EZRA LAIKA
(EZRA)
Ga Nhpaw
Ndai Ezra Laika gaw Hkawhkam Labau Laika Ni a hpang pru wa ai laika rai nna, bawng dung hkrum ai Yuda masha nkau mi Babelon mung kaw nna nhtang wa ai lam hte asak bai lawt wa nna Yerusalem hta nawku ai lam ni hpe ka da nga ai. Dai mabyin lam ni hpe ndai ninggam hku karan da nga ai: 1) Persi hkawseng Kuru hkang dat ai hte maren, Yuda bawng masha shawng na hpung ni Babelon mung kaw nna nhtang wa ai lam. 2) Nawku Htingnu bai gaw gap ai hte ap nawng nhtawm Karai Kasang hpe nawku ai lam Yerusalem hta bai hkam la lu ai lam. 3) Shaning ram ram na ai hpang, Karai Kasang a Tara hta chye chyang kung kyang ai hte Israela amyu masha ni a wenyi hkringhtawng hpe makawp maga ya na matu amyu masha ni a nawku htung lai len hte nga pra hpawng asak hkrun lam hpe bai ninghtan shinggyin ya na matu amyu masha ni hpe karum ya ai Ezra gaw kaga Yuda masha hpung mi hpe Yerusalem de woi nhtang wa ai lam ni rai nga ai.
1
Persi hkawseng Kuru hkaw dung ai shawng shaning hta e, myihtoi Yeremia hku tsun nu ai dai Madu a mungga gaw dik wa nga sai. Shi gaw ndai hkang da ai ga hpe ning ngu ka shapraw nhtawm shi up ai mungdan shara shagu hkan hproi hkra ja ja hti ndau na matu Kuru hpe kalang lata galaw shangun wu ai: Ref 1:1: Yer 25:11; 29:10.
?Ndai gaw Persi Hkawseng Kuru a hkang da ai ga rai nga ai. Dai Madu sumsing lamu a Karai Kasang gaw mungkan ga ting ngai hpe up hkang shangun ni ai hte Yuda mung Yerusalem hta shi a matu Nawku Htingnu langai gap na lit ngai hpe jaw da ni ai. Ref 1:2: Esa 44:28. Karai Kasang gaw amyu masha ni rai nga ai nanhte yawng hte rau nga nga u ga. Nanhte gaw Yerusalem de wa nhtawm Karai Kasang hpe nawku na matu, dai Madu Israela a Karai kasang a Nawku Htingnu hpe bai gaw gap na rai myit dai. Shi a amyu masha bawng dung hkrum nga ai ni kadai rai tim nhtang wa na matu karum la ra ai rai yang, shanhte a htingbu ni ndai karum la lam shanhte hpe jaw ya mu ga. Shanhte gaw dai masha ni hpe aja hte gumhpraw, arung arai ni, yam nga hpung ni hte shagu hkungga ni hpe Yerusalem na Karai Kasang a Nawku Htingnu hta sa sak jaw na rai ma ai.?
Dai hpang, tinang myit masin hta Karai Kasang e shamu shamawt ya hkrum sai Yuda hte Benyamin amyu bawsang hta na lakung ni a ningbaw ni, hkinjawng ni hte Lewi masha ni gaw Yerusalem mare na dai Madu a Nawku Htingnu bai sa gap na matu jin jin rai ma ai. Shanhte hte ni nawn ai htingbu ni yawng mung Nawku Htingnu a matu, aja gumhpraw hte lang na hkinghku ni, arung arai ni, yam nga u hpung ni, kaga manu dan ai arai ni hte hkungga arai law law shanhte hpe jaw ya let karum ya ma ai.
Hkawseng Kuru gaw Hkawhkam Nebuhkadneza Yerusalem Nawku Htingnu na la mat wa nhtawm shi a karai ni a nawku nta hta wa tawn da sai ban hte gawm ni shanhte hpe nhtang ap ya wu ai. Shi gaw dai arai ni hpe hkawhkam sut sin hpareng Mitredat a lata de ap ya wu ai rai nna dai ni hpe jahpan galaw nhtawm Yuda mung gyi Shebaza hpe ndai jahpan hte maren ap ya wu ai; 9-10 dai ni gaw lawu de na hte maren rai nga ai:
 
 
11 Shebaza hte kaga bawng masha ni Babelon mare kaw nna Yerusalem de wa yang shi hte rau la shalawm wa ai arai ni yawng gaw aja hte gumhpraw ban 5,400 hte kaga arung arai ni rai nga ai.