6
Hkawhkam wa gaw dai shana e n lu yup ai rai nna mungdan e tara shang labau gawn ka matsing da ai ni la shapraw nhtawm shi hpe hti dan na hkang da wu ai. Shanhte daw mi naw hti nga yang, hkawhkam wa hpe lagyim sat kau na matu hkawhkam wa a gawk ni hpe sin ya nga ai hkawhkam htingnu na unuk lahkawng rai nga ai Bightana hte Tere yan a maw mawn ai lam hpe Mordehkai kaning rai shabrawng kau dat ya ai lam lawm nga ai. Hkawhkam wa gaw, ?Mordehkai dai lam shabrawng dat ai majaw shi hpe kaning rai shagrau sha-a ai hte kumhpa jaw shagrau saga ta?,? ngu nna san wu ai.
Shi a shangun ma ni mahtang, ?Shi a matu hpa mung n galaw yu ga ai,? ngu nna htan mu ai. Hkawhkam wa gaw, ?Hkawhkam htingnu kata e nye a du salang ni kadai wa nga nga a ta?,? ngu nna san wu ai. Mordehkai hpe masha sat ai shara hta noi da na matu ya jin jin di da nna dai lam hkawhkam wa hpe sa san na nga, ya sha wang kata de Haman shang wa sai. Dai rai nna shangun ma ni gaw, ?Haman nang e nga nga ai nang hte hkrum na matu ala nga ai,? ngu nna htan mu ai.
Hkawhkam wa gaw, ?Shi shang ru ga,? ngu nna tsun wu ai.
Dai rai nna Haman shang wa ai hte hkawhkam wa gaw shi hpe, ?Ngai grai di shagrau sha-a mayu ai masha langai nga nga ai. Dai wa a matu ngai hpa galaw ya ang na rai ta?,? ngu nna san wu ai.
Haman chyawm gaw, ?Ya hkawhkam wa grai di nna shagrau sha-a mayu ai gaw kadai hpe rai ta? Ngai mi she teng teng rai nga a dawng,? ngu nna shi a kraw kata myit yu nga ai. 7-8 Dai rai nna shi gaw hkawhkam wa hpe, ?Nang nan hpun ai palawng galu, dai masha wa a matu hkawhkam palawng ni la sa ya na hkang dat wu. Na a jawn gumra hta hkawhkam a mawn sumli arai langai mara tawn na mung hkang da u. Dai hpang tsaw htum ai na a du magam langai mi hpe ndai palawng galu ni bu hpun shangun nna gumra jawn let mare lam hku shi hpe woi lai nna, shanhte hkawm sa wa yang, du magam langai mi hpe ning ngu ndau shabra shangun na rai nga ai: ?Hkawhkam wa shagrau sha-a mayu ai masha wa hpe shi ning rai shagrau nga ai hpe yu yu mu!??
10 Dai hpang hkawhkam wa gaw Haman hpe, ?Nang hpaji jaw ai hte maren, palawng galu ni hte gumra hpe tin tin wa la nhtawm Yuda masha Mordehkai a matu ndai shagrau sha-a lam ni galaw u. Hkawhkam htingnu a shang wa chyinghka lam e dung nga ai hpe nang mu na rai ndai,? ngu nna tsun wu ai.
11 Dai rai nna Haman mung palawng galu ni hte gumra hpe la nna Mordehkai hpe palawng galu ni jahpun ya wu ai; dai hpang Mordehkai hpe gumra shajawn nhtawm mare lam hku shi hpe woi nna shanhte hkawm sa wa yang masha ni hpe ning ngu ndau tsun wu ai: ?Hkawhkam wa shagrau sha-a mayu ai wa hpe shi ning rai shagrau nga ai hpe yu yu mu!?
12 Dai hpang Mordehkai gaw hkawhkam htingnu chyinghka de bai nhtang wa nga yang, Haman chyawm gaw yawn nna shi a myi man magap let nta de tin tin wa mat wu ai. 13 Shi gaw shi hta byin mabyin lam mahkra hpe shi a madu jan hte shi a manaw manang ni yawng hpe wa tsun dan wu ai. Shaloi madu jan hte hpaji rawng ai shi a manang ni gaw shi hpe, ?Nang gaw Yuda masha Mordehkai a man e n-gun sum hpang wa nga ndai majaw shi hpe dang lu na n rai. Shi chyawm gaw nang hpe teng teng dang kau na ra ai,? ngu nna tsun mu ai.
14 Shanhte ga naw shaga nga ma yang, hkawhkam htingnu na unuk ni du sa wa nna Eshta a lusha poi de sa na matu Haman hpe tin tin sa woi la ma ai.