6
1 Dai rai nna hkawseng Dari hkang dat ai hte maren, Babelon mare hta kyem mazing da ai hkawhkam labau gawn ka matsing hta tam sawk yu ma ai.
2 Rai ti mung dai laika katsu hpe Medi mungdaw Akbatana mare hta mahtang mu tam la nga ma ai. Dai hta ning nga ka matsing rawng nga ai:
3 ?Hkawseng Kuru hkaw dung hpang ai shaning hta, shagu hkungga hte wan nat hkungga ni hpe nat nawng ai shara hta Yerusalem Nawku Htingnu bai gaw gap na matu hkang dat wu ai. Dai Nawku Htingnu gaw tsaw de pe jahku shi, nda de pe jahku shi rai na rai nga ai.
4 Nlung lam masum shagu a ntsa e hpunngau langai ngai bang nhtawm shakum ni hpe gaw na rai nga ai. Hkrat ang ai yawng hpe hkawhkam sut dek kaw na jaw na rai nga ai.
5 Hkawhkam Nebuhkadneza gaw Yerusalem Nawku Htingnu kaw na Babelon mare de la wa ai aja gumhpraw hte Nawku Htingnu hkinghku ni hpe Yerusalem Nawku Htingnu kata tawn da ai shara de bai la wa mu ga.?
6 Dai hpang, Dari gaw ning ngu nna bai htang shana dat wu ai.
?De, Uhprat a Sinna maga na munggyi Tateni yan Shehta Bozenai hte Uhprat a Sinna maga de na, nan a du salang manang ni.
?Nawku Htingnu hte tsan tsan rai nga myit; dai gaw gap ai amu hta
7 hkum hkan shalau myit. Yuda munggyi hte Yuda ningbaw ni mahtang Karai Kasang a Nawku Htingnu hpe shawng de na htingra hta nan bai gaw gap mu ga.
8 Dai hpe bai gaw gap ai amu hta shanhte hpe karum na matu mung ngai nanhte hpe hkang dat made ai. Magam bungli galaw dingyang rai nga lu mu ga, shanhte jai lang ra ai gumhpraw kalang lata jaw lu hkra, Uhprat a Sinna maga de na hkanse ngu ai hkawhkam sut rai hpe lahkawn la lu na rai myit dai.
9 Sumsing Lamu a Karai Kasang a matu wan nat hkungga shatai na usu uram, sagu, sagu kasha ni hte hkaulan mam, jum, sabyi ntsin hte tsanlun sau re ai ra mara nanhte hpe tsun dan mu yang, dai lit ni hpe n hprai ai sha, Yerusalem mare de shani shagu sa sak jaw na rai myit dai.
10 Ndai hku galaw na lam rai nga ai, shaloi Sumsing Lamu a Karai Kasang hkap la lu ai shagu hkungga ni hpe shanhte nawng ya lu nna, nye a ntsa e mung, nye a kasha ni a ntsa e mung shi a shaman chyeju hkam la lu na matu mung akyu hpyi ya lu na rai ma ai.
11 Kadai mung ndai hkang da ai ga hpe n madat ai rai yang, shanhte a nta na hpunngau shaw la nna matu masen nhtawm shi a hkum kata hku dawk bang ya na, ngai kahtap hkang dat nngai. Shi a nta hta mung shanut sumpum shatai kau ya na rai nga ai.
12 Shi nawku daw jau hkam la na nga nna, Karai Kasang lata la sai Yerusalem mare hte seng ai ndai hkang da ai ga hpe ninghkap nna dai yang na Nawku Htingnu hpe jahten sharun kau mayu ai hkawhkam shing n rai masha amyu baw kadai hpe mung jahten kau u ga. Ngai Dari nan ndai ga hpe hkang dat ni ai. Dai hpe teng tup madat mara hkan sa na rai myit dai.?
13 Dai hpang munggyi Tateni yan Shehta Bozenai hte shan a du salang manang ni gaw hkawseng wa hkang dat ai hte maren, tup hkrak galaw ma ai.
14 Yuda ningbaw ni mung myihtoi Hagi hte Zehkaria yan n-gun jaw ya ma ai majaw dai Nawku Htingnu hpe kaja rawt jat galu kaba ai hku galaw da nga ma ai. Shanhte gaw dai Nawku Htingnu hpe Israela Karai Kasang hkang da ai ga hte mung, Persi Hkawseng Kuru, Dari hte Artazazi ni hkang dat ai hte mung galaw shangut da lu manu ai. Ref 6:14: Hag 1:1; Zeh 1:1.
15 Hkawseng Dari hkaw dung ai kru ning na Adara shata masum ya shani e, shanhte dai Nawku Htingnu hpe galaw shangut da manu ai.
16 Dai hpang Israela amyu masha ni, hkinjawng ni, Lewi masha ni hte bawng dung ai kaw nna nhtang wa ai kaga ni yawng hte gaw kabu gara ai myit hte dai Nawku Htingnu hpe ap nawng ma ai.
17 Dai ap nawng hpawng a matu, shanhte gaw usu latsa, sagu lahkawng tsa, hte sagu kasha mali tsa hpe shagu hkungga shatai let, Israela amyu bawsang shagu a matu, mara raw hkungga shatai na bainam shi lahkawng hpe mung nawng jau ya ma ai.
18 Mawshe a laika hta rawng ai sharin shaga ga ni hte maren, Yerusalem e nga ai Nawku Htingnu hta daw jau amu gun hpai na matu, shanhte mung hkinjawng ni hte Lewi masha ni hpe hpaw ninghtan tawn da ma ai.
19 Bawng dung ai kaw na nhtang wa sai amyu masha ni gaw hpang shaning na shata langai a shi mali ya shani e, Shalai wa Ai Poi galaw ma ai. Ref 6:19: Pru 12:1-20.
20 Hkinjawng ni hte Lewi masha ni mung shanhte hkum ni hpe jasan jaseng kau manu ai majaw htung hte maren san seng nga ma ai. Lewi masha ni gaw bawng dung ai kaw nna nhtang wa sai amyu masha yawng a matu mung, hkinjawng ni hte shanhte a matu mung, Shalai Wa Ai Poi shagu hkungga yam nga ni sat ma ai.
21 Bawng dung ai kaw na bai nhtang wa sai Israela masha ni yawng mung, dai mung hta nga nga sai kaga masha ni a tara maigan htung lai len kau da sai ni yawng hte dai Madu Israela a Karai Kasang hpe nawku na matu du sa nga masai ni gaw dai shagu hkungga shan ni sha ma ai.
22 Shanhte gaw Matsi N Rawng ai Muk Sha Poi hpe mung kabu gara ai myit hte sanit ya tup galaw ma ai. Dai rai nna shanhte kabu gara ai myit hte hpring nga ma ai; hpa majaw nga yang, dai Madu gaw Asuri hkawseng wa hpe shanhte hpang de myi man kayin shangun nga ai rai nna Israela Karai Kasang a Nawku Htingnu bai gaw gap ai amu hta shanhte hpe karum ya nga ai.