32
(Trj 9:6-29)
Amyu masha ni gaw dai bum kaw Mawshe na na nga nna n yu wa sai hpe mu ma yang, shanhte gaw Arun kaw grup rai sa hpawng nhtawm, ?Anhte hpe Egutu mung kaw na woi wa ai wa, dai Mawshe hta hpa byin sai gaw, anhte n chye saga ai; dai re ai majaw anhte hpe lam woi na hpara langai anhte a matu galaw ya mi,? ngu nna tsun ma ai. Ref 32:1: Kas 7:40.
Arun gaw shanhte hpe, ?Dai rai taw gaw, nanhte a madu jan ni hte shayi shadang sha ni kai ai ja shanghkawng ni hpyu la nna ngai hpang de la sa wa mi,? ngu nna tsun wu ai. Dai re ai majaw amyu masha ni yawng mung shanhte a ja lakan ni raw la nna Arun hpang de la sa ya ma ai. Shi gaw dai ni hpe la nna shabyawng nhtawm ja ni hpe ndi langai mi hta ru bang nna ja hte galaw ai dumsu usu kasha langai jaw ya wu ai.
Dai amyu masha ni mung, ?Israela amyu e, ndai gaw Egutu mung kaw na anhte hpe woi shapraw wa ai anhte a hpara rai nga ai!,? ngu nna tsun wu ai. Ref 32:4: 1Hk 12:28; Kas 7:41.
Dai hpang Arun mung ja dumsu usu kasha a man e tawn hkungri langai gaw nhtawm, ?Hpawt ni na nhtoi gaw dai Madu hpe shagrau sha-a ai poi galaw na nhtoi rai nga ai,? ngu nna ndau shabra dat wu ai. Hpang jahpawt manap jau jau aten hta shagu hkungga nat nawng na nga, shanhte gaw yam nga nkau mi la sa nhtawm kaga nkau mi gaw mahku hkungga shan sha ma ai. Amyu masha ni mung lusha poi de shang dung nhtawm lu pyaw sha pyaw ai hte ngang kayut nga ma ai. Ref 32:6: 1Ko 10:7.
Dai Madu gaw Mawshe hpe, ?Egutu mung kaw na nang woi wa ai na a amyu masha ni yubak galaw nna ngai hpe nyet kau masai majaw tin tin nhtang yu wa su. Shanhte hkan sa na matu ngai hkang da ai lam hta na dam mat wa nhtawm ja shabyawng la let dumsu usu kasha langai galaw la nna dai hpe nawku ai hte shagu hkungga nawng jau ya nga masai. Shanhte gaw dai gaw Egutu mung kaw na shanhte hpe woi shapraw wa ai shanhte a hpara rai nga ai ngu tsun nga masai. Ndai amyu masha ni kade wa baw ja nga ma ai hpe ngai chye ni ai. 10 Ya chyawm gaw, ngai hpe hkan jahkring na hkum shakut sa. Ngai shanhte hpe masin yu pawt nga nngai majaw shanhte hpe shamyit kau na mawe ai. Dai hpang nang hte na a amyu matu ni hpe ngai amyu kaba shatai na we ai,? ngu nna tsun wu ai.
11 Rai ti mung, Mawshe mahtang dai Madu shi a Karai Kasang hpe, ?Madu e, chyalai n-gun kaba, daru magam n-gun hte Egutu mung kaw na nang hkrang shaw wa ai na a amyu masha ni hpe hpa majaw masin grai pawt nga n ta? 12 Nang gaw shanhte hpe bum lang hkan sat kau nna shanhte hpe atsai awai shamyit kau na matu shatawng shada nhtawm, na a amyu masha ni hpe Egutu mung kaw na woi wa wu ai nga, Egutu masha ni hpe hpa majaw tsun shara sharawng na rai nga a ta? Masin pawt ai hpe shakawp kau sanu; na a myit galai kau nhtawm na a amyu masha ni a ntsa e ndai ru yak tsin-yam tsindam hkum shadu et. 13 Na a shangun ma ni rai nga ai Abraham, Isak hte Yaku ni hpe naw dum u law. Nang dagam shaka da ai hte maren, shanhte a amyu matu hpe sumsing lamu na shagan ni zawn nang shalaw na rai nna nang ndat da ai ga dai mahkra shanhte a amyu matu ni hpe nang jaw nhtawm, dai hpe htani htana prat dingsa shanhte madu nga lu na mara ai, ngu nna dagam shaka ai ga hpe dum nga u law,? ngu nna hpyi nem wu ai. Ref 32:13: Nin 22:16-17; Nin 17:8. 14 Dai re ai majaw dai Madu gaw shi a myit hpe galai kau nna, shi a amyu masha ni hpe jahkrit shama na ngu ai ru yak tsin-yam tsindam hpe dawm kau ya wu ai.
15 Mawshe gaw lungpa man lahkawng maga de hkang da ai tara ni hpe ka da ai lungpa yan hpe hpai let, bum kaw na yu hkrat wa wu ai. 16 Karai Kasang shi nan lungpa galaw nhtawm de a ntsa hta hkang da ai tara ni ka da nga ai.
17 Yawshu gaw amyu masha ni jahtau garu ai nsen na jang, Mawshe hpe, ?Dai dap na majan gasat garu ai nsen ngai na nngai,? ngu nna tsun dan wu ai.
18 Mawshe chyawm gaw, ?Dai gaw awng padang ninglaw nna jahtau garu ai nsen zawn n rai; sum nna jahtau ai mung n rai, mahkawn mangoi ai nsen she rai nga ai,? ngu nna tsun wu ai.
19 Mawshe dai dap de shani yu wa yang, dumsu usu kasha hte amyu masha ni ka manawt nga ma ai hpe mu wu ai rai nna shi ja ja masin pawt wu ai. Shi hpai yu wa ai lungpa yan hpe dai bum lagaw e kabai jahkrat nna agrawp kau wu ai. 20 Shanhte galaw da ai dumsu usu hpe la nna dai hpe ju shabyawng nhtawm ayun ayaw rai hkra rin mani kau nna hka hte kayau kau ya wu ai. Dai hpang Israela masha ni hpe lu shangun wu ai. 21 Shi gaw Arun hpe, ?Nang shanhte hpe ndai daram hkrit tsang ra ai yubak galaw shapraw shangun na gaw, dai amyu masha ni nang hpe kaning di kau ma ta?,? ngu nna san wu ai.
22 Arun gaw, ?Ngai hpe masin hkum pawt et; ndai amyu masha ni n hkru ai amu galaw na matu kade wa daw dan gwi nga ma ai hpe nang chye nga ndai. 23 Shanhte mahtang ngai hpe, ?Anhte hpe Egutu mung kaw na woi shapraw wa ai wa, dai Mawshe hta hpa byin mat sai gaw anhte n chye saga ai; dai rai nna, anhte hpe lam woi na hpara langai mi anhte a matu galaw ya mi,? nga nna tsun ma ai. 24 Ngai mung aja lu ai wa kadai mung raw la nna ngai kaw la sa wa mi ngu nna shanhte hpe tsun mawe ai; shanhte ngai hpe jaw ai hte dai ni hpe wan hta ngai bang dat yang dumsu usu kasha pru wa ai!,? ngu nna htan wu ai.
25 Amyu masha ni myit n hkang lu nna, kabrawng mat wa ai hte shanhte a gumlau hpyen ni a man e mana bu shangun hkra Arun e galaw dat ai hpe Mawshe mu wu ai. 26 Dai rai nna, shi gaw dap chyinghka e tsap let, ?Dai Madu hpang maga de nga ai ni kadai mung ndai maga de sa wa mi!,? ngu nna jahtau tsun wu ai. Dai majaw Lewi lakung ni yawng shi kaw grup rai wa hpawng ma ai rai nna, 27 shi gaw shanhte hpe, ?Dai Madu Israela a Karai Kasang gaw nanhte hkum shagu hta tinang nang a nhtu hpye nhtawm dai dap maga mi na chyinghka kaw nna maga mi de na chyinghka du hkra gahkrang hkawm let, tinang a kahpu kanau, tinang a jinghku wa hte htingbu wa hpe sat kau na rai myit dai,? ngu nna hkang dat ai ga tsun wu ai. 28 Lewi lakung ni dai ga hpe madat mara ma ai rai nna, dai shani jang lasha hkying masum daram sat kau ma ai. 29 Mawshe gaw Lewi lakung ni hpe, ?Dai ni nanhte gaw dai Madu a matu daw jau amu galaw ai hkinjawng ni zawn nanhte a shadang sha ni hte kahpu kanau ni hpe sat kau ai hte ap nawng kau manit dai majaw dai Madu gaw nanhte hpe shi a shaman chyeju jaw ya nga nu ai.
30 Hpang shani e Mawshe gaw shi a amyu masha ni hpe, ?Nanhte gaw hkrit hpa yubak galaw shut kau manit dai. Rai ti mung, ya chyawm gaw ngai mung dai Madu nga ai bum de bai lung wa nna nanhte shut kau ai yubak raw dat kau ya na matu, mahkoi htingrat ya lu nhten,? ngu nna tsun wu ai. 31 Mawshe gaw dai Madu hpang de bai lung wa nhtawm, ?Ndai amyu masha ni hkrit hpa yubak galaw shut kau manu ai. Shanhte gaw ja hpara langai galaw nna dai hpe nawku kau masai. 32 Dai rai nna shanhte a yubak hpe chyeju hte raw dat kau ya u; rai ti mung nang n dat ya mayu ai rai yang chyawm gaw na a amyu masha ni a mying ni hpe nang ka da ai laika kaw na nye a mying hpe shaprai kau ya e law,? ngu nna tsun wu ai. Ref 32:32: Shk 69:28; Shr 3:5.
33 Dai Madu gaw, ?Kadai wa ngai hpe shut ai rai yang, nye a laika hta na dai wa a mying hpe arut kau na we ai. 34 Ya chyawm gaw ngai nang hpe tsun na shara de ndai amyu masha ni hpe woi sa su. Nye a lamu kasa nang hpe lam madun la na ra ai hpe adum nga u; rai ti mung shanhte shut hpyit kau ai yubak a matu ndai amyu masha ni hpe ngai ari jaw na aten gaw du na ra ai,? ngu nna tsun wu ai. 35 Shing rai, dai Madu gaw amyu masha ni ntsa ana ahkya dat dat wu ai, hpa majaw nga yang, shanhte gaw Arun hpe dumsu usu kasha galaw shangun kau nga ma ai.