HTESALONI NI KAW SHAGUN DAT AI LAIKA LANGAI
(1 THESSALONIANS)
Ga Nhpaw
Htesaloni Mare gaw Roma mungdan kata na Makedoni mungdaw a mare daju rai nga ai.
Kasa Pawlu gaw Hpilipi mare na pru wa
nhtawm, dai mare hta nawku hpung langai
mi de da nu ai. Rai ti mung gade n na
yang, Htesaloni Mare e Yuda nawku htung
hta myit lawm wa magang nga ai Yuda masha
n re ai ni hta Hkristu a mungga hpe Pawlu
hkaw tsun ai shaloi awng dang wa ai majaw
Yuda masha ni manawn ai hte ninghkap ai
lam galaw wa ma ai. Dai re ai majaw Kasa
Pawlu gaw Htesaloni mare kaw nna Berea
mare de yen pru mat wa ra wu ai. Dai kaw
nna Korinhtu mare de du mat wa ai shaloi,
shi a magam gun manang rai nga ai Timohti
bai hkan du nang wa nna shi nan shana dan
ai Htesaloni Hpung a mabyin masa lam
shiga ni hpe hkap madat la wu ai.
Kasa Pawlu Htesaloni Hpung masha ni hpang de ka dat ai langai ngu na Laika hpe ka
ai a yaw shada ai lam gaw, Htesaloni Mare
e nga ai hpung masha ni hpe n-gun jaw,
myit nden marai lu la shangun na matu ka
dat wu ai. Dai laika hta shi gaw dai masha
ni a makam masham hte tsaw ra myit a majaw
chyeju shakawn nga ai. Shanhte hte rau shi
naw nga nga ai aten hta shi kaning rai
asak hkrung hkawm sa dan lai wa sai lam
hpe bai shadum mu ai. Dai hpang Hkristan
langai ngai gaw, ?Hkristu garai n du sa
ai laman si wa ai rai yang, Madu bai du sa
ai shaloi jaw na nga ai htani htana asak
hpe hkam la lu na kun?,? ngu ai ga san ni
Hkristan hpung kata hta san nga ma ai hpe
htai dan nga ai. Pawlu gaw ndai ahkaw
ahkang hpe la nna, Hkristan ni gaw Hkristu
bai du sa na ra ai ten hpe ala nga let
galaw ra ai amu ni hpe asim sha matut
galaw sa wa ra ai lam tsun matsun dat
mu ai.
1
1 Pawlu, Silaa 1:1: (Sila) (Silas) Siwanu (Silvanus): Ndai mying lahkawng
gaw Grik kaw na rai nna maren sha rai
ma ai. Gara hpe lang tim n shut ai.)
hte Timohti kaw nna Kawa Karai Kasang
hte Madu Yesu Hkristu a masha ni rai
nga ai, Htesaloni mare na hpung masha
ni hpang de laika ka dat ga ai. Chyeju
hte ngwi pyaw ai gaw nanhte hta anga
nga malit ga law.Ref 1:1: 2Ko 1:19;
2Ht 1:1; 2Pe 5:12.
2 Anhte gaw nanhte yawng a matu mara tut nawng e chyeju shakawn nga ga ai hte
anhte a akyu hpyi ai ga ni hta nanhte
hpe atsun shalawm nga ga ai.
3 Hpa majaw nga yang, nanhte a makam masham hta ta tut gara hku hkan sa nga myit dai
hpe mung, nanhte a tsaw ra ai myit a majaw
gade daram amu galaw shakut shaja nga myit
dai hpe mung, Madu Yesu Hkristu hta nanhte
a myit mada ai lam gade ngang kang nga
malit dai hpe mung, anhte a Wa Karai
Kasang a man e anhte myit dum nga ga ai.
4 Hpu nau ni e, Karai Kasang gaw nanhte hpe tsaw ra nna shi a amyu masha tai na matu
shaga la manit dai hpe anhte chye nga
ga ai.
5 Hpa majaw nga yang, anhte gaw dai Kabu Gara Shiga hpe ga hte sha n rai, n-gun
atsam hte mung, Chyoi Pra ai Wenyi hte
mung, dai Kabu Gara Shiga a teng man
ai hpe tsep kawp kam sham ai myit hte
mung, nanhte hpang de la sa nna hkaw
tsun ga ai. Anhte gaw nanhte hte rau
nga nga ai ten hta, nanhte a mai kaja
ai lam a matu mara anhte kaning rai
asak hkrung hkawm sa saga ai lam,
nanhte nan chye nga myit dai.
6 Nanhte gaw anhte a kasi ningli hte Madu a kasi ningli hpe len la hkan
sa nga myit dai. Nanhte gaw nni nkri
ru yak jam jau law law hkrum hkra
myit ti mung, dai Kabu Gara Shiga
hpe Chyoi Pra ai Wenyi kaw na lu la
ai kabu gara sharawng awng ai myit
hte hkap la myit dai.Ref 1:6: 1Ko 11:1; Hpl 3:17; 2Ht 3:9; Heb 10:34.
7 Dai re ai majaw nanhte gaw, Makedoni mung hte Ahkaia mung na kam sham ai
masha ni a man e kasi kamang langai
mi tai wa manit dai.
8 Hpa majaw nga yang, nanhte kaw na dai Madu a lam mungga gaw, Makedoni mung
hte Ahkaia mung ting hta kajai gumhkawng
wa ai sha n ga, Karai Kasang hta nanhte
kam sham nga ai makam masham shiga ni
mung shara shagu hkan e chyam bra wa
sai. Dai rai nna nanhte hpe hpa tsun
shara n nga saga ai.
9 Nanhte kaw anhte sa du ai shaloi, nanhte gara hku anhte hpe hkap hkalum la myit
dai hpe mung, nanhte gaw ahkrung nga ai
hte teng man ai Karai Kasang hpe daw
jau lu na matu gawkngu sumla ni hpe
shinggan kau nhtawm, Karai Kasang hpang
de kaning rai kayin wa myit dai mung,
10 sumsing lamu de na du sa na ra ai Karai Kasang a Kasha hpe ala nga myit dai hpe
mung, dai masha ni yawng tsun kajai nga
ma ai. Dai Kasha Yesu gaw, si mat ai
kaw na Karai Kasang e hkrung sharawt
la nna, du na ra ai Karai Kasang a pawt
sindawng ai kaw na anhte hpe mawai la
ai wa rai nga ai.