1 ?Na a nhpu Arun hte shi a shadang Nadab, Abihu, Eleaza hte Ihtama ni hpe shaga la nna shanhte hpe Israela amyu masha ni kaw na garan jahka tawn na lam tsun u; shanhte gaw hkinjawng amu gun hpai let ngai hpe daw jau na rai ma ai. 2 Na a nhpu Arun hta arawng sadang hte hpung shingkang hpraw ningja htap nga na matu hkinjawng hpun palawng galaw ya na rai ndai. 3 Ngai atsam marai jaw da sai lata hpaji kungkyang ai masha ni yawng hpe shaga la nna Arun a hpun palawng galaw na lam, shanhte hpe tsun matsun u; shi gaw nye a amu hta hkinjawng amu gun hpai ap nawng na rai wu ai. 4 Shanhte hpe ndai sinda magap, hpa hkai lawng, ntsa palawng, maka ka ai palawng, bunghkaw hte shingkyit ni hpe galaw na matu tsun na rai ndai. Shanhte gaw na a nhpu Arun hte shi a shadang sha ni a matu ndai hkinjawng hpun palawng ni galaw na rai ma ai; shanhte gaw nye a matu hkinjawng amu gun hpai let daw jau lu na rai ma ai. 5 Lata hpaji kungkyang ai masha ni mung sawm tsit ai, shaba pu nsam rawng ai hte hkyeng ai sagu ri hte ja ri ni hte hpawn mani tsawm ai lachyit sumpan ni lang na rai ma ai.

6 ?Shanhte gaw hpa hkai lawng hpe sawm tsit ai, shaba pu nsam rawng ai, hkyeng ai sagu ri, ja ri hte mani tsawm ai lachyit sumpan ni hte maka ka sumli da na rai ma ai. 7 Dai hpa hkai lawng hpe shangang na matu kade nde lahpa mahkai lahkawng shakap lu na rai nga ai. 8 Mani tsawm hkra da tawn ai shingkyit hpe mung hpa hkai lawng hte langai sha di nna shakap na matu shawng na arung arai ni hte galaw na rai nga ai. 9 Unuk nlung lahkawng la nhtawm Yaku a shadang sha ni shi lahkawng a mying ni hpe dai hta tawk ka nna, 10 shanhte a shangai nhtoi shawng hpang hkan nna nlung langai mi hta amying kru, bai langai mi hta amying kru di nna tawk ka da na rai nga ai. 11 Ja lung seng chye ka ai kungkyang ai masha ni hpe shaga la nna, dai nlung lahkawng a ntsa hta Yaku a shadang sha ni a amying ni hpe tawk ka nhtawm ja hkalawk hta bang na rai nga ai. 12 Dai nlung lahkawng hpe hpa hkai lawng a hpa hkai yan hta shakap da na rai nga ai; dai gaw Israela amyu bawsang shi lahkawng ni a masat dingsat nlung rai nga ai. Ndai hku nna Arun mung shi a lahpa ntsa e shanhte a mying ni hpe hpai da ya na ra ai; shaloi Ngai Madu nan nye a amyu masha ni hpe tut nawng adum nga na nngai. 13 Ja hkalawk lahkawng galaw nna, 14 ja jet hte saidawng lahkawng hpe sumri ni zawn manai rit nhtawm ja hkalawk ni hta noi na rai nga ai.

15 ?Karai Kasang a myit ra ai hku daw dan ai shaloi lang na Hkinjawng Kaba wa a matu sinda magap langai galaw na rai ndai. Dai hpe hpa hkai lawng galaw ai shaloi lang ai arung arai ni hte maren maka ka nna galaw na rai nga ai. 16 Dai gaw man shada bung ai rai nna lahkawng hpam gumba mai na rai nga ai; de a galu de yungnu 9, nda de yungnu 9 rai na rai nga ai. 17 Dai hta manu dan ai nlung ni hpe lam mali hkrep da na rai nga ai; langai ngu na lam hta patamya, utahpaya, hte lung hkyeng ni rai na rai nga ai; 18 lahkawng ngu na lam hta mya, nila hte sein lung seng ni rai na rai nga ai; 19 masum ngu na lam hta wakintu, mahoya hte htitun nila ni rai nna, 20 mali ngu na lam hta myek-yoi, unuk hte nagahtoi ni rai na rai nga ai. Dai ni hpe ja hkalawk hta bang da na rai nga ai. 21 Dai nlung shi lahkawng hte a ntsa hta Israela amyu bawsang ni hpe malai shatai da ai masat galaw na matu Yaku a shadang sha ni a mying ni hpe tawk ka da na rai nga ai. 22 Sinda magap a matu sumri manai rit da ai zawn ja jet hte saidawng ni hpe galaw na rai nga ai. 23 Ja shanghkawng lahkawng hpe mung galaw nhtawm sinda magap a ntsa jut ni hta dai hpe noi da nna, 24 dai manai rit da ai ja saidawng lahkawng hpe sinda magap a ntsa jut na shanghkawng lahkawng hta gyit shakap da na rai nga ai. 25 Saidawng sumri matu lahkawng yan hpe mung dai hkalawk lahkawng yan hta gyit shakap nhtawm dai hku nna hpa hkai lawng a hpa hkai man hku dai yan hpe noi da na rai nga ai. 26 Dai hpang ja shanghkawng lahkawng galaw nna hpa hkai lawng de jahtum ai kata matu a htumpa jut lahkawng maga hta dai hpe shatut na rai nga ai. 27 Ja shanghkawng lahkawng hpe mung bai galaw nna hpa hkai lawng a man maga nshang matu ang ang, mani tsawm hkra da da ai shingkyit ntsa hkawt e sha-ang nna kade de na matut ai makau e, dai yan hpe shatut na rai nga ai. 28 Sinda magap na shanghkawng hte hpa hkai lawng na shanghkawng yan hpe jahkrum nhtawm sawm tsit ai sumri hte gyit noi da na rai nga ai. Shaloi sinda magap gaw shingkyit a ntsa hta ngang ngang kap nga lu na rai nga ai.

29 ?Arun gaw dai Chyoi Pra ai Shara de shang ai shaloi, Israela amyu bawsang ni a amying hte tawk ka da ai dai sinda magap hpe shi hpun na rai nga ai; shaloi Ngai Madu nan nye a amyu masha ni hpe tut nawng adum nga na we ai. 30 Urim hte Htumim d 28:30: Urim hte Htumim: Ndai hpe Karai Kasang myit ra ai lam hku daw dan na matu hkinjawng wa lang ai arai rai nga ai. hpe sinda magap hta bang da na rai nga ai. Shi gaw nye a chyoi pra ai hpung shingkang shanu nga ai shara de shang ai shaloi, Arun gaw dai yan hpe hpai na rai wu ai. Dai zawn re ai aten ni hta, shi gaw sinda magap hpun da lu na rai wu ai; Shi gaw Israela amyu masha ni a matu nye a myit ra sharawng ai hku jeyang daw dan lu na rai wu ai.

31 ?Dai hpa hkai lawng hte seng ai ntsa palawng hpe sawm tsit ai sumpan hte chyu sha galaw na rai nga ai. 32 Dai hta baw shawn na matu lawngdu langai tawn da nna, n je mat hkra shakung grup grup hpe da la ai sumpan hte du hkawp na rai nga ai. 33-34 Dai ntsa palawng a htumpa matu grup grup hta sawm tsit ai, shaba pu nsam rawng ai hte hkyeng ai ri ni hte hkainu si ngu ai si ni hte de a langai din din hta ja dingsi ni gali galai rai noi shakap da na rai nga ai. 35 Arun gaw hkinjawng amu daw jau ai shaloi, dai ntsa palawng hpe hpun nga ai. Shi gaw nye a hpung shingkang shanu nga ai dai Chyoi Pra ai Shara de shang wa, pru wa re ai shaloi, dai dingsi nsen hpe na lu ai majaw sat kau ai shi hkrum na wu ai n rai.

36 ?Ja jet hte htanbam langai galaw nna de a ntsa e, ?Dai Madu a matu ap nawng ai,? ngu nna tawk ka da na rai nga ai. 37 Dai hpe htanbam a man maga shakap nna sawm tsit ai sumri hte gyit da na rai nga ai. 38 Arun gaw dai hpe shi a kahtan ntsa e bam da na rai nga ai; nye a matu ap nawng daw jau ai Israela ni a hkungga arai yawng hta shut hpyit ai amu loi li amyu masha ni hta lawm yang pyi, Ngai Madu nan naw hkap la ya na nngai.

39 ?Mani ai lachyit sumpan hte Arun a matu palawng hpe mung, bunghkaw hpe mung galaw nna, maka ka shatsawm da ai shingkyit hpe mung galaw lu na rai nga ai.

40 ?Arun a shadang sha ni arawng sadang hte hpraw ningja rawng nga na matu, palawng, shingkyit hte baw chyawp re ai ni hpe galaw ya na rai nga ai. 41 Na nhpu Arun hte shi a shadang sha ni hpe ndai hpun palawng ni hte shabu jahpun na rai nga ndai. Dai hpang shanhte hpe aya dang ya nna ap nawng ai hte tsanlun sau chya ya ai hte hkinjawng amu hte nye a matu daw jau amu galaw na rai ma ai. 42 Nshang kaw nna magyi du ai labu kadun hpe lachyit sumpan hte shanhte a matu chywi ya na rai ndai; shing rai jang shanhte a kaya kahpa n dawng na rai ma ai. 43 Arun hte shi a shadang sha ni gaw nye a hpung shingkang shanu nga ai Sum de shang ai shaloi mung, Chyoi Pra ai Shara na hkungri hta hkinjawng amu daw jau na matu sit sa ai shaloi mung, Arun hte shi a shadang sha ni dai labu kadun tut nawng bu na rai ma ai. Shaloi shanhte a kaya kahpa n shadawng nga ma ai a majaw sat kau ai hkrum na ma ai n rai. Ndai gaw Arun hte shi a amyu matu ni a matu prat dingnawng hkan sa na hkang da ai tara rai na rai nga ai.