai, zingret hte ret dut sat ai, nhtu hte htau sat kau ai hkrum sha ma ai. Shanhte gaw matsan mayan rai nna zingri zingrat ai, nni nkri aroi arip re ai hkrum let sagu hpyi, bainam hpyi hpun nna htawt hkawm nga ma ai.Ref 11:37: 1Hk 21:13; 2Hl 24:21; Kas 7:58; 14:19.
38 Shanhte gaw ruyak jam jau hkrum nna shingbyi shara tam masha ni zawn nam mali ga hkan, bum alang ga hkan e, lung pu hku ni hte ga ginlawng hku ni hta nga hkawm nga ma ai: rai ti mung mungkan ga gaw shanhte hte n ging n dan nga malu ai.
39 Dai ni nlang hte gaw, shanhte a makam masham a majaw gade shagrau sha-a matsing da ya ai hkrum nga ma hka! Rai ti mung Karai Kasang ga sadi jaw tawn da ai chyeju hpe gaw garai n hkam la lu ma ai.
40 Hpa majaw nga yang, Karai Kasang gaw anhte a matu mara grau kaja ai shatawng shada ai lam hpe daw dan masat da nu ai. Dai shatawng shada ai lam gaw, anhte hte rau rai yang sha, shanhte gaw hkum tsup ai lam lu la na hku rai nga ai