39
Tsaw Htum ai dai Madu gaw, ?Si chye ai masha wa e, Meshek hte Tubala masha amyu baw ni hpe up hkang ai du kaba Goga hpe htawn tsun u, ngai gaw shi a hpyen rai nga nngai ngu shi hpe tsun u. Ngai shi hpe lam nnan de kayin dat nhtawm, Israela bum ni de shi du sa wa ai aten du hkra, tsan ai dingdung maga kaw nna pru wa ai hte woi awn na ra ai. Dai hpang, ngai gaw shi a pai lata na ndan hpe mung, shi a hkra lata na pala ni hpe mung kayat jahkrat kau ya na nngai. Goga hte shi a luksuk ni mung, shi a jinghku hpyen hpung ni mung, Israela bum ni a ntsa e kadawng si na mara ai; shanhte a moi mang ni hpe mung, ntsa malen u ni hte matse labye dusat dumyeng ni yawng a shahpa shatai kau na we ai. Shanhte gaw pa ga e kadawng si na mara ai. Tsaw Htum ai dai Madu ngai nan tsun ni ai. Ngai gaw Magoga mung hta mung, panglai hkin-gau mayan hku apyaw alaw hte shanu nga ai ni hta mung wan shachyi dat na nngai, shaloi ngai nan dai Madu rai nga nngai hpe masha shagu chye lu na mara ai. Ngai gaw nye a chyoi pra ai mying ningsang hpe nye a amyu masha ni hpe kaja wa teng teng chye shangun nna nye a mying ningsang hpe htawm hpang de galoi mung myi man sum shangun na n rai. Dai hpang, dai Madu ngai nan Israela a chyoi pra ai Karai Kasang rai nga ai hpe masha amyu baw ni chye lu na mara ai,? ngu nna tsun wu ai.
Tsaw Htum ai dai Madu gaw, ?Ngai tsun sai dai nhtoi gaw teng teng du wa na ra ai. Israela mare ni hta shanu nga ai ni gaw pru sa nna kabai da sai hpyen laknak arung arai ni hpe ju hpun a matu hkan lahkawn la na mara ai. Shanhte gaw ninggang ni, ndan ni, pala ni, nri ni hte hpun laknak ni hpe sanit ning a matu alaw ahtam hta da nna wan ju na mara ai. 10 Shanhte gaw wan ju na matu hpyen laknak arung arai ni lu nga ma ai majaw, layang hkan e hpun n hta, maling hkan e mung hpun n kran ra na mara ai. Shanhte hpe hpya lu hpya sha, kashun kashe lanep hta ai ni hpe shanhte hpya lu hpya sha nna kashun kashe lanep hta la na mara ai,? ngu nna tsun ai. Tsaw Htum ai dai Madu tsun nu ai.
11 Dai Madu gaw, ?Ndai lam yawng byin wa ai shaloi, Israela mung na Jum Nawng a sinpraw maga de nga ai Bu Hkawm Ai Ni a Kadit hta Goga hpe lup makoi na shara ngai jaw na nngai. Goga hte shi a hpyen luksuk ni yawng gaw dai shara lup makoi ai hkrum nna dai kadit hpe mung, ?Goga Hpyen Luksuk a Kadit,? ngu nna shamying da na mara ai. 12 Israela ni gaw moi mang yawng lup makoi na matu mung, mungdan bai jasan jaseng na matu mung, shata sanit tup aten la na mara ai. 13 Mung masha shagu gaw shanhte hpe lup makoi na mara ai; ngai awng padang lu ai shani e, ndai lam a majaw shanhte shagrau sha-a hkrum na mara ai. Tsaw Htum ai dai Madu ngai nan tsun ni ai. 14 Shata sanit lai mat wa ai hpang, ga ntsa e naw taw nga ai si mang ni hpe hkan tam nna lup makoi na matu mungdan ting hproi hkawm na masha ni hpe lata san da let, dai ni gaw mungdan hpe jasan jaseng lu na mara ai. 15 Shanhte gaw mungdan kata hta lung wa, yu wa ningwan hkawm ma ai shaloi, masha nrut nra hpe mu tam ai aten shagu dai makau hta masat hpundung jung da ai hte lup htu ai ni mung dai shara de sa nna Goga a Hpyen Luksuk Kadit hta dai hpe lup makoi ma ai. 16 (Dai yang e, luksuk ni boi mat ai hpang de ai mare langai mi hpe mying shamying da na mara ai.) Shing rai dai mungdan hpe bai jasan jaseng da na mara ai.?
17 Tsaw Htum ai dai Madu gaw ngai hpe, ?Si chye ai masha wa e, ntsa malen u ni hte matse labye dusat dumyeng mahkra hpe shanhte a matu lajang da ya nga ai shagu hkungga sa sha na matu shara shagu de na sa zup na saw shaga dat u. Dai gaw Israela bum ni a ntsa na kaba htum ai lusha poi rai na ra ai; shanhte gaw shan sha lu nna asai mung lu lu na mara ai. Ref 39:17-20: Shr 19: 17-18. 18 Shanhte gaw share ninghkrin ni a ashan sha nna, mungkan ga up hkang ai mung du ni a asai ni hpe lu na mara ai; yawng hte mung sagu la, sagu kasha, bainam hte hpum sau ai usu ni zawn sat kau hkrum na mara ai. 19 Ndai amyu masha ni hpe hkungga shan ni zawn ngai sat tawn ai shaloi, ntsa malen u ni hte dusat dumyeng ni gaw hkru kat hkra sau man ni sha nna lau mat hkra asai lu na mara ai. 20 Shanhte gaw nye a sha ku hta gumra ni, leng jawn ai ni, hpyenla ni, hte gasat masha ni hpe hkru kat hkra sha lu na mara ai. Tsaw Htum ai dai Madu ngai nan tsun ni ai.
21 Dai Madu gaw, ?Nye a teng man ai daw dan lam ni hpe galaw shapraw na matu, nye a daru magam n-gun hpe kaning rai lang ai, nye a hpung shingkang masha amyu baw ni hpe ngai madun dan ai hpe shanhte mu lu na mara ai. 22 Ngai gaw shanhte a Madu Karai Kasang rai nga nngai hpe dai shani kaw na Israela masha ni chye lu na mara ai. 23 Israela amyu masha ni ngai hpe shut hpyit ai yubak mara ni a majaw, shanhte bawng dung hkrum wa ai hpe, masha amyu baw ni chye lu na mara ai. Ngai gaw shanhte hpe myi man kayin kau da ai hte gumlau hpyen ni hpe dang shangun nhtawm shanhte hpe majan hta sat kau hkrum shangun na nngai. 24 Shanhte a n san n seng ai hte n hkru n shawp ai amu a matu shanhte hkam la ging ai hte maren, ngai jaw ni ai, ngai gaw shanhte kaw na myi man kayin kau nngai,? ngu nna tsun ai.
25 Tsaw Htum ai dai Madu gaw, ?Rai ti mung, Yaku a aru arat ni rai nga ai Israela amyu masha ni hpe ya ngai matsan dum la nna, shanhte hpe kalang mi bai ngamu ngamai shangun na nngai. Nye a chyoi pra ai mying ningsang hpe mung ngai maga na nngai. 26 Shanhte hpe jahkrit shama ai ni kadai mung n nga ai sha, shanhte a mungdan hta shim lum ai hte lang mi bai shanu nga lu ai shaloi, ngai hpe gumle gumlau di ai a majaw shanhte kade wa myi man sum hkrum nga ai hpe shanhte malap kau lu na mara ai. 27 Ngai nan chyoi pra nga ai hpe masha amyu baw law law ni hpang de madun dan lu na matu, nye a amyu masha ni hpe shanhte a gumlau ai hpyen ni shanu ai mungdan ni kaw na bai woi wa na nngai. 28 Dai hpang, ngai nan dai Madu shanhte a Karai Kasang rai nga nngai hpe nye a amyu masha ni chye lu na mara ai. Ngai gaw shanhte hpe bawng dung shangun ai hte shinggyin la nna, shanhte hta na langai mi hpe mung n kau da ai sha, shanhte a mungdan de bai woi wa na lam hpe shanhte chye lu na mara ai. 29 Nye a wenyi hpe Israela amyu masha ni a ntsa e ru bun nna ngai gaw shanhte kaw na galoi mung myi man bai kayin kau da na nngai n rai. Tsaw Htum ai dai Madu ngai nan tsun ni ai,? ngu nna tsun wu ai.