1 Shing rai byin ai lam yawng hpe Mordehkai chye ai shaloi, dai nni nkri a majaw shi a hpun palawng ni hpe gang je kau wu ai. Dai hpang lachyit sumpan hpe bu hpun nhtawm shi a baw hpe dap hte bun nna mare hku lai wa nhtawm nsen kaba hte ahkup ahka ngu hkam sha let, 2 hkawhkam htingnu chyinghka de shi shang wa ai aten du hkra hkrap agru nga ai. Lachyit sumpan bu hpun ai wa kadai mung kata de shang na ahkang n lu ai majaw shi kata de n shang lu nga ai. 3 Hkawhkam wa a ndau shabra ai Tara Laika du sai mungdaw shagu hta Yuda masha ni ja ja sharung shayawt nga ma ai. Shanhte gaw lusha gam, hkrap ngu hkrap ngoi ai hte yawn hkyen hkrum ma ai; shanhte law malawng hte gaw lachyit sumpan bu hpun nna dap shingmun hta kaleng taw ma ai.

4 Eshta a shangun ma numsha ni hte unuk ni gaw Mordehkai hpa galaw nga ai lam shi hpe tsun dan ma ai shaloi, shi nachying myit yawn nga ai. Lachyit sumpan a malai bu hpun palawng nkau mi galai hpun na matu Eshta shi hpe shagun ya wu ti mung, dai ni hpe shi n hkap la nga ai. 5 Shaloi Eshta gaw hkawhkam wa shi a matu nga nna san da ya ai hkawhkam htingnu na unuk langai rai nga ai shi a shangun ma Hahtat hpe shaga la nhtawm hpa baw byin nga ai lam hte hpa majaw byin wa ai lam ni hpe san yu na matu Mordehkai hpang de sa tsun shangun wu ai. 6 Hahtat gaw hkawhkam htingnu de shang wa ai chyinghka na mare htingwan e nga ai Mordehkai hpang de sa du wu ai. 7 Mordehkai gaw shi hta hkrum hkra ai lam magup hpe mung, Yuda masha ni yawng hpe sat shagrawm kau lu ai rai yang, hkawhkam sut dek hta gumhpraw gade bang na ngu nna Haman ga sadi jaw da sai lam hpe mung shi hpe tsun dat wu ai. 8 Shi gaw Yuda masha ni hpe jahten sharun kau na lam hkang da sai dai Susa mare e htuk shapraw da sai ndau shabra laika kanan langai mi hpe Hahtat a lata hta bang dat ya wu ai. Eshta gaw hkawhkam wa kaw shang nna shi a amyu masha ni hpe matsan dum myit madun dan na matu hpyi nem ya na mung, byin nga masa sanglang ya na matu mung, ndai laika Eshta hpang de la wa ya na lam Mordehkai shi hpe tsun dat wu ai. 9 Hahtat gaw ndai amu hpe shi galaw wu ai rai nna, 10 Eshta mung ndai shiga Mordehkai hpang de la sa ya na matu shi hpe bai jaw dat wu ai: 11 ?Numsha lasha kadai rai ti mung hkawhkam wa n shaga ai sha kata wang de hkawhkam wa hpang de shang ai rai yang, dai wa si lu na rai nga ai. Dai gaw tara rai nga ai hpe hkawhkam wa a hpaji jaw ni kaw nna mungdaw ni de nga ai masha ni de du hkra, masha shagu dai lam hpe chye da nga ma ai. Ndai lam langai mi hku nna sha, ndai tara hpe koi yen lu na lam nga nga ai: dai gaw hkawhkam wa shi a ja sumdoi ladawn ai rai yang, marai langai ngai asak jahkrung da ai hkrum nga ai. Ngai rai ti mung, hkawhkam wa ngai hpe shaga ai gaw shata mi sha naw rai nga ai.?

12 Mordehkai gaw Eshta kaw na shiga lu la ai shaloi, 13 ndai shadum jahprang ga hte shi hpang de shana dat wu ai: ?Hkawhkam htingnu kata e nang nga nga ndai majaw kaga Yuda masha ni hta grau nna nang shim lu nga ai ngu nna hkum sawn la nga et. 14 Ndai zawn re ai aten hta nang atsin sha nga ai rai n yang gaw, sumsing lamu kaw nna karum la ai lam, Yuda masha ni a matu pru wa nna shanhte nlang hkye mawai la ai hkrum ti mung nang chyawm gaw si na rai ndai; na nwa a dinghku mung htum mat na mara ai. Ti mung ndai zawn re ai aten hta nang hkawhkam jan shatai la hkrum nga nit dai gaw kadai wa chye nga a hka!?

15 Eshta gaw Mordehkai hpang de ning ngu bai htang dat wu ai: 16 ?Sa nna Susa mare hta nga ai Yuda masha ni yawng hpe jahpawng tawn u; lusha gam let nye a matu akyu hpyi ya mi. Masum ya tup shani shana hpa mung hkum lu hkum sha nga myit. Nye a shangun ma numsha ni hte ngai mung dai hte maren galaw na ga ai. Dai hpang tara tawt lai ti mung hkawhkam wa hpang de ngai shang na nngai. Ndai amu galaw ai a majaw ngai si lu na rai yang mung si na nngai.?

17 Dai hpang Mordehkai gaw pru mat wa nhtawm Eshta shi hpe hkan galaw na matu matsun dat ai hte maren galaw wu ai.