1 ?Nye a hpung shingkang shanu nga ai Sum ngu ai, kata na chyoi pra ai Sum hpe sawm tsit ai ri, shaba pu nsam rawng ai ri hte hkyeng ai ri ni hte da da ai mani tsawm ai lachyit sumpan grang shi galaw na rai nga ai. Dai ni hpe singkaw tu ai hkrung kanu ni a hkrang sumla ni hte ka shakap na rai nga ai. 2 Dai sumpan grang shagu hpe galu de pe 42, nda de pe 6 di nna shadawn shadang maren sha galaw na rai nga ai. 3 Sumpan grang manga hpe langai sha di chywi matut nhtawm kaga manga hpe mung dai hte maren chywi matut na rai nga ai. 4 Dai matut da ai sumpan grang shagu a matu hku sawm tsit ai sumpan hte shanghkawng galaw na rai nga ai. 5 Dai matut da ai sumpan grang langai mi hta shanghkawng manga shi, kaga langai mi hta mung shanghkawng manga shi di nna shawng na sumpan grang hte maren shada da hkrum hkrum di nhtawm shabung da na rai nga ai. 6 Sumpan grang lahkawng hpe langai sha rai mat hkra shada da mahkai matut na matu ja chyinghkyi manga shi hpe mung galaw na rai nga ai.

7 ?Sumpan Sum galup na matu bainam mun hte da ai sumpan grang shi langai hpe mung galaw na rai nga ai. 8 Dai ni yawng hpe maren sha di nna, dai gaw galu de pe 45, nda de pe 6 rai na rai nga ai. 9 Dai hpang manga hpe langai sha di nna chywi matut nhtawm, kaga kru hpe mung langai tai hkra chywi matut na rai nga ai. Sumpan grang kru rawng ai hpe lahkawng hpam gumba nna Sum a ndaw yang e tawn da na rai nga ai. 10 Dai matut da sai sumpan grang langai mi a matu lam hta shanghkawng manga shi, bai kaga langai mi a matu lam hta shanghkawng manga shi hpra di nna galaw da na rai nga ai. 11 Magri mang chyinghkyi manga mung galaw nna dai ni hpe shanghkawng hku ni hta mahkai matut nna dai lahkawng re ai sumpan grang gaw langai sha re ai galup sumpan grang rai na rai nga ai. 12 Jan nga ai sumpan grang ka-ang hkup hpe Sum a shingdu maga de noi shaya tawn na rai nga ai. 13 Bai maga mi hte maga mi de kra nga ai sumpan grang pe mi jan hpe Sum a maga mi hte maga mi de noi shaya da nhtawm dai hpe galup da na rai nga ai.

14 ?Sum galup na matu magap lahkawng hpe naw galaw na rai nga ai; langai mi hpe sagu la hpyi hpe jaw jahkyeng da nga ai; kaga langai mi hpe mani tsawm ai shanhpyi hte Sum ntsa de galup na rai nga ai.

15 ?Shaji hpun hte Sum a matu ding ding re ai hpunpyen shadun ni hpe galaw na rai nga ai. 16 Dai hpunpyen pa shagu gaw gale de pe 15, nda de yungnu 27 di nna, 17 dai hte bung ai dawhkai lahkawng hkawng bang nna galaw na rai ndai, shing rai hkrang gran da ai gaw shada gang madi hkat lu nga ai. Dai hpunpyen ni yawng hta dawhkai ni rawng na rai nga ai. 18 Sum a dingda maga de na matu, hpunpyen shadun hkun galaw nhtawm de a htumpa hta 19 gumhpraw machyaw mali shi hte hpunpyen pa shagu a htumpa hta dawhkai lahkawng hte shangang da lu na matu machyaw lahkawng hkawng bang na rai nga ai. 20 Sum a dingdung maga de na matu, hpunpyen pa hkun galaw nhtawm, 21 gumhpraw machyaw mali shi jaw nna hpunpyen pa shagu a htumpa hta machyaw lahkawng hkawng rai na rai nga ai. 22 Dai Sum a shingdu ngu na sinna maga de na matu mung hpunpyen kru galaw na rai nga ai, 23 jut ni a matu hpunpyen lahkawng mung galaw ra ai. 24 Dai jut na hpunpyen ni gaw htumpa kaw na ndung hkren yawng hpe matep shangang ya na rai nga ai. Dai hpunpyen lahkawng gaw jut lahkawng hpe dai zawn galaw na matu rai nga ai. 25 Dai rai nna hpunpyen matsat hte gumhpraw machyaw shi kru rai na rai nga ai; hpunpyen shagu a htumpa hta machyaw lahkawng hkawng rai na rai nga ai. 26 ?Shaji hpun hte htinggrang shi manga galaw na rai nga ai; sumpan Sum a maga mi de na hpunpyen shakum a matu htinggrang manga rai nna, 27 bai maga mi de mung manga, Sum a shingdu ngu na sinna jahtum maga de manga rai na rai nga ai. 28 Ka-ang na htinggrang gaw Sum a nbang npan hkren, jut htuk htuk tawk dinghkren ai rai na rai nga ai. 29 Dai hpunpyen ni hpe aja hte kayawp nhtawm htinggrang dinghkrawn na matu ja shanghkawng galaw na rai nga ai; dai ni yawng hpe ja hte sup na rai nga ai. 30 Dai Sum hpe bum ntsa e ngai nang hpe madun dan ni ai kasi hte maren sharawt da na rai ndai.

31 ?Sawm tsit ai ri, shaba pu nsam rawng ai ri, hkyeng ai ri ni hte mani tsawm ai lachyit sumpan hpe da la nna nba grang langai galaw na rai nga ai. Singkaw tu ai hkrung kanu hkrang sumla maka hpe mung ka na rai nga ai. 32 Shing rai gumhpraw machyaw mali hta jung tawn nna ja hte sup sai shaji hpun shadaw mali hta dai hpe chyinghkyi ni hte noi da na rai nga ai. 33 Nba grang hpe sumpan Sum a numgaw hta noi da ai chyinghkyi yan a kata hku noi grang nna, dai nba grang a shingdu e lungpa lahkawng bang da ai Ga Shaka Sumpu tawn da na rai nga ai. Dai nba grang gaw Chyoi Pra ai hte Chyoi Pra Htum ai Shara yan hpe garan ginhka da na rai nga ai. Ref 26:33: Heb 6:19; 9:3-5. 34 Ga Shaka Sumpu a ntsa e magap mara da na rai nga ai. 35 Chyoi Pra Htum ai Shara a shinggan maga ngu na Sum a dingdung maga de ku tawn da nna, Sum a dingda maga de pyengdin shadun tawn da na rai nga ai.

36 ?Sum a shang wa chyinghka lam a matu sawm tsit ai ri, shaba pu nsam pru ai ri hte hkyeng ai ri ni hte mani tsawm ai lachyit sumpan hpe da nna, maka ka shatsawm da ai nba grang langai galaw na rai nga ai. 37 Dai nba grang a matu shaji hpun hte galaw ai shadaw manga galaw nhtawm dai ni hpe ja hte sup na rai nga ai; dai hpe ja chyinghkyi ni hte mahkai da nhtawm dai shadaw ni a matu magri mang machyaw manga jaw na rai nga ai.