31
(Pru 35:30-36:1)
1 Dai Madu gaw Mawshe hpe,
2 ?Yuda amyu bawsang hta na Uri a kasha, Hura a Kashu Bezalela hpe lata la ai rai nna,
3 Ngai gaw shi hpe chye chyang ai nyan, kung kyang ai zai hpaji hte lata amu baw hkum sumhpa galaw lu ai atsam marai,
4 aja gumhpraw magri mang dup ai amu hte kasi maka shapraw ai magam amu,
5 nlung maka ka nna ja lung seng hkrep bang ai amu, hpun tawk ai amu hte lata amu baw hkum sumhpa chye galaw ai nyan jaw ya ni ai.
6 Shi hte rau amu galaw na matu Dan amyu bawsang hta na Ahisamak a kasha Aholiaba hpe mung ngai lata da se ai; kaga kung kyang ai lata sama yawng hpe mung kaba ai marai atsam ngai jaw da se ai; shaloi shanhte gaw galaw na matu ngai hkang da ni ai,
7 nye a hpung shingkang shanu nga ai Sum, Ga Shaka Sumpu hte de a ntsa na magap, Sum hte seng ai arai ni yawng,
8 muk ku hte de a arai ni, ja jet hte galaw ai pyengdin shadun hte de a arai ni, manam pyaw ai baw nat na tawn hkungri,
9 wan nat hkungga nawng ya na tawn hkungri hte de a arai ni yawng, lagaw lata shin na jarung hte dai hpe shadun ai ku,
10 Arun hte shi a shadang sha ni hkinjawng amu gun hpai daw jau yang hpun ai reng ai hpun palawng ni,
11 aya dang ya ai namman sau hte Chyoi Pra ai Shara hta lang na manam pyaw ai baw ni hpe galaw lu na rai ma ai. Ngai nang hpe hkang da sai hte maren, shanhte gaw ndai amu ni yawng hpe tup hkrak galaw na rai ma ai,? ngu nna tsun wu ai.
12 Dai Madu gaw Israela amyu masha ni hpe
13 htawn tsun na matu Mawshe hpe, ?Bansa Nhtoi ngu ai nye a ban sa ai nhtoi hpe hkan shadik nga mu; hpa majaw nga yang, dai gaw nanhte hte nye a lapran e prat mi hte prat mi sakse kumla tai nna Ngai Madu nan nanhte hpe nye a amyu masha ni shatai la ni ai hpe mung, madun dan na matu mung rai nga ai.
14 Dai nhtoi gaw chyoi pra nga ai majaw dai ban sa ai nhtoi hpe nanhte hkan shatup lu na rai myit dai. Dai shani hpe n hkan shatup ai sha, dai shani e magam amu galaw ai wa kadai mung si ari hkrum na rai wu ai.
15 Nang gaw nhtoi kru ya tup na a amu galaw lu na rai nga ndai; rai ti mung sanit ya nhtoi chyawm gaw nye a matu ap nawng da ai chyoi pra ai Bansa Nhtoi rai nga ai. Dai shani e amu magam galaw ai wa kadai mung si lu na rai nga ai. Ref 31:15: Pru 20:8-11; 23:12; 34:21; 35:2; Jaw 23:3; Trj 5:12-14.
16 Israela amyu masha ni gaw ga shaka kumla hku nna dai nhtoi hpe hkan shatup ma ai.
17 Ngai Madu nan kru ya laman sumsing lamu hte ginding aga hpe hpan hpajang da nna, sanit ya nhtoi hta bungli galaw ai hpe jahkring da ai hte ban sa la nngai majaw, dai nhtoi gaw Israela amyu masha ni hte nye a lapran e htani htana na kumla tai nga na ra ai,? ngu nna hkang da wu ai. Ref 31:17: Pru 20:11.
18 Karai Kasang gaw Sina Bum ntsa e Mawshe hte ga shaga ngut jang, Karai Kasang shi nan ka ai hkang da ai ga kap ai lungpa lahkawng shi hpe ap dat ya wu ai.