6
1 Shaloi dai Madu gaw Mawshe hpe, ?Hkawhkam wa hpe ngai kaning di na gaw ya nang mu lu na rin dai. Ngai gaw shi hpe nye a amyu masha ni hpe dat dat shangun na matu shagyeng na we ai. Kaja wa teng teng, shanhte hpe shi a mung kaw nna gawt shapraw kau dat lu hkra ngai shi hpe shadut na we ai,? ngu nna tsun wu ai.
2 Karai Kasang gaw Mawshe hpe, ?Ngai gaw dai Madu rai nga nngai. Ref 6:2-3: Nin 17:1; 28:3; 35:11; Pru 3:13-15.
3 Ngai gaw Abraham, Isak hte Yaku ni kaw Chyahtum Chyalai N-gun Rawng Ai Karai Kasang hku dan pru ni ai; rai ti mung Ngai hkum nan shanhte hpe nye a chyoi pra ai mying ningsang dai Madu rai nga ai hpe n chye shangun mawe ai.
4 Maigan masha ni zawn shanhte shanu lai wa yu sai Hkanan mung hpe jaw na ngu nna tawn da ai ga sadi, ngai shanhte hte mung ga shaka tawn da se ai.
5 Ya mung, Egutu masha ni mayam shatai da ai Israela amyu masha ni a madai sharung ai nsen hpe ngai na ni ai rai nna nye a ga shaka hpe dum ni ai.
6 Dai rai nna ngai gaw shanhte hpe, ?Ngai gaw dai Madu rai nga nngai majaw nanhte hpe hkrang shaw la ai hte Egutu masha ni yam sha ai mayam prat kaw na shalawt dat na made ai. Shanhte a ntsa e mung, hkrit hpa ari kaba shapraw na matu nye a n-gun rawng ai lahpum hpe sharawt tawn nna nanhte hpe hkye hkrang la na nngai.
7 Ngai gaw nanhte hpe nye a amyu masha majing hku shatai la nna, nanhte a Karai Kasang tai na nngai. Ngai gaw Egutu mung mayam prat kaw na nanhte hpe shalawt dat ai nanhte a Karai Kasang dai Madu rai nga ai hpe nanhte chye lu na marin dai.
8 Ngai gaw Abraham, Isak hte Yaku ni hpe jaw na ngu nna dagam shaka da sai ga sadi mungdan de nanhte hpe woi wa nna nanhte a sut gan sali wunli zawn nanhte hpe jaw na made ai. Ngai gaw dai Madu rai nga nngai,?? ngu nna Israela amyu masha ni hpe tsun u.
9 Mawshe gaw dai lam Israela amyu masha ni hpe tsun wu ti mung, shanhte a mazut ai mayam prat hta hten run mat sai shanhte a wenyi a majaw shanhte shi a ga hpe n madat na ma ai.
10 Dai hpang dai Madu gaw Mawshe hpe,
11 ?Israela masha ni shi a mung kaw na pru mat wa shangun lu na lam, Egutu hkawhkam wa hpe sa tsun su,? ngu nna tsun wu ai.
12 Rai ti mung Mawshe gaw, ?Israela amyu masha ni pyi nye a ga n madat nga ma yang, hkawhkam wa gaw kaning rai madat ya na rai nga a ta? Ngai gaw ga ningtam n rawng ai wa she rai nga nngai,? ngu nna htan wu ai.
13 Dai Madu gaw Mawshe yan Arun hpe ning ngu hkang da wu ai: ?Israela amyu masha ni hpe Egutu mung kaw na woi shapraw wa na matu nan hpe ngai hkang da se ai lam Israela amyu masha ni hpe mung, Egutu hkawhkam wa hpe mung tsun mu.?
14 Yaku a shadang sha alat Rubin gaw shadang sha mali lu nga ai; dai ni gaw Hanuk, Hpalu, Hezron, hte Hkadmi hte rai ma ai; shanhte gaw shanhte a amying hku hkan nna ran yu wa ai amyu lakying ni a kaji kawa ni tai wa ma ai.
15 Simun gaw shadang sha kru lu nga ai; dai ni gaw Yemuela, Yamin, Ohad, Yahkin, Zohara hte Hkanan num hta na lu ai shadang sha Shaula hte rai ma ai. Shanhte mung shanhte a amying hku hkan nna ran yu wa ai amyu lakying ni a kaji kawa ni rai ma ai.
16 Lewi gaw shadang sha masum lu nga ai; dai ni gaw Gershon, Kohat hte Merari hte rai ma ai. Shanhte gaw shanhte a mying hku hkan nna ran yu wa ai amyu lakying ni a kaji kawa ni rai ma ai.
17 Gershon gaw shadang sha lahkawng lu nga ai; dai yan gaw Libni hte Shime yan rai ma ai. Shan kaw nna mung matu mara law law pra shajang nga ma ai.
18 Kohat gaw shadang sha mali lu nga ai; dai ni gaw Amram, Izhara, Hebron hte Uziela hte rai ma ai. Kohat gaw asak 133 ning du hkra hkrung nga lu wu ai.
19 Merari gaw shadang sha lahkawng lu nga ai; dai yan gaw Mali hte Mushi yan rai ma ai. Ndai hte gaw Lewi a lakung lama ni hte shanhte a matu mara ni rai ma ai.
20 Amram chyawm gaw shi a kamoi Yohkebe hpe la wu ai rai nna shi a matu Arun hte Mawshe yan hpe shangai wu ai. Amram gaw asak 137 ning du hkra hkrung nga lu wu ai.
21 Izhara gaw shadang sha masum lu ai; dai ni gaw Kora, Nahpyek hte Zihkri ni rai nga ai.
22 Uziela gaw shadang sha masum lu ai; dai ni gaw Mishaela, Elzahpan hte Sihtri ni rai ma ai.
23 Arun gaw Aminadab a shayi sha, Nashon a kajan Elishaba hpe la wu ai rai nna Arun a matu Nadab, Abihu, Eleaza hte Ihtama hte hpe shangai wu ai.
24 Kora gaw shadang sha masum lu ai; dai ni gaw Asira, Elkana, hte Abiasap ni rai ma ai.
25 Arun a shadang sha Eleaza gaw Hputiela a shayi sha langai mi hpe la nna, shi gaw Hpineha hpe shangai wu ai. Dai ni gaw Lewi amyu bawsang na lakung lama ni hte dinghku a baw ni rai ma ai.
26 Arun hte Mawshe yan gaw dai Madu e, ?Israela amyu bawsang ni hpe Egutu mung kaw nna woi shapraw wa mu,? ngu nna tsun da hkrum ai yan rai ma ai.
27 Shan gaw Israela amyu masha ni lawt lu na matu Egutu hkawhkam wa hpe shang tsun ai yan rai ma ai.
28 Dai Madu gaw Mawshe hpe Egutu mung e ga shaga ai shaloi,
29 shi gaw, ?Ngai gaw dai Madu rai nga nngai. Ngai nang hpe tsun ai lam magup Egutu hkawhkam wa hpe tsun u,? ngu nna tsun wu ai.
30 Rai ti mung Mawshe gaw, ?Ngai gaw ga tsun ningtam n rawng nga nngai gaw nang chye nga ndai; dai rai yang, kaning rai nna nye a ga hpe hkawhkam wa madat na rai nga a ta?,? ngu nna htan wu ai.