10
Dinggam-Yaw
1 Dai hpang dai Madu gaw Mawshe hpe, ?Hkawhkam wa kaw sa yu su. Shanhte a ka-ang e ndai mauhpa lamik kumla ni galaw dan na matu mung,
2 mauhpa lamik kumla ni hpe ngai shapraw dan ai shaloi, Egutu masha ni hpe ngai kaning rai mana shachyoi kau ni ai gaw na a kasha ni hte kashu ni hpe nang tsun dan lu na matu mung, ngai gaw shi hte shi a du salang ni hpe myit shaja ya ni ai. Nanhte yawng mung Ngai nan dai Madu rai nga nngai hpe chye lu na myit dai,? ngu nna tsun wu ai.
3 Dai rai nna Mawshe yan Arun gaw hkawhkam wa kaw shang nna shi hpe, ?Hebre masha ni a Madu Karai Kasang mahtang, ?Nang gaw galoi aten du hkra nye a ga n madat na ngu nga n ta? Nye a amyu masha ni hpe sa wa shangun u, shaloi shanhte ngai hpe nawku lu na rai ma ai.
4 Nang matut nna ningdang nga dingyang rai yang chyawm gaw hpawt de na aten hta na a mungdan de dinggam-yaw ni hpe dat dat na we ai.
5 Dai ni gaw grai law nga ma ai rai nna, ga ting hpe atsai awai ka-up na mara ai. Dai ni gaw sin marang e n jahten hkra nna naw ngam ai hpun nga manga ni hpe pyi sha kau na mara ai.
6 Dai ni gaw na a hkawhkam htingnu ni hta mung, na a du salang ni yawng a nta ni hta mung, na a amyu masha ni yawng hta mung hpring chyat nga na mara ai. Dai ni gaw na a kaji kawa ni mu yu sai arai hpa baw hta na mung grau sawng hkra rai na mara ai,?? ngu nna tsun wu ai. Dai hpang Mawshe kayin pru mat wa wu ai.
7 Dai hkawhkam wa a du salang ni gaw shi hpe, ?Ndai wa galoi du hkra anhte hpe ru yak jam jau jaw na rai wu ta? Israela lasha ni hpe dat dat ya ga, shaloi shanhte a Madu Karai Kasang hpe nawku lu na mara ai. Ya Egutu mung hten za mat sai gaw nang n chye n ni?,? ngu nna tsun ma ai.
8 Dai rai nna Mawshe yan Arun hpe hkawhkam wa hpang de woi jashawn nhtawm shan hpe, ?Dai Madu nanhte a Karai Kasang hpe nanhte sa nawku lu na rai myit dai. Rai ti mung kadai dai hkrak sa na rai nga myit ni?,? ngu nna tsun wu ai.
9 Mawshe gaw, ?Anhte a ma kaji ni, asak kaba sai gumgai dingla ni hte hpawn anhte yawng hkra sa na ga ai. Anhte gaw dai Madu hpe shagrau hkungga ai poi galaw na ga ai majaw anhte a shayi shadang sha ni, sagu, bainam hte dumsu yam nga hpung ni hte nawng woi sa wa na ga ai,? ngu nna htan wu ai.
10 Hkawhkam wa gaw, ?Nanhte a numsha ni hte ma kaji ni hpe nanhte hte rau galoi mung n woi sa lu na rai myit dai gaw dai Madu hta ngai dagam da se ai! Nanhte ngai hpe gumlang maw mawn na lam gaw asan sha rai nga myit dai.
11 N rai law! Nanhte ra sharawng myit dai rai yang chyawm gaw lasha ni chyu sa nna, dai Madu hpe nawku lu na rai myit dai,? ngu nna tsun wu ai. Dai lam a majaw Mawshe yan Arun mung hkawhkam wa a man na gawt shapraw kau ai hkrum nga ma ai.
12 Dai hpang dai Madu gaw Mawshe hpe, ?Dinggam-yaw ni du sa wa mu ga, na a lata hpe Egutu mung a ntsa e sharawt tawn u. Dai ni du nna tu matu mahkra hte sin adup ngam da ai nga manga hte hpe sha kau na mara ai,? ngu nna tsun wu ai.
13 Shaloi Mawshe gaw shi a dawhkrawng sharawt dat wu ai shaloi dai Madu gaw sinpraw nbung hpe dai mung a ntsa e shani shana bung shangun nhtawm, jahpawt rai jang, dai nbung gaw dinggam-yaw ni hpe woi kanawng da wu ai.
14 Dai ni gaw mungdan ting a ntsa e shang kahpoi nna hkrat ka-up nga ma ai. Dai gaw nachying kaba ai dinggam-yaw wunawng mi rai nna, shawng de mung n byin yu, hpang de mung dai zawn re ai hpe bai mu lu na ra ai n rai. Ref 10:14-15: Shr 9:2-3.
15 Dai ni gaw lamu ga chyang mat hkra ga ting hpe galup kau nna, sin e n hkra hkrup ai mung ting na arai yawng mayawng hte namsi hpun yawng mayawng sha kau ma ai. Egutu mung ting hta tsit lali ai hpun hte hkai nmai ni langai mi mung n ngam mat malu ai.
16 Dai hpang hkawhkam wa gaw Mawshe yan Arun hpe alawan shaga la nhtawm, ?Ngai gaw dai Madu nan a Karai Kasang hpe mung, nan hpe mung shut kau ni ai.
17 Ndai lang mi sha gaw nye a yubak hpe naw dat kau ya mi. Ndai si shangun lu ai ari hpe mung ngai kaw na yeng kau ya na matu nan a Karai Kasang kaw hpyi nem ya mi,? ngu nna tsun wu ai.
18 Mawshe gaw hkawhkam wa kaw na pru mat wa nhtawm dai Madu hpe hpyi nem ya wu ai.
19 Dai Madu gaw sinpraw nbung a malai n-gun ja htum ai sinna nbung hpe dat dat nhtawm dinggam-yaw ni hpe magawn mat wa nna Nawng Hkyeng hta jahkrat bang kau wu ai. Egutu mung ting hta dinggam-yaw langai mung ngam nga ai n rai.
20 Rai ti mung dai Madu gaw hkawhkam wa hpe myit shaja ya wu ai rai nna, Israela ni hpe dat dat ya na n hkraw wu ai.
Htat Ai Nsin
21 Dai hpang dai Madu gaw Mawshe hpe, ?Na a lata lamu de sharawt tawn u; shaloi masawp hkrup lu ai dai htat ai nsin gaw Egutu mung hpe ka-up jasin kau na ra ai,? ngu nna tsun wu ai.
22 Mawshe mung shi a lata hpe lamu de sharawt dat wu yang, Egutu mung ting hta masum ya tup nsin chyip rai mat nga ai. Ref 10:22: Shk 105:28; Shr 16:10.
23 Egutu masha ni mung shada da n mu lu ma ai rai nna, dai aten laman kadai mung tinang nang a nta kaw nna n pru sa lu ma ai. Rai ti mung Israela amyu masha ni shanu nga ai mung hta chyawm gaw nhtoi lu ma ai.
24 Hkawhkam wa gaw Mawshe hpe shaga la nna, ?Nanhte a numsha ni hte ma kaji ni, nang hte rau dai Madu hpe nawku lu na matu pru sa lu na rai myit dai. Rai ti mung nanhte a sagu, bainam hte dumsu yam nga ni hpe chyawm gaw ndai yang e, tawn da lu na rai myit dai,? ngu nna tsun wu ai.
25 Mawshe mahtang, ?Dai rai taw, dai Madu anhte a Karai Kasang hpe hkungga nawng ya na, dai shagu hkungga hte wan nat hkungga a matu dusat yam nga ni hpe pyi nang anhte hpe jaw ra na rai ndai.
26 Dai hku n rai yang, anhte a yam nga ni hpe anhte hte rau woi sa na ga ai; langai mi hpe mung ngam kau da na ga ai n rai. Anhte nan dai Madu anhte a Karai Kasang hpe nawku ai hta gara mahtang lang na hpe lata la ra ga ai. Dai shara de anhte du ai aten du hkra, shi hpe kaning re ai yam nga ni hte nawng jau na pyi anhte chye lu na ga ai n rai,? ngu nna htan wu ai.
27 Dai Madu mung hkawhkam wa hpe myit shaja ya wu ai rai nna shi shanhte hpe n dat ya wu ai.
28 Shi gaw Mawshe hpe, ?Nye a man kaw na pru mat wa u! Na a myi man ngai hpe galoi mung bai hkum mu shangun et, nye a myi man bai mu ai shani gaw, nang si na rai ndai!,? ngu nna tsun wu ai.
29 Mawshe gaw, ?Nang tsun ai lam jaw nga ndai; nang ngai hpe galoi mung bai mu lu na nit dai n rai,? ngu nna htan wu ai.