3
1 Lana mi na nhtoi hta, Mawshe gaw shi a katsa Midian hkinjawng Yehtru a sagu bainam ni hpe rem nga yang, shi gaw dai yam nga hpung ni hpe zaibru jang kaw nna gawt shalai nhtawm Sina ngu ai chyoi pra ai bum de sa wa wu ai.
2 Dai yang e, dai Madu a lamu kasa gaw sumwum hta na wan numli zawn shi kaw dan pru nga ai. Mawshe gaw dai shara hta sumwum wan chyi nga tim n hkru nga ai hpe mu wu ai.
3 Shi gaw, ?Ndai gaw lak lai ai lama mi she rai nga ai. Hpa a majaw dai sumwum n hkru mat ai kun? Ngai gaw dai de shanang sa nna mada yu na we ai,? ngu nna myit yu wu ai.
4 Dai Madu gaw Mawshe sit sa wa nga ai hpe mu ai shaloi, shi gaw, ?Mawshe! Mawshe!, ngu nna dai sumwum kaw na shi hpe shaga wu ai.
Shi mung, ?Rai sa, ngai nang e nga nga nngai,? ngu nna htan wu ai.
5 Karai Kasang gaw, ?Nang de kachyi mi mung hkum sit shanang sa nga et. Nang gaw chyoi pra ai ga ntsa e tsap nga ndai majaw na a kyepdin raw kau u.
6 Ngai gaw na a nji nwa ni rai nga ai Abraham, Isak hte Yaku ni a Karai Kasang rai nga nngai,? ngu nna tsun wu ai. Dai rai nna Mawshe gaw Karai Kasang hpe yu na hkrit wu ai majaw shi a myi man hpe magap da wu ai.
7 Dai hpang dai Madu gaw, ?Nye a amyu masha ni Egutu mung hta kade daram mazut ai hku sharu shatsang hkrum nga ma ai hpe ngai mu ni ai; shanhte a mayam hpareng ni a lata kaw na hkye la hkrum na matu hkrap sharung ai nsen ni hpe mung ngai na ni ai. Shanhte hkrum sha ai nni nkri yawng a lam hpe ngai chye nngai;
8 shanhte hpe Egutu masha ni a lata kaw na hkye hkrang la na hte Egutu mung kaw nna shanhte hpe woi shapraw wa nhtawm ya aten, Hkanan, Heti, Amori, Hperizi, Hiwi hte Yebusi masha ni nga ai dai dam lada rai nna sut su ngamu ngamai ai hte ga sau kaja ni hte hpring ai mung de woi la na ngai du sa ring ngai.
9 Nye a amyu masha ni a hkrap sharung ai nsen hpe ngai kaja wa teng teng na ni ai; Egutu masha ni shanhte hpe kade daram dip gamyet sha nga masai hpe mung ngai mu ni ai.
10 Ya chyawm gaw ngai nang hpe Egutu hkawhkam wa hpang de shangun dat na nngai; nang gaw nye a amyu masha ni hpe shi a mung kaw nna woi wa lu na rai ndai,? ngu nna tsun wu ai.
11 Rai ti mung, Mawshe mahtang Karai Kasang hpe, ?Ngai hpa n tai nngai. Ngai gaw hkawhkam wa hpang de sa nna Israela amyu masha ni hpe Egutu mung kaw nna ngai kaning rai woi shapraw la lu na rai nga a ta?,? ngu nna tsun wu ai.
12 Karai Kasang gaw, ?Ngai nang hte rau rai nga na nngai, dai re ai majaw amyu masha ni hpe Egutu mung kaw na nang woi shapraw wa ai shaloi nanhte ngai hpe ndai bum ntsa e nawku lu na rai myit dai. Dai gaw ngai nang hpe shangun dat ai sakse tai na ra ai,? ngu nna htan wu ai.
13 Rai ti mung Mawshe gaw, ?Israela amyu masha ni hpang de ngai sa du nna shanhte hpe, ?Nanhte a nji nwa ni a Karai Kasang gaw nanhte hpang de ngai hpe shangun dat ni ai,? ngu nna tsun ai shaloi, shanhte ngai hpe, ?Shi a amying kaning nga a ta?,? nga nna ngai hpe san dam yang, ngai shanhte hpe kaning ngu tsun lu na rai nga a ta?,? ngu nna htan wu ai. Ref 3:13: Pru 6:2-3.
14 Karai Kasang gaw, ?Ngai gaw Ngai rai nga nngai. Nang gaw shanhte hpe: ?Ngai Rai Nga Nngai,? ngu ai Wa gaw, nanhte hpang de ngai hpe shangun dat ni ai,? ngu nna tsun lu na ndai. Ref 3:14: Shr 1:4-8.
15 Nanhte a nji nwa ni a Karai Kasang, Abraham, Isak hte Yaku ni a Karai Kasang Ngai Madu nan shanhte hpang de nang hpe shangun dat ni ai, ngu nna Israela amyu masha ni hpe tsun dan u; dai gaw htani htana na nye a amying rai nga li ai; du na ra ai ban masha ni yawng mung dai hte maren ngai hpe shaga na mara ai.
16 Sa nna Israela a ningbaw ni hpe jahpawng shinggyin da nna shanhte a kaji kawa ni a Karai Kasang, Abraham, Isak hte Yaku ni a Karai Kasang Ngai Madu nan nang kaw dan pru ni ai lam shanhte hpe tsun dan u. Shanhte hpang de ngai nan du ni ai rai nna, shanhte hpe Egutu masha ni kaning rai roi rip nga ai hpe mung ngai mu se ai lam shanhte hpe tsun dan u.
17 Shanhte gaw mazut ai hku adip arip di hkrum nga ai Egutu mung kaw nna ngai woi shapraw la nhtawm, Hkanan, Heti, Amori, Hperizi, Hiwi hte Yebusi masha ni nga ai dai sut su ngamu ngamai ai hte ga sau kaja hpring ai mung de shanhte hpe woi wa na ngu nna, ngai myit daw dan da ni ai.
18 Shaloi nye a amyu masha ni hpe nang tsun ai ga shanhte madat mara na mara ai. Dai hpang nang gaw Israela ni a ningbaw ni hte rau Egutu hkawhkam kaw sa nna shi hpe, ?Hebre masha ni a Madu Karai Kasang gaw shi hkum nan anhte hpe madun dan mani ai. Anhte a Madu Karai Kasang hpe shagu hkungga nawng jau lu na matu, nam mali de masum ya sat sa lu na ahkang ya anhte hpe jaw mi,? ngu nna sa tsun masu.
19 Egutu hkawhkam wa chyawm gaw n-gun kaba hte shadut n hkrum hkrum gaw nanhte hpe sa wa shangun na n rai nga ai gaw ngai chye nngai.
20 Rai ti mung nye a daru magam n-gun hpe ngai lang nhtawm mauhpa amu ni hte jahkrit shama let Egutu mung hpe ari jaw na we ai. Dai hpang shi nanhte hpe sa wa shangun na ra ai.
21 ?Ngai gaw Egutu masha ni hpe nanhte a man e shagrau shangun na we ai; shaloi nye a amyu masha ni pru wa na rai jang, lata kaman hte pru wa lu na mara ai n rai. Ref 3:21-22: Pru 12:35-36.
22 Israela numsha shagu hte mung tinang a htingbu Egutu masha ni hte tinang a nta hta nga ai Egutu numsha ni kadai kaw na rai ti mung, hpun palawng, aja arai, gumhpraw arai ni hpe hpyi la na rai ma ai. Dai Israela amyu masha ni gaw dai arung arai ni hpe shanhte a shayi shadang sha ni hpe jahpun na mara ai rai nna, Egutu masha ni a sut gan ni hpe htawm mat wa na mara ai.?