44
1 Yosep gaw shi a nta hpareng ai shangun ma wa hpe, ?Ndai ni a nhpye htingpa ni hta shanhte htaw lu ai made mam baw jahpring dat ya nhtawm, langai hte langai a gumhpraw ni hpe mung tinang nang a nhpye htingpa mahka hta bang dat ya u.
2 Nye a gumhpraw gawm hpe kanau hpungdim wa a nhpye htingpa mahka hta nai mam mari na matu la sa ai gumhpraw hte hpawn bang dat u,? ngu nna hkang dat wu ai. Shi mung hkang dat ai hte maren galaw wu ai.
3 Jahpawt manap jau jau aten e, dai kahpu kanau ni hpe shanhte a lawze ni hte rau dat dat mu ai.
4 Shanhte gaw mare hte kade wa n tsan ai shara hta naw hkawm nga ma yang, Yosep gaw shi a nta hpareng ya ai shangun ma wa hpe, ?Wora masha ni hpang de tin tin hkan su; nang shanhte hpe hkan dep ai shaloi, ?Nanhte gaw mai kaja lam hpe n kaja ai hte hpa rai htang nga myit ni?
5 Nye madu a gumhpraw gawm hpe hpa rai nanhte lagu la nga myit ni? Dai gaw shi lu ai gawm rai nna shaba wawt yang lang ai gawm mung rai nga ai. Ya nanhte gaw grai sawng ai ru hka amu she shut kau manit myit hka!,?? ngu nna shanhte hpe san u, ngu nna tsun wu ai.
6 Dai shangun ma wa shanhte hpe hkan dep ai shaloi, ndai ga ni hpe shi kahtap tsun wu ai.
7 Shanhte gaw, ?Madu e, dai zawn nga nna tsun mi ai gaw kaning ngu mayu nga ndai kun? Dai zawn re ai amu anhte n galaw shut yu ga ai hpe dagam lu ga ai.
8 Anhte a nhpye htingpa mahka ni hta mu ai gumhpraw ni hpe pyi Hkanan mung kaw na nang hpang de bai la sa saga ai hpe nang chye nga ndai. Dai she rai yang me, na a madu a nta kaw na ja gumhpraw anhte hpa rai lagu na rai nga ga ta?
9 Madu e, anhte hta na marai langai ngai hta dai hpe mu ai rai yang, shi si lu na rai wu ai; anhte mung na a mayam ni tai na saga ai,? ngu nna tsun ma ai.
10 Shi gaw, ?Ngai myit hkrum ya nngai; rai ti mung dai gawm hpe la ai wa chyu sha nye a mayam tai lu na, nanhte hta na ngam ai ni yawng chyawm gaw lawt lu na rai myit dai,? ngu nna tsun mu ai.
11 Dai rai nna shanhte mung shanhte a daw ni hpe ga de tin tin shayu nhtawm kadai mung kadai tinang nang a nhpye htingpa ni hpe hpaw yu ma ai.
12 Yosep a shangun ma wa mung kaba htum ai wa kaw nna kaji htum wa kaw du hkra, azin ayang sawk tam wu yang, Benyamin a nhpye htingpa hta dai gawm hpe mu wu ai.
13 Bai kahpu kanau ni gaw yawn hkyen ai hte shanhte a hpun palawng ni hpe gang je kau nna shanhte a lawze ni hta daw mara nhtawm mare de bai nhtang wa ma ai.
14 Yuda hte shi a kahpu kanau ni Yosep a nta de shang wa ai shaloi, shi mung dai yang e naw nga nga wu ai. Shanhte shi a man e gum dagup nga ma yang,
15 Yosep gaw, ?Nanhte hpa galaw kau myit ta? Ngai zawn san ai masha wa gaw nanhte hpe shaba wawt let tam shapraw la lu ai hpe nanhte n chye nga myit ni?,? ngu nna san mu ai.
16 Yuda chyawm gaw, ?Madu e, nang hpe anhte hpa tsun lu na rai nga ga ta? Anhte kaning rai ndang hkat lu na ga ta? Anhte gaw tinang hkum hpe kaning rai jasan shapra lu na rai nga ga ta? Karai Kasang mung anhte a mara n magap da ya mani ai. Ya chyawm gaw dai gawm mu hkrum ai wa sha n-ga, anhte yawng mung na a mayam ni rai nga saga ai,? ngu nna htan wu ai.
17 Yosep gaw, ?Dai hku n rai law! Dai zawn re ai amu hpe ngai galoi mung galaw na we ai n rai! Gawm la hkrum ai wa chyu sha nye a mayam tai na rai nga ai. Nanhte ngam ai ni chyawm gaw nanhte a kawa hpang de shim lum ai hte angwi apyaw sha nhtang wa mu,? ngu nna tsun wu ai.
18 Yuda chyawm gaw Yosep hpang de sit lung wa nna, ?Madu e, chyeju hte nang hte n dut n dang ga shaga lu na ahkang jaw e law; ngai hpe mung masin hkum pawt et; nang gaw hkawhkam wa zawn rai nga ndai.
19 Madu e, nang chyawm gaw anhte hpe, ?Nanhte kawa lu myit ni? Kaga kanau naw lu myit ni?,? ngu nna san yu nit dai.
20 Anhte mung, ?Kawa dingla lu ga ai; shi dingla wa sayang she shangai wa ai anhte a kanau hpungdim mung naw nga ai. Dai ma a kahpu chyawm gaw si mat sai rai nna shi a kanu hta na shi hkrai sha hkrung nga sai majaw shi a kawa shi hpe nachying wa tsaw ra nga ai,? ngu nna htan ma ai.
21 Madu e, nang shi hpe mu lu n ga, ndai de shi hpe woi sa wa na mung nang anhte hpe tsun nit dai.
22 Anhte chyawm gaw dai ma shi kawa hte n hka lu ai; shi rai nna hka lu ai rai yang chyawm gaw shi a kawa si mat na wu ai ngu nna mung tsun yu saga ai.
23 Nang mahtang, ?Nanhte a kanau hpungdim wa hpe nanhte hte rau n woi sa ai rai yang, na a man de bai shang lu na myit dai n rai,? ngu nna tsun nit dai.
24 Anhte gaw anhte a kawa hpang de bai nhtang wa yang, nang tsun ai ga hte maren, shi hpe tsun dan saga ai.
25 Dai hpang shi mung lusha loi mi bai sa mari la na matu nhtang sa shangun mi ai.
26 Anhte gaw, ?Anhte n sa lu na saga ai. Anhte a kanau hpungdim wa anhte hte rau n lawm yang, dai wa a man e anhte shang lu na ga ai n rai. Anhte a kanau hpungdim wa sa lawm ai rai yang chyu sha anhte sa lu na saga ai,? ngu nna htan saga ai.
27 Anhte a kawa gaw anhte hpe, ?Nye a madu jan Rahkela gaw ngai hpe shadang sha lahkawng sha shangai ya ai gaw nanhte chye nga myit dai.
28 Shan hta na langai mi mahtang ngai hpe tawn kau da nga sai. Shi hpe matse labye dusat ni e ashep ashin di gang amya je kau manu ai rai nna shi tawn kau da ai shani kaw nna ngai shi hpe n mu yu mat ni ai.
29 Ya mung ndai langai mi hpe nanhte ngai kaw na woi mat wa nhtawm shi hta nhpru nmai ai lam lama ma byin ai rai yang, ngai dingla ni ai hte maren nanhte ngai hpe yawn hkyen jahkrum nna sat kau na myit dai,? ngu nna tsun mi ai.
30-31 Yuda gaw matut nna, ya chyawm gaw madu e, ?Nye wa hpang de ndai ma n lawm ai sha nhtang wa ai rai yang, ngai hte rau ma dai n lawm wa ai hpe shi hkap mu mada ai hte shi si mat na wu ai. Shi a asak gaw dai ma a asak hta manoi nga ai rai nna, ya shi grai dingla wa sai hte maren, anhte shi hpe yawn hkyen jahkrum nna sat kau na ga ai.
32 Ngai gaw dai ma a matu nye wa hpe nye a asak hte ga sadi jaw da nngai. Dai ma hpe shi hpang de ngai bai n woi wa ai rai yang, nye a asak prat tup mara gun nga sana nngai.
33 Ya chyawm gaw madu e, ngai mahtang ma a malai na a mayam tai na matu ndai yang e nga nga na nngai. Shi hpe chyawm gaw shi a kahpu ni hte rau nhtang wa shangun ya e.
34 Dai ma ngai hte rau n rai yang, kaning rai wa kaw ngai nhtang wa na rai nga a ta? Nye wa a ntsa hta hkrat wa na ru yak tsin-yam tsindam dai hpe ngai n lu yu na nngai,? ngu nna tsun wu ai.