2
Dai hpang shi mali ning lai yang she Titu hpe mung woi shalawm let Barnaba hte rau Yerusalem mare de ngai bai lung wa nngai.Ref 2:1: Kas 11:30; 15:2. Ning rai ngai lung wa ai gaw Karai Kasang jaw ai shingran ga hte maren rai nga ai. Ningbaw ningla ni san san hte hpawng ai zuphpawng hta maigan masha ni hpe ngai hkaw tsun ai Kabu Gara Shiga a lam tsun sanglang dan nngai. Ndai zawn tsun sang lang dan ra ai lam gaw, shawng de rai ti mung, ya e rai ti mung ngai galaw gun hpai shakut nga ai magam amu hpe kaman lila sum mat ai lam n byin shangun mayu ai majaw rai nga ai. Nye a manang wa Titu gaw Heleni masha rai nga timung kadai shi hpe adip arip hku nna matu n gadoi shangun ma ai. Masha nkau mi chyawm gaw gadoi shangun mayu ma ai. Dai masha ni gaw anhte Hkristu Yesu hte langai sha tai nna asak hkrung ai a marang e anhte lu la ai shanglawt ahkang hpe kin-yu yu na matu Hkristan hpu nau ni tai masu let anhte a hpawng de mayun shang wa ai ni rai ma ai. Shanhte gaw anhte hpe mayam shatai mayu da mi ai.
Rai ti mung dai Kabu Gara Shiga a teng man ai lam nanhte a matu agrin nga lu u ga, anhte gaw shanhte hpe manit hkum mi pyi asum jaw shayawm ya ga ai n rai.
Arawng lu ai ningbaw ningla n san ai ni - shanhte kaja wa ningbaw ningla ni re ai n re ai gaw nye a matu hpa laklai ahkyak n rai nga ai; hpa majaw nga yang Karai Kasang gaw shinggan lam mu mada ai hku yu nna n daw dan ai. Dai arawng lu ai n san ai ningbaw ningla ni gaw ngai hpe hpaji jaw ai lam ningnan hpa mi n nga ai.Ref 2:6: Trj 10:17. Shanhte ngai hpe hpaji ningnan jaw na malai Karai Kasang gaw Petru hpe matu gadoi hkam ai Yuda ni hpe dai Kabu Gara Shiga hkaw tsun na lit jaw ya sai hte maren ngai hpe mung matu gadoi n hkam ai maigan masha ni hpe hkaw tsun na lit ap ya sai lam shanhte mu chye ma ai. Hpa majaw nga yang, Karai Kasang a n-gun atsam hte Petru hpe Yuda masha ni a matu kasa aya hte dang da sai hte maren, ngai hpe mung maigan amyu ni a matu mara kasa aya hta dang da ni ai. Shing rai ngai hpe jaw da ai chyeju hpe mu ma ai shaloi, nawku hpung a daw hpum ningbaw ningla ni ngu ging na n san ai Yaku, Petru hte Yawhan hte gaw Karai Kasang ngai hpe jaw ya sai laksan lit hpe masat masa galaw ya masai; dai rai nna anhte yawng gaw magam gun kanawn manang ni re ai lam kumla madun ai hku nna shanhte gaw Barnaba hte ngai hpe hkra lata matut shakram la mani ai; anhte gaw maigan masha ni kaw magam gun na hte, shanhte gaw Yuda masha ni kaw magam gun na matu myit hkrum da saga ai. 10 Shanhte gaw anhte hpe matsan mayan ni a ra ai lam hta karum la na matu n malap na hpe sha htet dat mi ai hte ndai lam gaw ngai grai shakut gun hpai mayu ai amu nan rai nga ai.
11 Rai ti mung Antioki mare de Petru sa du ai shaloi, shi a galaw sa wa ai sat lawat shut nga ai lam dan leng nga ai majaw, ngai shi hpe shawa masha ni a man e mara shagun let daru jet kau we ai. 12 Yaku shangun dat ai masha nkau mi dai de garai n du sa wa ai shawng e Petru gaw maigan hpu nau ni hte rau shat sha nga ai, rai ti mung dai shangun dat hkrum ai masha ni du sa wa ai shaloi matu gadoi hkam ai ni hpe hkrit kang nga ai majaw maigan masha ni hte rau shat sha nga ai kaw na pru yen mat ai. 13 Kaga Yuda hpu nau ni mung, Petru hte rau nden marai n rawng ai ni zawn yawng nang mat wa ai majaw, Barnaba pyi gaw shanhte hta lawm nang magang mat wa ai. 14 Ya shanhte Kabu Gara Shiga a teng man ai lam hta ding ding n hkawm n sa nga ma ai hpe ngai mu mawe ai shaloi, shanhte yawng a man e Petru hpe, ?Nang gaw Yuda masha rai nga ninglen Yuda masha zawn n rai, maigan masha ni zawn rai nga nhtawm me, maigan masha ni hpe Yuda masha ni zawn sak hkrung nga lu hkra kaning di shadut shagwi lu na n ta?,? ngu nna ngai tsun we ai.
15 Anhte gaw Yuda sai jet amyu masha ni rai nga ga ai, Yubak mara lu ai maigan masha ni ngu nna shamying ai ni n rai ga ai. 16 Rai ti mung masha gaw jep ai tara hpe hkan sa shadik ai magam bungli hte Karai Kasang a man e ding hpring wa lu ai n rai; Yesu Hkristu hpe kam sham ai hte sha ding hpring wa lu ga ai hpe anhte chye ga ai majaw anhte mung jep ai Tara hpe hkan sa shadik ai magam bungli hte n rai, Hkristu Yesu hpe kam sham ai a marang e Karai Kasang a man e ding hpring ai ni tai wa lu u ga, anhte pyi Hkristu Yesu hta e kam sham saga ai; hpa majaw nga yang, dai jep ai Tara hpe hkan sa shadik ai magam bungli hte kadai mung Karai Kasang a man e ding hpring ai kaw n du wa lu ma ai.Ref 2:16: Shk 143:2; Kas 13:38-39; Rom 1:17; 3:20,22; Heb 7:18-19. 17 Dai rai nna anhte gaw Hkristu hte langai sha tai ai a marang e Karai Kasang a man e ding hpring wa lu u ga, shakut ai lam hta anhte nan mung maigan masha ni zawn yubak mara lu ai ni rai nga ga ai hpe mu hkrup saga yang gaw, Hkristu shi nan yubak galaw ai lam hpe n-gun jaw woi aw law nga ai ngu tsun lu na kun? Gara hku nna mung n mai byin ai. 18 Hpa majaw nga yang, shawng e ngai sharun shabya kau sai jep ai Tara a masa lam hpe ngai bai gaw shagrin da magang ai rai yang gaw, ngai gaw jep ai tara tawt lai ai masha tai na nngai. 19 Jep ai Tara hte seng nna she tsun ga nga yang, jep ai Tara e nan ngai hpe sat kau ni ai rai nna, ngai gaw jasi rai mat ni ai. Ngai gaw Karai Kasang a matu hkrung nga n ga, Hkristu hte rau shi a wudang hta jen sat kau ai hkrum ni ai. 20 Dai rai nna ngai hkum nan naw hkrung nga nngai n rai; Hkristu she ngai hta e asak hkrung nga ai. Ndai ya e ngai hkrung nga ai asak gaw, ngai hpe tsaw ra nna nye a matu mara shi a asak nawng kau ai Karai Kasang a Kasha hpe kam sham ai a marang e hkrung nga ai asak rai nga ai. 21 Ngai gaw Karai Kasang a chyeju hpe ningdang kau na hkraw nngai n rai; hpa majaw nga yang masha gaw jep ai tara hte Karai Kasang a man e ding hpring wa lu ai rai yang gaw, Hkristu gaw kaman lila sha si hkam kau nu ai.