21
(Trj 15:12-18)
1 ?Israela masha ni hpe ndai hkan sa tara ni jaw ya u:
2 Nang gaw Hebre mayam langai mari ai rai yang, shi gaw na a matu kru ning daw jau ya lu na rai wu ai. Sanit ning ngu na shaning hta chyawm gaw manu jahpu hpa mung n jaw ra ai sha, shalawt kau dat ai shi hkrum na rai wu ai. Ref 21:2-6: Jaw 25:39-46.
3 Shi gaw na a mayam tai ai aten hta shi chyu sha rai yang gaw shi pru wa ai shaloi, madu jan hpe woi mat wa lu na n rai; rai ti mung na a mayam tai ai shaloi, madu jan lu ai rai yang gaw, shi a madu jan hte rau pru mat wa lu na rai nga ai.
4 Shi a madu e la ya ai num hte nga nna, dai num hte shayi shadang sha shaprat yang, madu jan hte shi a shayi shadang sha ni gaw madu hte seng nga ai; dai lasha wa chyawm gaw shi chyu sha pru wa lu na rai wu ai.
5 Rai ti mung dai mayam wa mahtang mayam madu hpe tsaw ra nna, shi a madu jan hte kashu kasha ni hpe mung n shalawt kau dat mayu ai rai yang,
6 shi a madu gaw shi hpe nawku ai shara de woi sa na rai wu ai. Dai yang na chyinghka shing n rai chyinghka shadaw hta shi hpe shatsap da nna, shi a na hpe shajut ya na rai wu ai. Dai hpang shi gaw shi a matu prat tup mayam tai nga na rai wu ai.
7 ?Masha langai ngai shi a shayi sha hpe mayam zawn dut kau dat ai rai yang, lasha mayam ni zawn shalawt kau dat ai shi hkrum na rai wu ai n rai.
8 Numsha gaw marai langai ngai a madu jan tai na matu yaw shada ai hte dut kau hkrum ai rai ti mung dai la wa shi hpe n ra ai rai yang, dai numsha gaw shi a kawa hpang de dut nhtang kau ai hkrum na rai wu ai; shi a mayam madu wa chyawm gaw shi hpe maigan masha ni a lata de dut ya lu na n rai; hpa majaw nga yang, shi mahtang dai numsha hpe n tsawm n htap ai hku di kau nu ai majaw rai nga ai.
9 Marai langai ngai gaw shi a shadang sha a matu mayam num langai mari ai rai yang, shi gaw dai numsha hpe shi a shayi sha langai zawn lanu lahku na rai wu ai.
10 Lasha langai gaw num bai la kahtap ai rai yang, shawng num hpe shawng na hte maren, shi hkam la nga sai malu masha, hpun palawng hte ahkaw ahkang ni hpe matut madi shadaw jaw ya lu na rai wu ai.
11 Shi gaw dai lit ni hpe n jahpring shatsup ya lu ai rai yang, shi kaw na manu jahpu hpa mung n hpyi la ai sha shalawt kau dat na rai wu ai.
12 Masha langai mi hpe adup kayat nhtawm sat kau ai wa kadai mung si ai hkrum na rai wu ai. Ref 21:12: Jaw 24:17.
13 Rai ti mung, dai wa hpe sat na matu dingsa n di ai sha byin wa ai rai yang, shi hprawng lawt lu na shim ai shara langai shi a matu ngai san da ya na we ai. Ref 21:13: Bhk 35:10-34; Trj 19:1-13; Ysh 20:1-9.
14 Rai ti mung, masha langai mi masin pawt nna kaga langai mi hpe dingsa sa sat kau ai rai yang, shim lum na matu, nye a tawn hkungri de hprawng sa wa ti mung, shi gaw si lu na rai wu ai.
15 ?Kanu kawa hpe kayat adup ai wa kadai mung si lu na rai wu ai.
16 ?Marai langai ngai hpe rim makoi mat wa nhtawm shi hpe dut kau nna mayam langai zawn tawn da ai wa kadai mung si lu na rai wu ai. Ref 21:16: Trj 24:7.
17 ?Tinang a kanu kawa hpe matsa ai wa kadai mung si lu na rai wu ai. Ref 21:17: Jaw 20:9; Mat 15:4; Mrk 7:10.
18-19 ?Masha shada ga law nna, langai mi gaw kaga langai wa mi hpe nlung hte shing n rai shi a lata hte htwi ti mung shi hpe n sat kau ai rai yang, shi gaw ari jaw ai hkrum lu na n rai. Kayat adup hkrum nna yup ku ntsa e taw nga ai wa gaw hpang e shi rawt tsap nna, dawhkrawng hta madi let shinggan de pru hkawm wa yang, shi hpe kayat adup ai wa mahtang shi mai tsai mat wa ai aten du hkra, hkatum tum ai a matu gumhpraw jaw nna shi hpe lanu lahku lu na rai wu ai.
20 ?Marai langai ngai gaw shi a mayam num mayam la hpe shingna hte kayat nna, dai shara hta nan mayam wa si mat yang, masha dai wa gaw ari jaw ai hkrum na rai wu ai.
21 Rai ti mung, dai mayam lani, ni ni laman n si mat yang gaw mayam madu wa ari jaw ai hkrum na wu ai n rai. Shi a sut rai jasum kau ai ari gaw ram la nga sai.
22 ?Lasha nkau mi kamu hkat nna, na-um nasin re ai numsha hpe machyi hkra kau ai majaw, shi a ma nbya bya mat hkra rai ti mung, shi hta kaga lam hku nna machyi n hkrum ai rai yang, shi hpe machyi shangun ai wa mahtang dai num a madu wa hpyi ai hpe tara agyi ni daw dan ya ai hte maren, wa lu na rai nga ai.
23 Rai ti mung, dai numsha shi nan machyi hkrum ai rai yang, asak a matu asak
24 myi a matu myi, wa a matu wa, lata a matu lata, lagaw a matu lagaw, Ref 21:24: Jaw 24:19-20; Trj 19:21; Mat 5:38.
25 wan hkru ai a matu wan hkru ai, hpye ai a matu hpye ai, shingna hkang a matu shingna hkang, ari jaw ai hkrum lu na rai wu ai.
26 ?Marai langai ngai gaw shi a mayam num, mayam la a amyi htwi jahten kau ya ai rai yang, myi jahpu a matu, shi gaw mayam kaw na shalawt hkrum na wu ai.
27 Shi rai nna wa langai agrawp shadaw kau ya ai rai yang, wa daw mat ai a matu, shi gaw mayam kaw na shalawt hkrum na rai wu ai.
28 ?Dumsu usu langai gaw marai langai ngai hpe si hkra daru sat ai rai yang, dai hpe nlung hte kabai sat lu na rai nga ai; de a ashan sha lu na n rai; rai ti mung dumsu madu chyawm gaw ari jaw hkrum na n rai.
29 Rai ti mung, dumsu dai masha hpe htim ai akyang rawng nga ai hpe dumsu madu wa sadi jaw hkrum wu ti mung, dai hpe shi n dun n rem ai a majaw marai langai hpe si hkra daru sat kau ai rai yang, dai dumsu hpe nlung hte kabai sat kau na rai myit dai; de a dumsu madu mung si lu na rai wu ai.
30 Dai dumsu madu wa, shi a asak hkrang la na matu wa na ahkang lu ai rai yang, hpyi ai manu tup hpe shi jaw lu na rai wu ai.
31 Dai usu gaw lasha shing n rai numsha hpe daru sat ai rai yang, dai tara hte maren, shi hpe di lu na rai nga ai.
32 Dai dumsu usu gaw mayam num mayam la daru sat ai rai yang, usu madu gaw mayam madu hpe gumhpraw sumshi wa nna, dai usu hpe mung nlung hte kabai sat kau na rai nga ai.
33 ?Marai langai ngai nhkun n magap da ai mi rai rai, nhkun htu nna n magap da ai mi rai rai, dai hta e dumsu usu shing n rai lawze hkrat bang yang,
34 shi gaw de a manu jahpu jaw ya ra nga ai. Shi gaw yam nga madu hpe hkrat ang ai gumhpraw jaw nhtawm si mang hpe shi la lu nga ai.
35 Marai langai ngai a usu gaw kaga wa a usu hpe daru sat ai rai yang, dumsu madu yan gaw hkrung nga ai dumsu hpe dut nna, gumhpraw garan la na rai ma ai. Si sai dumsu ashan hpe mung garan la na rai ma ai.
36 Rai ti mung, usu dai htim ai akyang rawng ai hpe chye nga ninglen, de a madu n dun n rem ai rai yang, sum mat ai a matu hkrung ai usu langai wa lu na rai wu ai; rai ti mung dumsu chyasi hpe chyawm gaw shi lu la na wu ai.