6
Dai Madu gaw ngai hpe ga shaga wu ai. Shi gaw, ?Si chye ai masha wa e, Israela a bum ni de myi man yawng nna shanhte hpe nye a mungga jaw u. Tsaw Htum ai dai Madu mungga hpe na la na matu Israela a bum ni hpe htawn tsun u; bum ni, kawng ni, hkaraw ni hte kadit ni e, Tsaw Htum ai dai Madu ngai hpa tsun nga ai hpe na la mu. Ngai gaw amyu masha ni hpara sumla nawku ai shara ni hpe jahten kau na matu, nhtu hpe shangun dat na nngai. Tawn hkungri ni ashep ashin rai mat nna manam pyaw ai baw nat nawng ya ai tawn hkungri ni agrawp daw mat na mara ai. Shanhte a hpara sumla ni a man e nga ai masha ni yawng sat kau hkrum na mara ai. Ngai gaw Israela amyu masha ni a moi mang ni hpe ayai kau nna shanhte a nrut nra ni hpe tawn hkungri grup yin mahkra hkan gat ayai da na nngai. Israela a mare ni yawng jahten sharun kau hkrum na mara ai, shanhte a tawn hkungri ni hte shanhte a hpara sumla ni gaw adaw atang rai hten agrawp mat nna shanhte a manam pyaw ai baw hkungga nat nawng ai tawn hkungri ni daw hten mat nhtawm, shanhte galaw ai amu shagu mung hpoi mat na mara ai. Amyu masha ni gaw shara shagu hkan sat kau hkrum na mara ai, ngai nan dai Madu rai nga nngai hpe naw ngam nga ai ni yin la na mara ai.
?Ngai gaw nkau mi hpe sat sharu kau ai kaw na shalawt nna, masha amyu baw ni a lapran e shabra kau ai hte, dai ni gaw bawng dung hkrum ai mung hta nga nga na mara ai. Shanhte a n kam ai myit masin ni hte ngai hpe kau da ai hte ngai hta hpara sumla ni hpe grau nna ra sharawng nga ma ai majaw, ngai shanhte hpe ari jaw ai hte jahpoi kau ni ai hpe shanhte dum chye wa na mara ai. Shanhte gaw shanhte galaw ai n hkru ai amu ni hte matsat shabat re ai grit nem ai amu galaw ai a majaw, shanhte hkum hpe nan matsat kau na mara ai. 10 Shanhte gaw ngai nan dai Madu rai nga nngai hte nye a shadum jahprang ai ga ni kaman jahkrit sharim kau ai n rai nga ai hpe chye na lu na mara ai,? ngu nna shi nan tsun wu ai.
11 Tsaw Htum ai dai Madu gaw, ?Israela amyu masha ni galaw ai n hkru n shawp ai hte matsat shabat amu yawng a majaw, na a lata hpe manat jum da u! Na a lagaw hkindit u! Yawn hkyen ai hte marawn jahtau u. Shanhte gaw hpyen majan hta mung, kawsi kyet ai hte ana zinli ni hta si mat na mara ai. 12 Tsan tsan e nga ai ni mung machyi makaw hkrum nna si mat na mara ai; ani sha nga ai ni mung hpyen majan hta sat kau hkrum nna naw ngam nga ai ni gaw kawsi kyet ai hte si mat na mara ai. Shanhte yawng hte gaw nye a sindawng kahtet ai n-gun namchyim hkam sha na mara ai. 13 Tawn hkungri ni a grup yin hte hpara sumla ni a lapran e mung, tsaw ai kawng shagu a ntsa e mung, bum pungding shagu a ntsa e mung, tsit lali ai hpun shagu a npu e mung, kaba hkung ai wamyi hpun shagu a npu hta e mung, shanhte a hpara sumla ni hpe shagu hkungga nat nawng ya ai shara shagu hkan e mung, shanhte a moi mang ni ayai taw nga na mara ai. Dai hpang masha shagu hte gaw Ngai nan dai Madu rai nga nngai hpe chye wa na mara ai. 14 Rai sa, ngai gaw shanhte kaw du dep nang nna shanhte a mungdan hpe jahten kau na nngai. Ngai gaw dai mungdan hta Israela amyu masha ni gara shara hta mung n nga lu hkra, dingda maga de nga ai zaibru jang kaw nna dingdung maga Ribla mare du hkra shingran katsi ai shara shatai kau na nngai. Shaloi masha shagu hte gaw Ngai nan dai Madu rai nga nngai hpe chye na mara ai,? ngu nna tsun wu ai.