8
Shu
Dai hpang Madu gaw Mawshe hpe, ?Hkawhkam wa kaw shang nna dai Madu shi hpe ning ngu ai lam tsun u: ?Nye a amyu masha ni ngai hpe nawku lu mu ga, shanhte hpe dat ya mi. Lama wa nang n hkraw ai rai yang, ngai gaw na a mungdan hpe shu ni shaprang dat ai hku ari jaw na we ai. Nila hka nu gaw shu ni hte hpring chyat wa nhtawm dai ni kanawng pru wa nna na a hkawhkam htingnu kata de mung, na a yup gawk hte yup ra de mung, na a du salang ni hte mung masha ni a dum nta ni hta mung, na a wan htung ni hte muk kabaw ai di dam ni hta du hkra pyi lung wa na mara ai. Dai shu ni gaw nang hta mung, na a amyu masha ni hta mung, na a du salang ni yawng hta mung gumjawt lung wa na mara ai.??
Dai Madu gaw Mawshe hpe, ?Arun gaw dawhkrawng hte hka nu, hka hkawng, hka lawng, hte hka nawng ni a ntsa de ladawn nna shu ni hpe shalun nhtawm Egutu mung ting hpe ka-up kau u,? ngu nna tsun shangun wu ai. Dai rai nna Arun mung hka ni yawng a ntsa e dai dawhkrawng hpe ladawn dat wu ai rai nna shu ni gumtsat lung wa ai hte dai mung hpe ka-up kau ma ai. Rai ti mung mandan lakle sara ni shanhte a lakle hpaji lang nna mung Egutu mung hta shu shalun la ma ai.
Hkawhkam wa gaw Mawshe yan Arun hpe shaga la nna, ?Ndai shu ni hpe seng kau ya na matu dai Madu kaw hpyi nem ya mi, shaloi dai Madu hpe hkungga nawng jau lu na matu na a amyu masha ni hpe ngai dat dat ya na nngai,? ngu nna tsun wu ai.
Mawshe gaw, ?Ngai mung kabu gara ai hte na a matu hpyi nem ya na nngai. Na a matu mung, na a du salang ni hte na a mung masha ni a matu hte hpawn hpyi nem ya na aten hpe sha masat ya e. Dai hpang nang gaw shu ni hpe seng kau lu na rai ndai, Nila hka hta kaga, dai yang hkan na shu ni langai mi mung ngam nga na ra ai n rai.
10 Hkawhkam wa gaw, ?Nye a matu hpawt de mahtang hpyi nem ya e,? ngu nna htan wu ai.
Mawshe gaw, ?Nang san ai hte maren ngai galaw na rai nna anhte a Madu Karai Kasang zawn re ai karai kaga n nga ai hpe nang chye lu na rai ndai. 11 Shu ni gaw nang hte na a du salang ni kaw na mung, na a mung masha ni kaw na mung pru mat wa nhtawm, Nila hka nu hta kaga, dai yang hkan langai mi mung ngam na n rai,? ngu nna tsun wu ai. 12 Dai hpang Mawshe yan Arun gaw hkawhkam wa kaw nna pru mat wa nhtawm, hkawhkam wa a ntsa e shalun da ai shu ni hpe seng kau ya na matu, Mawshe mahtang dai Madu kaw hpyi nem ya wu ai. 13 Dai Madu gaw Mawshe hpyi nem ya ai hte maren galaw wu ai rai nna, nta hkan na mung, hkaw wang hte yi hkauna pa ni hkan e prang hkawm ai shu ni yawng si htum mat ma ai. 14 Egutu masha ni mung dai shu chyasi ni hpe hkan hta sumpum da ma ai rai nna mung ting manam hkying nga ai. 15 Hkawhkam wa gaw shu ni si jawng nga ai hpe mu jang, dai Madu tsun da nu ai hte maren, shi a myit masin bai ja wa ai hte Mawshe yan Arun a ga bai n madat ya wu ai.
Janghkam
16 Dai Madu gaw Mawshe hpe, ?Shi a dawhkrawng hte aga kayat dat na lam Arun hpe tsun u; shaloi Egutu mung ting na ga nhpu gaw janghkam ni tai wa na mara ai,? ngu nna tsun wu ai. 17 Dai rai nna Arun gaw shi a dawhkrawng hte aga kayat dat wu yang, Egutu mung na ga nhpu ni yawng janghkam tai wa nhtawm masha hte yam nga ni hta ginjup kap nga ma ai. 18 Mandan lakle sara ni mung janghkam ni hpe shapraw dat na nga, shanhte a mandan lakle hpaji lang shakut yu ma ai; rai ti mung shanhte n dang di lu ma ai. Janghkam ni gaw shara shagu hkan nga nga ma ai. 19 Mandan lakle sara ni mahtang hkawhkam wa hpe Karai Kasang gaw ndai amu hpe galaw nu hka!,? ngu nna tsun ma ai. Rai ti mung dai Madu tsun nu ai hte maren, hkawhkam wa masin bai ja wa nna, Mawshe yan Arun a ga bai n madat ya wu ai. Ref 8:19: Luk 11:20.
Jinu
20 Dai Madu gaw Mawshe hpe, ?Hpawt de manap jau jau aten hta, hka nu de yu sa wa ai hkawhkam wa hpe sa hkrum nhtawm, dai Madu ning nga tsun ai ga tsun u: ?Nye a amyu masha ni hpe dat dat u; shaloi shanhte ngai hpe nawku lu na rai ma ai. 21 Dai ga hpe nang ningdang kau ai rai yang chyawm gaw, nang hte na a du salang ni a ntsa e mung, na a amyu masha ni a ntsa e mung jinu ni hpe dat dat nna ari jaw na de ai ngu, ngai nang hpe sadi jaw nngai. Egutu masha ni a nta ni hta jinu ni hte hpring nga nna aga hta mung dai ni hte ka-up da na ra ai. 22 Rai ti mung, nye a amyu masha ni shanu nga ai Goshen mung hta chyawm gaw hti shangam da na nngai; dai shara hta jinu hpa mung nga na ra ai n rai. Ndai amu hpe ngai galaw na nngai; Ngai Madu nan ndai mung hta amu galaw nga nngai hpe nanhte chye lu na myit dai. 23 Nye a amyu masha ni hte na a amyu masha ni a lapran e dan leng ai ginhka lam ngai tawn da na we ai. Dai mauhpa lamik kumla gaw hpawt ni e byin pru wa na ra ai,?? ngu nna tsun wu ai. 24 Dai Madu gaw hkawhkam wa a htingnu hte shi a du salang ni a nta kata de jinu wunawng ni hpe dat bang dat ya wu ai. Egutu mung ting gaw dai jinu ni a majaw hten mat wa nga ai.
25 Dai hpang hkawhkam wa gaw Mawshe hte Arun yan hpe shaga la nhtawm, ?Nanhte sa nna ndai mung e nan nanhte a Karai Kasang hpe shagu hkungga ni nawng ya mu,? ngu nna tsun wu ai.
26 Mawshe mahtang, ?Dai hku she galaw na rai yang gaw n jaw na re; Dai Madu anhte a Karai Kasang hpe nawng jau ai yam nga ni a majaw Egutu masha ni hpe shut kau na ga ai; dai yam nga ni hpe lang nna Egutu masha ni mu lu ai shara hta dai ni hpe hkungga nawng jau ga ai rai yang, Egutu masha ni hpe shut kau ai a majaw anhte hpe nlung hte kabai sat kau na mi ai. 27 Shi anhte hpe hkang da sai hte maren, dai Madu anhte a Karai Kasang hpe hkungga nawng ya na matu, masum ya sat sa ai nam mali de mahtang anhte sa ra na ga ai,? ngu nna htan wu ai. 28 Hkawhkam wa gaw, ?Nanhte tsan tsan de n sa na myit dai rai yang chyawm gaw dai Madu nanhte a Karai Kasang hpe nam mali e hkungga nawng jau shangun na made ai; nye a matu mung hpyi nem ya mi,? ngu nna tsun wu ai.
29 Mawshe mung, ?Ngai pru mat wa ai hte rau hpawt de jang, nang hte na a du salang ni kaw na mung, na a amyu masha ni kaw na mung jinu hkoi mat hkra dai Madu kaw hpyi nem ya na nngai. Rai ti mung, dai Madu hpe hkungga nawng jau na matu sa wa ai masha ni hpe tau nna hkum da ai hte anhte hpe bai hkalem lu na ndai n rai,? ngu nna htan wu ai.
30 Mawshe gaw hkawhkam wa kaw na pru mat wa nhtawm, 31 dai Madu hpe hpyi nem ya wu ai. Mawshe hpyi nem ya ai hte maren, dai Madu galaw wu ai. Dai rai nna hkawhkam wa kaw na mung, du salang ni kaw na mung, amyu masha ni kaw na mung, jinu langai mi pyi n nga mat hkra hkoi mat nga ai. 32 Rai ti mung ndai aten du hkra, hkawhkam wa masin naw ja nga ai rai nna amyu masha ni hpe n dat ya hkraw wu ai.