34
1 Dai Madu gaw ngai hpe ga shaga wu ai.
2 Shi gaw, ?Si chye ai masha wa e, Israela a du ni hpe jahpoi u. Tsaw Htum ai dai Madu ngai nan shanhte hte seng nna tsun ai myihtoi ga ni hpe htoi u: Israela a sagu rem ni e, nanhte gaw dingnye hkrum nga myit dai! Nanhte gaw tinang hkum hpe sha bau nna, sagu ni hpe galoi mung bau rem nga myit dai n rai.
3 Nanhte gaw sagu chyu lu nna, sagu mun hte da ai hpun palawng ni hpun nhtawm hpum sau htum ai sagu ni sat sha nga myit dai. Rai ti mung, nanhte gaw sagu ni hpe galoi mung bau rem nga myit dai n rai.
4 Gawng kya ai sagu ni hpe pyi nanhte lanu lahku nga myit dai n rai; machyi hkrum ai wa hpe mung tsi shamai ya nga ai n rai, ningma kap ai sagu hpe ahkyen kayawp ai n rai, dam mat wa ai sagu hpe mung bai woi la ai n rai, mat mat sai sagu hpe mung tam la nga myit dai n rai. Shing rai hkan galaw na malai, nanhte gaw shanhte hpe myit ja ai hte adip arip di reng nga myit dai.
5 Sagu rem n nga ai majaw, shanhte bra ayai mat nga yang, nam na matse labye ni e kawa sat ai hte sha kau ma ai. Ref 34:5: Bhk 27:17; 1Hk 22:17; Mat 9:36; Mrk 6:34.
6 Dai rai nna, nye a sagu ni gaw tsaw ai kawng ni hte bum ntsa hkan e dam hkawm nga ma ai. Dai ni gaw ga ntsa ting hta bra hkawm nga nna shanhte hpe hkan yu, tam sawk shakut ai wa langai mi mung n nga nga ai.
7 ?Ya chyawm gaw, sagu rem ai ni e, dai Madu ngai nan nanhte hpe tsun nga ai ga madat mu.
8 Ngai gaw teng teng ahkrung nga ai Karai Kasang rai nga nngai, dai majaw nanhte gaw ngai tsun ai ga hpe madat la nga myit dai. Ndai shara hta sagu rem ai wa n nga ai majaw, nye a sagu ni gaw nam na matse labye dusat ni e gasat hkrum nna sat kau ai hte sha kau hkrum nga ma ai. Nye a sagu rem ni gaw sagu ni hpe n hkan tam shakut ma ai. Shanhte gaw tinang hkum hpe sha lanu lahku nna sagu ni hpe bau maka nga ai n rai.
9 Dai re ai majaw, sagu rem ai ni e, nye a ga madat mara nga mu.
10 Ngai gaw nanhte a hpyen rai nga nngai, ngu nna Tsaw Htum ai dai Madu ngai nan tsun ndau nga nngai. Nye a sagu ni hpe nanhte a lata kaw na ngai la kau nhtawm, nanhte hpe mung shanhte hpe rem ai sagu rem ni zawn galoi mung bai shatai na made ai n rai; nanhte hkum ni hpe lanu lahku na matu pyi, ngai nanhte hpe galoi mung ahkang bai jaw na n rai. Nye a sagu ni hpe nanhte n sha lu myit ga, nanhte a lata kaw nna mawai la na nngai.
11 ?Ngai nan nye a sagu ni hpe hkan yu nna shanhte hpe lanu lahku na nngai ngu nna Tsaw Htum ai dai Madu ngai nan nanhte hpe tsun nga nngai.
12 Sagu rem wa gaw bra hkawm nga ai shi a sagu ni hpe bai shinggyin da nna lanu lahku ai hte maren, lamu sin mak mat nna tsin-yam hkrum ai shani e, shanhte bra hkawm mat wa ai shara shagu hkan na shanhte hpe bai woi wa na nngai.
13 Ngai gaw maigan mungdan hkan nga nga ai ni hpe shinggyin la nna shanhte a mungdan de bai woi wa na nngai. Israela bum ga de mung, hka shi shara hkan e mung, shanhte hpe woi nhtang wa nna ngwi pyaw ai udat shara ni hta shanhte hpe rem na nngai.
14 Ngai gaw shanhte hpe Israela mungdan na tsit lali ai udat shara ni yawng hta mung, bum ni hte pa layang kadit hkan tu ai tsingdu pa layang ni hta mung, shim lum ai hte sha shangun na nngai.
15 Ngai nan nye sagu ni a sagu rem wa tai nna shanhte a matu ban sa shara hpe mung ngai tam ya na nngai. Tsaw Htum ai dai Madu ngai nan tsun ni ai.
16 ?Ngai gaw mat mat sai ni hpe hkan tam na nngai, dam hkawm mat ai ni hpe mung woi nhtang wa na nngai; ningma machyi ai sagu ni hpe mung ahkyen kayawp ya na nngai, machyi ai ni hpe mung shamai ya na nngai; rai ti mung hpum sau ai ni hte n-gun ja ai ni hpe chyawm gaw ngai jahten kau na nngai, hpa majaw nga yang, ngai gaw teng man ai hte maren galaw ai sagu rem wa rai nga nngai.
17 ?Dai rai nna, nye a sagu hpung e, ngai gaw nanhte langai hte langai hpe tara jeyang nna kaja ai hte n kaja ai hpe karan ginhka la nna sagu ni hpe bainam ni kaw na karan la na ngu nna Tsaw Htum ai dai Madu ngai nan nanhte hpe tsun nngai.
18 Nanhte hta na nkau mi gaw kaja htum ai tsingdu tsingman ni hpe sha lu ti mung myit n dik ai hta sha n-ga, nanhte n sha lu ai tsing ni hpe pyi, kabye anut kau nga myit hka! Nanhte gaw san ai hka lu lu nga ti mung, nanhte n lu ai hka hpe kabye hka nu kau nga myit hka!
19 Nye a kaga sagu ni gaw nanhte kabye anut kau sai tsing ni hpe sha nna nanhte kabye hka nu kau sai hka lu ra nga ma ai.
20 ?Dai rai nna, ya chyawm gaw, n-gun ja ai sagu ni hte gawng kya ai sagu ni hpe ngai tara jeyang na nngai ngu nna Tsaw Htum ai dai Madu ngai nan tsun nngai.
21 Nanhte gaw machyi makaw hkrum ai ni hpe htu kanawng kau nna sagu hpung kaw nna shanhte hpe daru shapraw kau nga myit dai.
22 Rai ti mung, ngai gaw nye a sagu ni hpe mawai la nna shanhte hpe galoi mung ru yak jahkrum shangun na n rai. Ngai gaw kaja ai hte n kaja ai nye a sagu shagu ni hpe ginhka nna jeyang na nngai.
23 Shanhte hpe rem ai sagu rem wa langai tai wa na matu, nye a shangun ma Dawi hte bung ai hkawhkam langai ngai shanhte hpe jaw na nngai, shing rai shi gaw shanhte hpe rem ai sagu rem wa tai nna lanu lahku na ra ai. Ref 34:23: Shr 7:17.
24 Dai Madu ngai gaw shanhte a Karai Kasang tai nna nye a shangun ma Dawi hte bung ai hkawhkam wa gaw shanhte hpe up hkang ai du tai na ra ai. Ngai nan dai ga hpe tsun ni ai. Ref 34:24: Eze 37:24.
25 Ngai gaw shanhte a shim lum lam jaw ya lu ai ga shaka shanhte hte shagrin da na nngai. Mungdan kata na hkrit tsang ra ai matse labye ni hpe mung yeng seng kau na nngai, shaloi nye a sagu ni pa layang ni hta shim ai hte shanu nga lu nna maling kata hkan e mung yup nga lu na mara ai.
26 ?Ngai gaw shanhte hpe shaman ya nna shanhte hpe nye a chyoi pra ai kawng grup yin hkan e shanu nga shangun na nngai. Shanhte ra kadawn ai aten hta marang jahtu dat nna ngai shanhte hpe shaman ya na nngai.
27 Hpun ni asi si wa nna yi sun hkauna ni nsi naisi ni shapraw ya na mara ai; kadai mung tinang a lamu ga hta shim lum ai hte shanu nga lu na mara ai. Nye a amyu masha ni a hpri saidawng ni hpe agrawp daw kau ya nna shanhte hpe mayam shatai nga ai ni a lata kaw na shalawt dat ai shaloi, ngai nan dai Madu rai nga nngai hpe shanhte chye lu na mara ai.
28 Maigan tara hkan ai masha amyu baw ni mung shanhte hpe galoi mung kashun kashe lu na mara ai n rai. Matse labye ni mung shanhte hpe kawa sha lu na mara ai n rai. Shanhte gaw shim lum ai hte shanu nga lu nna kadai mung shanhte hpe jahkrit shama lu na mara ai n rai.
29 Ngai gaw ga sau rawng ai yi hkauna ni hpe shanhte a lata hta ap ya nna dai mungdan hta hku hku hpang gara ai hpe jahtum kau na nngai. Masha amyu baw ni gaw shanhte hpe galoi mung asawng asang di na mara ai n rai.
30 Ngai gaw Israela hpe makawp maga ai mung, shanhte gaw nye a amyu masha ni rai nga ai hpe mung, masha shagu chye lu na mara ai. Tsaw Htum ai dai Madu nan ga tsun ni ai.
31 ?Nye a sagu ni e, ngai bau rem ai sagu hpung nanhte gaw nye a amyu masha ni rai nga myit dai; ngai gaw nanhte a Karai Kasang rai nga nngai,? ngu nna Tsaw Htum ai dai Madu tsun ai.