46
1 Yaku gaw shi lu malu mahkra lit bawn nhtawm shi a kawa Isak a Karai Kasang hpe shagu hkungga nawng jau ai Berasheba de yu sa wa wu ai.
2 Karai Kasang mung shana e shingran hta shi hpe, ?Yaku, Yaku!,? ngu nna shaga wu ai.
Shi mung, ?Rai sa, ngai nang e nga nga nngai,? ngu nna htan wu ai.
3 Shi mahtang, ?Ngai gaw Karai Kasang rai nga nngai, na nwa a Karai Kasang mung rai nga nngai; Egutu mung de yu sa na lam hkum hkrit nga et; dai yang e nang hpe ngai amyu kaba shatai na we ai.
4 Ngai mung nang hte rau Egutu mung de yu sa nna, dai kaw na ndai mung de na a amyu matu ni hpe ngai bai woi lung wa na nngai. Yosep mung nang si ai aten du hkra nang hte rau nga nga na ra ai,? ngu nna tsun wu ai.
5 Yaku gaw Berasheba kaw na rawt sa wa wu ai. Shi a shadang sha ni gaw shi hte shanhte a ma kaji hte madu jan ni hpe Egutu hkawhkam e shangun dat ai leng ni hta shajawn dat mu ai.
6 Shanhte mung Hkanan mung na shanhte lu ai yam nga ni hte sut gan arung arai ni hpe la nna, Egutu mung de sa mat wa ma ai. Yaku mung shi hte rau shi a amyu matu ni yawng rai nga ai, Ref 46:6: Kas 7:15.
7 shadang sha ni, lasha, numsha, hte kashu ni yawng hpe woi mat wa wu ai.
8 Ndai gaw Egutu mung de shi hte rau yu sa ai Yaku a dinghku hpung ni hta na shi a kasha alat Rubin hte Rubin a shadang sha ni a lam rai nga ai.
9 Rubin a shadang sha ni gaw Enuk, Hpalu, Hezron hte Hkarmi hte rai ma ai.
10 Simun hte shi a shadang sha ni gaw Yemuela, Yamin, Ohad, Yahkin, Zohara hte Hkanan num hta na Shaula hte rai ma ai.
11 Lewi hte shi a shadang sha ni gaw Gershon, Kohat hte Merari hte rai ma ai.
12 Yuda hte shi a shadang sha ni gaw Shela, Hparet, Zera hte rai ma ai. (Yuda a kaga kasha ngu na Era hte Onan chyawm gaw Hkanan mung e si mat masai.) Hparet a shadang sha ni gaw Hezron hte Hamula rai ma ai.
13 Yisahka hte shi a shadang sha ni gaw Htola, Hpua, Yashub hte Shimron ni rai ma ai.
14 Zebulun hte shi a shadang sha ni gaw Sered, Elon hte Yalela hte rai ma ai.
15 Ndai ni gaw Mesopotamia mung hta Yaku a matu Lea shangai ya ai shadang sha ni rai nga ai, dai hta jan nna shi a shayi sha Dina mung rai nga ai. Shi a matu mara ni ngu na Lea kaw na ni yawng sumshi masum rai ma ai.
16 Gad hte shi a shadang sha ni gaw Zehpu, Hagi, Shuni, Ezbon, Eri, Arodi hte Areli hte rai ma ai.
17 Ashe hte shi a shadang sha ni gaw Imna, Iswa, Iswi, Beria hte shanhte a kajan Sera hte rai ma ai. Beria a shadang sha yan gaw Hebera hte Malhkiela yan rai ma ai.
18 Laban a shayi sha Lea hpe jaw ai mayam num Zihpa kaw nna pra hkrat wa ai Yaku a matu mara ni gaw shi kru rai ma ai.
19 Yaku a madu jan Rahkela mahtang shi a matu Yosep yan Benyamin hpe shangai ya wu ai.
20 Egutu mung Heliopoli mare na hkinjawng Hpoti Hpera a shayi sha Asenat hta na Yosep a matu shaprat ai shadang sha ni gaw Manashe hte Ehprim yan rai ma ai. Ref 46:20: Nin 41:50-52.
21 Benyamin a shadang sha ni gaw Bela, Behkera, Ashbela, Gera, Naman, Ehi, Rosha, Muhpim, Hupim hte Arda hte rai ma ai.
22 Ndai ni gaw Yaku hte Rahkela kaw na shaprat ai shadang sha shi mali hte rai ma ai.
23 Dan a shadang sha gaw Hushim rai nga ai.
24 Naphtali hte shi a shadang sha ni gaw Yazela, Guni, Yezera hte Shilem ni rai nga ai.
25 Laban a shayi sha Rahkela hpe jaw ai mayam num Bila hta na Yaku a matu shaprat ya ai matu mara sanit hte rai ma ai.
26 Yaku a kanam ni n lawm ai sha, Egutu mung de sa wa ai shi a nshang hkrat ni yawng kru shi kru rai ma ai.
27 Egutu mung e Yosep shaprat ai shadang sha lahkawng mung lawm ai rai yang, Egutu mung de du ai Yaku a amyu matu ni yawng marai sanit shi rai ma ai. Ref 46:27: Kas 7:14.
28 Shanhte du shang wa ai shaloi, Goshen mung e shanhte hpe sa tau la na matu Yosep hpe sa hkrum la na nga, Yaku gaw shi a shawng e Yuda hpe shangun dat wu ai.
29 Shanhte du shang wa ma yang, Yosep gaw shi a gumra leng hta jawn nna kawa hpe sa tau la na nga, Goshen mung de lung mat wa wu ai. Shan shada hkrum ai hte rau Yosep mahtang shi kawa a du hta ahpum noi let na na wa hkrap nga wu ai.
30 Yaku gaw Yosep hpe, ?Ya chyawm gaw nang hpe mu ni ai; nang gaw ahkrung nga ndai hpe ngai chye ni ai majaw si na jin jin rai nga nngai,? ngu nna tsun wu ai.
31 Dai hpang Yosep gaw shi a kahpu kanau ni hte shi a kawa a dinghku masha ni hpe, ?Hkanan mung na nye a kahpu kanau ni hte nye wa a dinghku masha ni yawng ngai kaw du nga sai lam, hkawhkam wa hpe ngai wa shana na nngai.
32 Nanhte gaw sagu bainam, yam nga rem sha nna nga ai sagu rem ni rai nga myit dai rai nna nanhte a sagu, bainam hpung ni hpe mung nanhte a yam nga hpung ni hpe mung, nanhte lu malu mahkra hpe mung la sa mara ai, ngu nna hkawhkam wa hpe wa tsun shana na nngai.
33 Hkawhkam wa nanhte hpe shaga nna nanhte hpa galaw sha myit ta?, ngu nna san myit yang,
34 nanhte a jiwoi jiwa ni a prat kaw nna nanhte a prat du hkra, yam nga rem sha ai ni rai nga ga ai, ngu nna tsun na rai myit dai. Dai hku tsun yang sha, shi nanhte hpe Goshen mung e shanu shangun na ra ai,? ngu nna tsun wu ai. Egutu masha ni mahtang sagu bainam rem sha ai ni hte hpa mung n seng mayu nga ma ai majaw dai ga Yosep tsun wu ai.