23
?N teng n man ai shiga hkum htawn shamawng et; mara kap ai wa hpe n teng n man ai sakse hkam nna hkum karum la et. Ref 23:1: Pru 20:16; Jaw 19:11-12; Trj 5:20. Nang gaw n hkru ai amu galaw ai hte teng man ai lam hpe shadam kau na matu masha law law sakse hkam ya ai maga de hkum hkan et. Matsan mayan wa shi a amu tara jeyang ai hta myi man tau ya ai lam hkum madun et. Ref 23:3: Jaw 19:15.
?Na a gumlau hpyen wa a dumsu kanu shing n rai lawze lam dam mat wa ai hpe nang mu ai rai yang, dai hpe shi hpang de wa sa ya lu na rai ndai. Ref 23:4-5: Trj 22:1-4. Shi a lawze daw hte gamyet taw nga ai rai yang, de a lagaw bai sharai la nna rawt tsap wa lu hkra karum la u; shaloi jang garai hkum hkawm shangun et.
?Matsan mayan wa tara rung hta amu pru yang, teng man ai tara hpe hkum nyet kau et. Ref 23:6-8: Jaw 19:15; Trj 16:19. Shi hpe n teng n man ai hku mara hkum shagun et; mara n kap ai wa hpe si ari jaw lu na n rai; hpa majaw nga yang, dai zawn re ai n hkru ai amu galaw ai wa kadai hpe mung ngai daw dan na we ai. Mayun kumhpa hkap la mai na n rai, dai kumhpa a majaw, masha hpe ding man ai amu hta myi n mu shangun ai hte mara n kap ai ni a amu hpe sharun jahten kau ya nga ai.
?Maigan masha wa hpe n sawn n sang di lu na n rai; nanhte gaw Egutu mung e maigan masha hku tai yu manit dai majaw dai maigan masha wa kade hkam sha yu nga ai lam hpe nanhte chye nga myit dai. Ref 23:9: Pru 22:21; Jaw 19:33-34; Trj 24:17-18; 27:19.
10 ?Kru ning tup, na a yi hkauna hta gat hkai nna dai kaw na pru ai nsi naisi shu la lu na rai ndai. Ref 23:10-11: Jaw 25:1-7. 11 Rai ti mung sanit ning ngu na hta, dai ni hpe jahkam da nna, dai yi hkauna hta tu ai hkai nmai hpa hpe mung shu la lu na n rai. Dai hta naw ngam nga ai hpe gaw nam na matse labye dusat ni sha lu na ma ai. Dai hte maren, na a sabyi sun ni hte tsanlun hpun ni hpe mung galaw lu na ndai.
12 ?Bat mi hta kru ya tup amu bungli galaw lu ti mung, sanit ya ngu na nhtoi hta chyawm gaw galaw lu na n rai; na a matu amu galaw ya nga ai na a mayam ni hte maigan masha ni sha n-ga, na a yam nga ni pyi ban sa la lu na mara ai. Ref 23:12: Pru 20:9-11; 31:15; 34:21; 35:2; Jaw 23:3; Trj 5:13-14.
13 ?Ngai Madu nan nanhte hpe tsun ai lam magup hpe madat mu; kaga hpara ni kaw akyu hpyi lu na myit dai n rai; shanhte a mying hpe pyi hkum tsun myit.
(Pru 34:18-26; Trj 16:1-17)
14 ?Ngai hpe shagrau sha-a na matu laning mi hta poi kaba masum galaw na rai myit dai. 15 Nanhte gaw Egutu mung na pru wa ai Abi shata hta, ngai nang hpe hkang da sai lam hte maren, Matsi n rawng ai Muk Sha Poi galaw lu na rai myit dai. Sanit ya laman galaw ai dai poi hta matsi hte galaw ai muk hpa hpe mung sha lu na myit dai n rai; nanhte gaw hkungga n lawm ai sha ngai hpe galoi mung nawku lu na myit dai n rai. Ref 23:15: Pru 12:14-20; Jaw 23:6-8; Bhk 28:17-25.
16 ?Nanhte nsi naisi shu hpang wa ai shaloi, Nlung Nnan Poi galaw na rai myit dai.
Nanhte a sabyi sun hte namsi namsaw sun ni kaw na namsi namsaw shinggyin la ai mangai aten hta Nmut Shinggyin Poi mung galaw lu na rai myit dai. Ref 23:16: Jaw 23:15-21; Bhk 28:26-31. 17 Nanhte hta na lasha ni yawng gaw shaning shagu galaw ai ndai poi masum hta dai Madu na a Karai Kasang rai nga ai Ngai hpe sa nawku lu na rai myit dai.
18 ?Ngai hpe nanhte yam nga hkungga nawng jau ai shaloi, matsi hte galaw ai muk shalawm nna jau lu na myit dai n rai. Ndai poi laman ngai hpe nawng jau ai yam nga sau ni hpe hpang jahpawt du hkra ngam da lu na n rai.
19 ?Nang shu la lu ai shawng ngai ai nsi naisi hpe dai Madu na a Karai Kasang a nta de shaning shagu nang la sa na rai ndai.
?Sagu, bainam kasha ni hpe kanu a chyu hte hkum shadu et. Ref 23:19: Trj 26:2; Pru 34:26; Trj 14:21.
20 ?Ngai lajang da ya sai shara de nang hpe woi hkawm wa ai shaloi, nang hpe bau sin makawp maga na matu, na a shawng e lamu kasa hpe ngai shangun dat ni ai. 21 Shi a man e sadi mu, shi a ga hpe madat mu. Ngai shi hpe shangun da ni ai rai nna shi hpe hkum gumlau nga myit. Dai zawn re ai gumlau lam hpe shi mara dat ya na ra ai n rai. 22 Rai ti mung, shi a ga madat mara nna, ngai hkang da ai lam shagu hpe hkan galaw nga yang chyawm gaw na a gumlau hpyen ni yawng hpe ngai gasat kau ya na nngai. 23 Nye a lamu kasa gaw na a shawng e sa wa nna, Amori, Hiti, Hperizi, Hkanan, Hiwi hte Yebusi masha ni shanu nga ai mung de nang hpe woi wa nna dai ni hpe ngai jahten kau na we ai. 24 Shanhte a hpara sumla ni hpe dingnyawm gum dagup lu na ndai n rai; dai ni hpe nawku lu na n rai; shanhte a makam masham hte seng ai htung lai len ni hta hkan sa galaw lu na ndai n rai. Shanhte a hpara sumla ni hpe jahten sharun kau nna, shanhte a chyoi pra ai nlung shadaw ni hpe agrawp shadaw kau lu na myit dai. 25 Dai Madu nanhte a Karai Kasang rai nga ai Ngai hpe nawku myit dai rai yang chyawm gaw ngai nanhte hpe malu masha hte lu na ntsin shaman ya nhtawm nanhte a machyi makaw ana ahkya mahkra hte hpe yeng seng kau na we ai. 26 Numsha ni kadai mung na a mung hta nbya bya na n rai; maudung dung na n rai. Nanhte hpe mung asak galu shangun na made ai.
27 ?Nanhte hte nhtan shai ai amyu masha ni, ngai hpe hkrit na mara ai; nanhte gasat ninghkap nga ai masha ni a ka-ang e, kashuk kashak lam ngai shapraw dat nna na a gumlau hpyen ni yawng kayin mat wa ai hte nang kaw na hprawng mat wa shangun na nngai. 28 Ngai gaw na a gumlau hpyen ni a ka-ang de gat shang shangun dat nna, nanhte a shawng e nga nga ai Hiwi, Hkanan, hte Hiti masha ni hpe gawt shapraw kau na we ai. 29 Shanhte hpe laning mi laman sha, ngai shapraw kau na n rai; dai hku ngai galaw ai rai yang, dai mung gaw katsi katsang shara tai mat nna, nam na matse labye dusat ni mung nanhte a matu nau wa law jawng na mara ai. 30 Shing di na malai, nanhte mung law htam wa nna, dai mung hpe madu la lu ai aten du hkra, shanhte hpe yat yat sha gawt shapraw kau na we ai. 31 Na a lamu ga jarit hpe Nawng Hkyeng kaw nna Uhprat hka nu du hkra, Ka-ang panglai kaw nna nam mali de du hkra ngai maden ya na we ai. Dai mung hta shanu nga ai masha ni hpe up hkang lu na daru magam n-gun, ngai nanhte hpe jaw na made ai; nanhte rawt lung wa nna shanhte hpe gawt shapraw kau lu na rai myit dai. 32 Shanhte hte mung, shanhte a hpara ni hte mung myit hkrum ga shaka tawn da lu na myit dai n rai. 33 Na a mung hta dai masha amyu ni hpe nga shangun lu na n rai; nang nga shangun ai rai yang, ngai hte nhtan shai ai yubak shanhte nang hpe galaw shangun na mara ai. Shanhte a hpara ni hpe nang nawku ai rai yang, dai gaw na a matu si shangun lu ai mahkam tai na ra ai,? ngu nna tsun wu ai.