3
1 Dai rai nna, anhte n sharang lu saga ai majaw, Ahten mare e anhte hkrai hti nan
nga na matu myit daw dan nhtawm,
2 Hkristu a Kabu Gara Shiga hkaw tsun ai hta anhte rau magam bungli galaw nga ai
anhte a hpu nau wa Timohti hpe shangun
dat ga ai.
3 Nanhte hta na kadai mung ndai ya hkrum hkra nga ai zingri zingrat lam ni a majaw
makam masham hta kangi kanga n rai myit
ga, nanhte hpe shadaw shalan n-gun jaw na
matu, nanhte hpang de shi hpe shangun dat
ga ai: Ndai zingri zingrat ai lam ni hpe
anhte hkrum hkra nga ai gaw, anhte a matu
Karai Kasang a yaw shada ai lam daw chyen
mi rai nga ai ngu ai hpe nanhte nan chye
nga myit dai.
4 Hpa majaw nga yang, anhte gaw zingri zingrat hkrum sha na raga ai lam, nanhte
hte rau anhte naw nga nga ai ten kaw nna
nanhte hpe tsun sadi jaw magang saga ai.
Dai hte maren hkrak sha ya byin wa sai
hpe nanhte atsawm sha chye nga myit dai.
5 Ngai matut nna n dang la ni ai majaw, nanhte a makam masham gara hku rai nga
ai lam mu chye lu na matu Timohti hpe
ngai shangun dat we ai. Kaja wa nanhte
gaw Nat e gunglau ai de hkan mat wa nna,
anhte a shakut shaja ai hte galaw da ai
amu ni kaman lila n tai shangun mayu ga
ai!
6 Ya chyawm gaw, Timohti gaw anhte hpang de bai du wa ra ai rai nna, nanhte hta makam
masham hte tsaw ra ai myit law htam wa sai
lam kabu gara hkalum la mai ai shiga gun
wa ya mi ai. Nanhte gaw anhte hpe tut
nawng e atsawm sha myit dum tsaw ra nga
myit dai hta n ga, nanhte hpe anhte grai
mu hkrum mayu ga ai hte maren, nanhte mung
anhte hpe mu hkrum mayu nga myit dai lam
anhte hpe wa tsun dan mi ai.
7 Dai rai nna hpu nau ni e, anhte ru yak jam jau hte nni nkri hkrum hkra nga ai ten hta
nanhte a lam na lu ai majaw n-gun lu la ga
ai. Dai gaw nanhte a makam masham a majaw
n-gun lu la ai lam rai nga ai.
8 Hpa majaw nga yang, nanhte Madu Yesu hta langai sha tai nna asak hkrung ai lam hta
ngang ngang kang kang tsap nga ai majaw
myit dik ai hku hkrung nga lu saga ai.
9 Ya chyawm gaw, nanhte a jaw e anhte a Karai Kasang hpe chyeju dum shakawn lu saga ai.
Nanhte a majaw Madu a man e anhte lu la ai
kabu gara ai lam a matu mara, anhte shi hpe
chyeju dum shakawn ga ai.
10 Anhte gaw nanhte hpe myi man chyaw mu hkrum lu na hte, nanhte a makam masham hta naw ra nga ai hpe shatup shatsup na matu, anhte a myit masin yawng hte shani shana hpyi nem
nga ga ai.
11 Anhte a Wa Karai Kasang shi nan hte Madu Yesu Hkristu gaw anhte a matu nanhte hpang
de sa wa na lam lajang ya u ga.
12 Nanhte shada da a ntsa e mung, masha yawng mayawng a ntsa e mung, nanhte tawn da ai
tsaw ra myit gaw, nanhte a ntsa e anhte
tawn da ai tsaw ra myit zawn grau grau
galu kaba wa shangun na matu Karai Kasang
nanhte hpe karum ya u ga law.
13 Ndai lam hku nna shi nanhte hpe shadaw shangang na ra ai. Anhte a Madu Yesu
gaw shi a chyoi pra ai ni yawng hte rau
bai du sa ai shaloi e, nanhte gaw anhte
a Kawa Karai Kasang a man e hkum tsup
nna chyoi pra san seng ai ni tai wa na
marin dai.