4
Karai Kasang gaw, ?Si chye ai masha wa e, wut tawng langai la nna dai hpe na a man e tawn u, de a ntsa e Yerusalem mare hkrang shapraw ai sumla hpe mahkret soi u. Dai hpang, dai mare hpe wang da ai kumla shapraw na matu, kaduk ni hpe tawn u, ga kaduk ni galaw u, dap ni jung u, dai mare a grup grup yawng hta bunghku sharun ai gawng ni hpe tawn u. Hpri pa langai la nna nang hte mare a lapran e bunghku zawn tai na matu dai hpe sharawt tawn u, dai mare maga de na a myi man yawng u, shaloi dai mare gaw wang da ai hkrum nna nang gaw dai mare hpe wang da ai wa rai na ra ai. Dai gaw Israela a matu kumla tai na ra ai.
4-5 ?Dai hpang, na a pai maga nhkrem de hkrawn taw nga u, ngai gaw Israela amyu masha ni a shut hpyit ai amu na a ntsa e mara da ya na nngai. Shanhte galaw kau ai shut hpyit amu a majaw dai shara hta nhtoi masum tsa jahku shi ya tup hkrawn taw nga nna nni nkri hkrum sha na rin dai. Shanhte hpe jaw tawn ai ari htum mat ai aten du hkra, ngai nang hpe lani mi a matu laning mi hku ari jaw da ni ai. Nang gaw dai maga mi de hkrawn ai nhtoi ngut jang, na a hkra maga de kayin hkrawn taw nna, nhtoi mali shi ya tup, Yuda amyu a shut hpyit ai amu a matu nni nkri hkam sha na rai ndai, shanhte a ari gun hpai ai aten ladaw gaw lani mi a matu laning mi rai na ra ai.
?Yerusalem hpe wang tawn da ai hpe azi yu u, dai mare de na a lata lahpum shada nna, dai mare hten wa na lam, myihtoi htoi u. Ngai nang hpe sumri hte gyit hkang da na nngai, nang gaw dai mare hpe wang da ai nhtoi htum mat ai aten du hkra na a hkum hpe manga mi kaw nna maga mi de kayin lu na n rai.
Ya chyawm gaw, hkaulan mam, muk-yaw mam, shapre, nawkyu, hkauya hte shagyi nkau mi la u. Dai ni yawng hpe kayau nna muk tawng galaw u. Dai gaw na a pai maga de nhkrem hku nang hkrawn taw nga ai nhtoi masum tsa jahku shi ya laman nang sha na matu rai nga ai. 10 Lani mi hta aung za matsat rawng ai muk nang sha na ahkang lu na rai ndai, dai gaw hpang shani du hkra na matu rai nga ai. 11 Nang gaw ntsin hpe mung shadaw shadang hte lani mi hta gawm lahkawng hkawng lu na rai ndai. 12 Nang gaw wan dap langai galaw nhtawm masha a hkyi katsing hpe wan n-ga ntsa e muk kabaw ai zawn kabaw nna masha shagu nang hpe mu mada ai shara hta dai hpe sha dan u,? ngu nna tsun wu ai.
13 Dai Madu gaw, ?Ndai kumla gaw Israela amyu masha ni hpe maigan mung ni de ngai shaden kau dat ai shaloi, tara hte hkum da ai lusha sha na lam rai nga ai,? ngu nna tsun wu ai.
14 Rai ti mung, ngai gaw, ?N rai law, Tsaw Htum ai Madu e, ngai gaw nye hkum nan galoi mung awu asin garai n hkrum yu nngai. Ngai gaw ma prat kaw nna dai ni du hkra shi hkrai si taw nga ai dusat shan hpa hpe rai ti mung, matse labye dusat e kawa sat da ai shan hpe mung, galoi mung n sha yu nngai. Ngai gaw matsat shabat zawn nawn ai lusha hpa hpe rai tim galoi mung n sha yu nngai,? ngu nna bai htan nngai.
15 Dai rai nna, Karai Kasang gaw, ?Grai kaja sai. ngai gaw nang hpe masha hkyi a malai dumsu hkyi lang shangun na nngai, nang gaw na a muk hpe dai ntsa hta kabaw lu na ndai,? ngu nna tsun wu ai.
16 Shi gaw, ?Si chye ai masha wa e, Yerusalem a matu jaw ai muk hpe dawm kau ya na nngai. Dai mare hta nga ai amyu masha ni gaw shanhte sha ai lusha hte shanhte lu ai ntsin ni hpe shen nna shadang hte lu ma ai majaw myit ru myit kahpra na mara ai. 17 Shanhte hta muk hte ntsin taw mat nna, myit htum mat na mara ai; shanhte gaw shanhte a yubak mara ni a majaw n-gun kya mat wa na mara ai,? ngu nna tsun wu ai.