12
Dai Madu gaw Mawshe yan Arun hpe Egutu mung hta ning ngu nna tsun wu ai: Ref 12:1-13: Jaw 23:5; Bhk 9:1-5; 28:16; Trj 16:1-2. ?Ndai shata gaw nanhte a matu laning mi a shawng na shata rai na malit dai. Israela shawa hpung masha ni hpang de ndai ga matsun ni jaw ya mu. Ndai shata a shi ya shani e, masha shagu gaw sagu kasha langai ngai shing n rai bainam kasha langai ngai hpe tinang a nta dinghku a matu lata san da na rai myit dai. Tinang dinghku gaw yam nga hkum ting sha na matu nau wa kaji ai rai yang, shi hte shi a htingbu ni hte kahkyin nhtawm masha shagu sha law na daram masha ni hpe hti shagu lu na ndai. Nanhte gaw sagu hpe rai ti mung, bainam hpe rai ti mung, lata san da lu na rai myit dai, rai ti mung dai gaw hpa mung ra n rawng ai hte laning mi ladu hkrum sai ala rai lu na myit dai. Dai hpang, Israela shawa hpung ni yawng gaw dai shata a shi mali ya shana de, yam nga ni hpe sat na rai myit dai. Dai amyu masha ni gaw asai loi mi la nna yam nga shan sha na nta ni a chyinghka hkadun ni hte hkanoi ni hta chya da lu na rai myit dai. Dai shana e, shan hpe wan hta kakang nhtawm, matsi n rawng ai muk hte hka ai tsi ru ni hte hpawn sha lu na myit dai. Shan katsing hpe mung, shadu shapyaw ai hpe mung sha lu na n rai; rai ti mung, abaw, lagaw ni hte kata na pu kan ni rawng ai hkum nawng kakang ai hpe chyawm gaw sha lu na rai myit dai. 10 Kaning re ai ashan hpe mung, jahpawt du hkra hkum ngam da myit; loi li mi ngam da hkrup ai rai yang mung dai hpe nat kau na rai myit dai. 11 Nanhte gaw bu hkawm na matu bu hpun palawng, lagaw hta hkyepdin din, lata hta dawhkrawng lang da nna, dai lusha hpe tin tin sha na rai myit dai; dai gaw Ngai Madu hpe shagrau hkungga ai Shalai Wa Ai Poi rai nga ai.
12 ?Dai shana jang, Ngai gaw Egutu mung ting de dinghkren mat wa nna masha hte yam nga lahkawng yan kaw na kasha alat shagu hte hpe sat kau nhtawm, Egutu a karai ni yawng hpe mung ari jaw na we ai. Ngai gaw dai Madu rai nga nngai. 13 Chyinghka hkadun ni hta kap ai asai gaw nanhte rawng nga ai nta hpe matsing na matu kumla tai na ra ai. Dai asai hpe ngai mu ai shaloi, nanhte hpe ngai shalai kau da na we ai. Egutu masha ni hpe ari jaw ai shaloi nanhte hta machyi shoichyum hkrum na myit dai n rai. 14 Nanhte gaw Ngai Madu hpa galaw kau ni ai lam hpe adum nga na matu nawku htung hte seng ai poi langai zawn dai shani e nanhte galaw lu na rai myit dai. Dai poi hpe mung prat mi hte prat mi galaw lu na rai myit dai.? Ref 12:14-20: Pru 23:15; 34:18; Jaw 23:6-8; Bhk 28:17-25; Trj 16:3-8.
15 Dai Madu gaw, ?Nanhte dai matsi hte galaw ai muk hpe sanit ya tup sha lu na myit dai n rai; matsi n rawng ai muk hpe chyu sha, sha lu na rai myit dai. Nanhte gaw shawng shani e tinang dum nta hkan nga ai matsi yawng hpe seng kau lu na myit dai. Ndai sanit ya nhtoi laman hta matsi hte galaw ai muk hpe sha hkrup ai wa kadai hpe mung, nye a amyu masha ni kaw na sumri dan kau ai hkrum na ra ai. 16 Shawng shani hte sanit ya nhtoi hta nawku hpawng galaw na matu nanhte hkrum zup lu na rai myit dai. Dai nhtoi ni hta magam amu hpa mung n galaw lu na rai myit dai, rai ti mung lusha hkyen lajang mai nga myit dai. 17 Ngai gaw nanhte a amyu bawsang ni hpe Egutu mung kaw na woi shapraw wa ai shani rai nga ai majaw dai poi hpe adum nga mu. Dai nhtoi hta poi galaw na matu masat da sai hte maren, nanhte gaw du na ra ai ban prat yawng hta dai shani e poi galaw lu na rai myit dai. 18 Nanhte gaw shawng shata a shi mali ya shana de kaw nna dai shata hkun langai ya shana de du hkra, matsi hte galaw ai muk sha lu na myit dai n rai. 19-20 Nanhte a dum nta ni hta sanit ya tup matsi rawng nga lu na n rai; Israela masha rai ti mung, maigan masha rai ti mung matsi hte galaw ai muk sha ai wa gaw nye a amyu masha kaw na sumri dan kau ai hkrum na ra ai,? ngu nna tsun wu ai.
21 Mawshe gaw Israela ningbaw ni yawng hpe shaga la nhtawm shanhte hpe, ?Nanhte gaw tinang nang a matu sagu kasha shing n rai bainam kasha langai ngai hpe lata la nna, dai hpe sat na rai myit dai, shing rai nanhte a dinghku masha ni dai Shalai Wa Ai Poi hpe galaw lu na rai myit dai. 22 Kungla lakung langai la nna dusat asai rawng ai jarung hta dai hpe kapruk la nhtawm nanhte a nta chyinghka hkadun hte hkanoi ni hta asai hpe arut shakap da na rai myit dai. Kadai mung jahpawt du hkra nanhte a nta kaw na pru lu na myit dai n rai. 23 Dai Madu gaw Egutu masha ni hpe sat na nga, Egutu mung de dinghkren hkawm mat wa ai shaloi, chyinghka hkadun hte hkanoi ni hta arut shakap da sai asai hpe mu jang, Si Du a lamu kasa hpe nanhte a nta de shang nna nanhte hpe sat kau shangun na nngai n rai. Ref 12:23: Heb 11:28. 24 Nanhte hte nanhte a kashu kasha ni mung dai hkang da ai tara ni hpe htani htana madat mara lu na myit dai. 25 Dai Madu gaw nanhte hpe jaw na ngu nna ga sadi tawn da sai mungdan de nanhte du shang wa ai shaloi, ndai nawku daw jau ai amu hpe galaw lu na rai myit dai. 26 Nanhte a kashu kasha ni gaw nanhte hpe, ?Ndai zawn nawku daw jau ai lai gaw kaning re ai hpe ngu mayu a ta?,? ngu nna san ai shaloi, 27 nanhte gaw, ?Ndai gaw dai Madu gaw Egutu mung na Israela masha ni a dum nta ni hpe lai kau da ai majaw shi hpe shagrau hkungga na matu galaw ai Shalai Wa Ai Poi a shagu hkungga rai nga ai. Shi gaw Egutu masha ni hpe sat kau ti mung anhte hpe chyawm gaw jahkrung da mi ai,?? ngu nna htan na rai myit dai.
Israela masha ni gaw hput di di let nawku ma ai. 28 Dai hpang shanhte sa nna dai Madu Mawshe yan Arun hpe hkang da nu ai hte maren hkan galaw ma ai.
29 Dai Madu gaw shana yup tung e nan Egutu mung na shadang sha alat ni yawng ngu na, hkawhkam tingnyang dung na hkawhkam wa a shadang sha alat kaw nna ga htawng hta bawng dung hkrum ai wa a shadang sha alat kaw du hkra hpe mung, yam nga ni a kasha alat ni hpe mung, sat kau wu ai.Ref 12:29: Pru 4:22-32. 30 Dai shana e, hkawhkam wa, shi a du salang ni, hte kaga Egutu masha ni yawng gaw yup hprang nga ma ai. Egutu mung ting hta ja ja jahtau hkrap nga ma ai, hpa majaw nga yang, shadang sha langai mi mung n si ai nta langai mi mung n nga nga ai. 31 Dai shana e nan, hkawhkam wa gaw Mawshe yan Arun hpe, ?Nan hte hpawn Israela masha ni pru mat wa manu! Nye a mung kaw na pru mat wa nhtawm, nan tsun yu manit dai hte maren, dai Madu hpe sa nawku masu. 32 Nanhte a sagu, bainam hte dumsu yam nga hpung ni hpe la mat wa nna pru mat wa manu. Ngai hpe mung shaman ya da mi,? ngu nna tsun wu ai.
33 Egutu masha ni mung, mungdan kaw na alawan sha pru mat wa na matu amyu masha ni hpe shadut ma ai; shanhte gaw, ?Nanhte n pru mat wa ai rai yang, anhte yawng si mat na ga ai,? ngu nna tsun ma ai. 34 Dai rai nna amyu masha ni mung shanhte a muk kabaw ai di jang ni hta matsi n rawng ai muk shadung ni hte jahpring nhtawm dai ni hpe hpun nba ni hte makai nna, shanhte a lahpa ntsa hta hpai ma ai. 35 Israela amyu masha ni gaw Mawshe tsun da sai hte maren galaw ma ai rai nna, aja arai, gumhpraw arai hte hpun palawng ni hpe Egutu masha ni kaw na hpyi la ma ai. Ref 12:35-36: Pru 3:21-22. 36 Dai Madu mung Egutu masha ni hpe dai amyu ni a man e hkrit hkungga shangun wu ai rai nna shanhte hpyi mahpyi hpe jaw ya ma ai. Ndai lam hku nna Israela amyu masha ni Egutu masha ni a sut gan hpai mat wa ma ai.
37 Israela masha ni gaw Ramese kaw nna Suhkot de du hkra, lagaw lam hte sa wa ma ai. Ma kaji hte numsha ni hpe n hti shalawm yang, lasha ni hkrai sen kru daram rai nga ai. 38 Kaga amyu baw law law ni mung, sagu, bainam hte dumsu yam nga hpung law law mung shanhte hte rau hkawm nang nga ma ai. 39 Shanhte gaw Egutu mung kaw na gawt kau hkrum masai rai nna, shanhte a lusha hpe shajin la na matu mung, matsi rawng ai muk katsing shachyip gun na matu mung, akajawng sha aten n lu ma ai majaw Egutu mung kaw na la pru wa ai muk katsing hpe matsi n rawng ai sha kabaw sha ma ai.
40 Israela amyu masha ni gaw Egutu mung e 430 ning tup sa nga kau manu ai. Ref 12:40: Nin 15:13; Gal 3:17. 41 Dai 430 ning htum ai shani hta nan, dai Madu a masha ni rai nga ai amyu bawsang ni yawng Egutu mung kaw na pru mat wa ma ai. 42 Dai shana gaw dai Madu shanhte hpe bau maka let Egutu mung kaw na woi wa ai shana rai nga ai. Dai shana nan gaw Israela masha ni prat mi hte prat mi adum nga nna hkan nga na dai Madu a matu ap nawng da ai shana rai nga ai.
43 Dai Madu gaw Mawshe yan Arun hpe, ?Ndai ni gaw Shalai Wa ai Poi hta hkan sa na tara ni rai nga ai: maigan masha kadai mung dai Shalai Wa Ai Poi a hkungga lusha sha lu na n rai, 44 rai ti mung nanhte mari la sai mayam ni kadai mung shawng nnan matu gadoi hkam sai rai yang, dai hpe sha mai nga ai. 45 Chyahkring chyahkra sa shingbyi ai hte shabrai sha ai nchyang ni kadai mung dai hpe sha mai nga ai n rai. 46 Dai hpe hkyen shachyip da sai nta kaw nan dai hkungga shan hpe sha lu na myit dai; dai hpe mung shinggan de n la shapraw lu na rai myit dai; yam nga nra langai mi mung daw kau lu na n rai. Ref 12:46: Bhk 9:12; Yhn 19:36. 47 Israela shawa hpung ting ndai poi hpe galaw lu na rai ma ai, 48 rai ti mung matu n gadoi ai masha kadai mung dai hpe sha mai nga ai n rai. Nanhte a ka-ang hta tsat nang ai maigan masha langai mi dai Madu hpe shagrau sha-a na matu Shalai Wa Ai Poi hpe galaw mayu ai rai yang, shi a nta na lasha ni yawng hpe shawng nnan matu gadoi ya na rai myit dai. Dai hpang shi gaw Israela amyu masha zawn di la nhtawm dai poi hta shang lawm lu nga ai. 49 Dai tara ni mahtang Israela mungchying masha ni a matu mung, maren sha rai nga ai,? ngu nna tsun wu ai. 50 Israela masha ni yawng mung dai Madu Mawshe yan Arun hpe hkang da nu ai hte maren madat mara ai hte hkan galaw ma ai. 51 Dai shani hta nan, dai Madu gaw Israela amyu bawsang ni hpe Egutu mung kaw na woi shapraw wa wu ai.