3
1 Israela amyu masha ni gaw shata sanit hta shanhte a kahtawng ni hkan yawng nga nga ma ai. Dai hpang shanhte yawng Yerusalem hta zup hpawng nga ma ai.
2 Yehozadak a kasha Yawshu, shi a hkinjawng manang ni, Shelatila a kasha Zerubabela hte rau shi a kahpu kanau jinghku ni gaw Israela a Karai Kasang a tawn hkungri bai galaw ma ai rai nna, Karai Kasang a masha Mawshe a Tara Laika hta ka matsun da ai hte maren, tawn hkungri ntsa e shagu hkungga ni nat ma ai. Ref 3:2: Pru 27:1.
3 Bai nhtang wa sai bawng dung masha ni gaw dai mung e nga nga la ai amyu masha ni hpe hkrit nga ma ti mung, shanhte gaw mi na shara hta nan tawn hkungri bai galaw nna, jahpawt shana de a ntsa e shagu hkungga ni bai nat ma ai. Ref 3:3: Bhk 28:1-8.
4 Hkan sa na tara ni hte maren, Sum Poi hpe mung shanhte galaw ma ai rai nna dai shani na matu nawng ya ang ai shagu hkungga ni hpe hpyi ai hte maren lani hte lani nawng ya ma ai; Ref 3:4: Bhk 29:12-38.
5 dai hta kaga, tut nawng nawng ya ai shagu hkungga ni hpe hkum ting nat na matu mung, Shata Praw e galaw ai Poi hta nawng ya na matu mung, dai Madu hpe nawku ai shara hta tut e sa zup hpawng nna dai Madu hpe tinang myit ra ai hku jaw ya ai hkungga ni yawng hpe nat nawng ya ma ai. Ref 3:5: Bhk 28:11-29:39.
6 Amyu masha ni dai Nawku Htingnu hpe garai n galaw hpang lu ma ti mung, shata sanit a shawng shani e, dai Madu hpe shagu hkungga nat nawng hpang wa ma ai.
7 Amyu masha ni gaw wut gaw ai ni hte lasama ni hpe gumhpraw jaw ma ai; Lebanon bum na arit hpun ni shaw ya nna panglai hkin-gau e nga ai Yopa mare de la yu wa ya ai Turu hte Sidon mare masha ni hpang de malu masha, lu hka ntsin hte tsanlun sau ni hpe shagun jaw ma ai. Ndai amu mahkra hpe Persi Hkawseng Turu a ahkang hte maren hkan galaw ma ai.
8 Dai rai nna, Yerusalem mare na Nawku Htingnu shara de shanhte bai nhtang wa ai lahkawng ning a shata lahkawng hta shanhte amu galaw hpang wa nga masai. Zerubabela, Yawshu hte naw ngam nga ai shanhte a hpu nau ni, hkinjawng ni hte Lewi masha ni, dik dik Yerusalem mare de nhtang wa ai bawng dung masha ni yawng du hkra shang galaw karum ma ai. Asak hkun ning hte dai hta kaba sai Lewi masha ni yawng gaw dai Nawku Htingnu bai gaw gap ai amu hpe woi hpareng na matu san tawn da hkrum ma ai.
9 Lewi masha Yeshua hte shi a shadang sha ni, kahpu kanau jinghku ni, Kadmiela hte shi a shadang sha ni, (Hodawia amyu lakung ni ) hte rau Nawku Htingnu bai gaw gap ai amu hta shang lawm let woi hpareng nga ma ai. (Shanhte hpe Henadad amyu lakung na Lewi masha ni karum la nga ma ai.)
10 Htingnu gaw gap masha ni Nawku Htingnu npawt nhpang jahkrat hpang wa ma ai shaloi, hkinjawng ni gaw shanhte a palawng galu hpun nna lata hta pahtau lang let shara la shajang ma ai; Asap amyu lakung na Lewi masha ni mung shup sheng lang let dai yang e tsap nga ma ai. Shanhte gaw Hkawhkam Dawi a prat kaw nna hkang da ai matsun madun ga ni hte maren, dai Madu hpe shakawn kungdawn ma ai. Ref 3:10: 1Hl 25:1.
11 Shanhte gaw dai Madu hpe ning ngu nna kahtap tsun let shakawn kungdawn ma ai:
?Dai Madu gaw mai kaja nga ai, shi a tsaw ra myit gaw Israela a ntsa e htani htana agrin nga ai.?
Shing rai Nawku Htingnu a npawt nhpang gaw ai amu hpe galaw hpang da lu manu ai majaw masha shagu hte mung tinang nang a n-gun lagaw mahkra hte dai Madu hpe shakawn kungdawn let jahtau garu nga ma ai. Ref 3:11: 1Hl 16:34; 2Hl 5:13; 7:3; Shk 100:5; 106:1; 107:1; 118:1; 136:1; Yer 33:11.
12 Shawng galaw ai Nawku Htingnu hpe mu yu sai asak kaba ai hkinjawng ni, Lewi masha ni hte amyu lakung ni a ningbaw law law ni mahtang ndai Nawku Htingnu npawt nhpang jahkrat tawn ai hpe azi yu let ja ja jahtau hkrap nna hkrap agru nga ma ai. Rai ti mung, kaga ni chyawm gaw kabu gara jahtau garu nga ma ai.
13 Shanhte ja ja jahtau garu ai nsen a majaw kadai mung kabu gara jahtau garu ai nsen hte hkrap agru ai nsen hpe n chye ginhka lu nga ai. Dai ngoi ai nsen hpe tsan tsan kaw nna na lu nga ai.